Skanda Purana · Chapter 6.58

// sūta uvāca // //
evaṃ saṃsthāpya gāṃgeyaḥ puṇyaṃ devacatuṣṭayam //
tataḥ saṃsthāpayāmāsa gaṃgāṃ tripathagāminīm

kūpikāyāṃ mahābhāga śivaliṃgasya pūrvataḥ //
tataḥ provāca tānhṛṣṭaḥ saṃpūjya dvijasattamān

asyāṃ yaḥ puruṣaḥ snānaṃ kṛtvā māṃ vīkṣayiṣyati //
sarvapāpavinirmuktaḥ śivalokaṃ prayāsyati

kariṣyati tathā yastu śapathaṃ cātra mānavaḥ //
asatyaṃ yāsyati kṣipraṃ sa yamasya gṛhaṃ prati

evamuktvā mahābhāgo bhīṣmaḥ kurupitāmahaḥ //
jagāma svapuraṃ tasmāddharṣeṇa mahatā vṛtaḥ

// sūta uvāca //
tatrāsīcchūdrasaṃbhūtaḥ pauṃḍrakonāma nāmataḥ //
bālabhāve samaṃ mitraiḥ sa krīḍati divāniśam

hāsyabhāvācca mitrasya pustakaṃ tena coritam //
mitraiḥ pṛṣṭaḥ pauṇḍrakaḥ sa prāha naiva mayā hṛtam

pustakaṃ caiva yuṣmākaṃ cintanīyaṃ sadaiva tat //
bhavadbhiryatnamāsthāya dṛśyatāṃ kvāpi pustakam

kṛtāśca śapathāstatra snātvā bhāgīrathījale //
aduṣṭacetasā tena dattaṃ tatpustakaṃ hṛtam

punaśca ruciraṃ hāsyaṃ kṛtvā tena samaṃ bahu //
athāsāvabhavatkuṣṭhī tatkṣaṇādeva garhitaḥ

sa tyakto bāṃdhavaiḥ sarvaiḥ kalatrairapi vallabhaiḥ //
tato vairāgyamāpanno bhṛgupātaṃ papāta saḥ

jātaśca tatprabhāvena kuṣṭhena parivarjitaḥ //
śāstracauryakṛtāddoṣānmūkarūpaḥ sa hāsyakṛt

na kāryaḥ śapathastasmāttasyāgre'pi laghurdvijāḥ //
api hāsyopacāreṇa ātmanaḥ sukhamicchatā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śivagaṃgāmāhātmyavarṇanaṃnāma aṣṭapañcāśattamo'dhyāyaḥ