Skanda Purana · Chapter 6.57

// sūta uvāca // //
tasminkṣetre tathādityaḥ sthāpito dvijasattamāḥ //
bhīṣmeṇa brāhmaṇeṃdrāṇāṃ saṃmatena tathātmanā

śaṃtanordayitaḥ putro gāṃgeya iti viśrutaḥ //
āsītpurā varo nṛṇāmūrdhvaretāḥ suviśrutaḥ

tasyāsīttumulaṃ yuddhaṃ bhārgaveṇa samaṃ mahat //
trayoviṃśaddinānyeva devāsuraraṇopamam//
aṃbākṛte śitaiḥ śastrairastraiśca tadanaṃtaram

tato brahmādayo devāḥ svayameva vyavasthitāḥ //
tābhyāṃ nivāraṇārthāya śāṃtyarthaṃ sarvadehinān //
gatāśca te samutthāpya punareva triviṣṭapam

aṃbāpi prāpya paramaṃ gāṃgeyotthaṃ parābhavam //
praviṣṭā koparaktākṣī susamiddhe hutāśane

bhartsayitvā nadīputraṃ bāṣpavyākulalocanā//
tataḥprovāca madhyasthā vahneḥ kurupitāmaham

yasmādbhīṣma tvayā tyaktā kāmārtāhaṃ sudurmate//
tasmāttava vadhāyāśu bhaviṣyāmi punaḥ kṣitau

strīhatyayā samāyuktastvaṃ ca nūnaṃ bhaviṣyasi//
pramāṇaṃ yadi dharmo'tra smṛtiśāstrasamudbhavaḥ

tataḥ sa ghṛṇayā''viṣṭo bhīṣmaḥ kurupitāmahaḥ //
mārkaṃḍeyaṃ muniśreṣṭhaṃ papraccha vinayānvitaḥ

bhagavankāśirājasya sutayā me prajalpitam //
mama mṛtyukaraṃ pāpaṃ sakalaṃ te bhaviṣyati

tatkiṃ syādvākyamātreṇa no vā brāhmaṇasattama //
atra me saṃśayastattvaṃ yathāvadvaktumarhasi

// śrīmārkaṃḍeya uvāca // //
ākṣiptastāḍito vāpi yamuddiśya tyajedasūn //
strījano vā dvijo vāpi tasya pāpaṃ tu tadbhavet

striyaṃ vā brāhmaṇaṃ vāpi tasmānnaiva prakopayet //
nighnaṃtaṃ vā śapaṃtaṃ vā yadīcchecchubhamātmanaḥ

tvayā punarvarākī sā kāmārtā samupekṣitā //
jitvā svayaṃvare pūrvaṃ tatkathaṃ syānna pāpabhāk ///४//
// bhīṣma uvāca // //
tadarthaṃ vada me brahmanprāyaścittaṃ viśuddhaye //
tapo vā yadi vā dānaṃ vrataṃ niyamameva vā

// mārkaṃḍeya uvāca // //
daśānāṃ brāhmaṇeṃdrāṇāṃ yadvadhe pātakaṃ smṛtam //
tatpāpaṃ strīvadhe kṛtsnaṃ jāyate bharatarṣabha

tadatra viṣaye dānaṃ na tapo na vratādikam //
tīrthasevāṃ parityajya tasmāttvaṃ tāṃ samācara

// // sūta uvāca // //
sa tasya vacanaṃ śrutvā bhīṣmaḥ kurupitāmahaḥ //
tīrthayātrāparo bhūtvā babhrāma kṣitimaṃḍale///८//
tataḥ kramātsamāyāto bhramamāṇo mahītale //
camatkārapure kṣetre nānātīrthasamākule

athāpaśyanmahātmā sa supuṇyaṃ tadgayāśiraḥ //
snātvā śrāddhaṃ ca vidhivadyāvacchraddhāsama nvitaḥ

cakre tāvannabhovāṇī vākyametaduvāca ha //
bhīṣmabhīṣma mahābāho nārhastvaṃ śrāddhajaṃ vidhim

kartuṃ strīhatyayāyuktastasmācchṛṇu vaco mama //
śarmiṣṭhātīrthamityeva khyātaṃ pātakanāśanam

asmātsthānātsamīpasthaṃ vāruṇyāṃ diśi puṇyakṛt //
kṛṣṇāṃgārakaṣaṣṭhyāṃ yo naraḥ snānaṃ samācaret

sa strīhatyākṛtātpāpānmucyate nātra saṃśayaḥ //
tasmādadya dine putra bhaumavārasamanvitā

saiva ṣaṣṭhī tithiḥ puṇyā tasmāttatra drutaṃ vraja //
ahaṃ tava pitā putra śaṃtanuḥ pṛthivīpatiḥ

strīhatyayānvitaṃ jñātvā tatastūrṇamihāgataḥ //
tato bhīṣmo drutaṃ gatvā tatra sthāne samāhitaḥ

snānaṃ kṛtvā tataḥ śrāddhaṃ cakre śraddhāsamanvitaḥ //
tato bhūyaḥ samāgatya sa taṃ provāca śatanuḥ

vipāpmā tvaṃ kuruśreṣṭha saṃjāto'si na saṃśayaḥ //
tasmānnijaṃ gṛhaṃ gaccha rājyaciṃtāṃ samācara

tataḥ sa vismayāviṣṭo jñātvā tīrthamanuttamam //
vāsudevātmikāmarcāṃ tathānyāṃ kurusattamaḥ

pārijātamayīṃ mūrtiṃ raverlakṣaṇalakṣitām //
supramāṇāṃ surūpāṃ ca śraddhāpūtena cetasā

tathānyatsthāpayāmāsa liṃgaṃ devasya śūlinaḥ //
durgāṃ ca bhaktisaṃyukto vidhidṛṣṭena karmaṇā

tataḥ sarvānsamāhūya sa viprānpurasaṃbhavān //
provāca kauravo bhīṣmo vinayāvanataḥ sthitaḥ

mayā vinirmitaṃ viprā devāgāracatuṣṭayam //
etatkṣetre ca yuṣmākaṃ dayāṃ kṛtvā mamopari

pālayadhvaṃ prayāsyāmi svagṛhaṃ prati satvaram//
preritaḥ pitṛbhirdivyaiḥ svargamārgasamāśritaiḥ

// brāhmaṇā ūcuḥ // //
gacchagaccha kuruśreṣṭha suviśrabdhaḥ svamāyayā //
vayaṃ sarve kariṣyāmo yuṣmacchreyo'bhivardhanam

devaśreṇiriyaṃ rājanyā tvayātra vinirmitā //
asyāḥ pūjādikaṃ sarvaṃ kariṣyāmaḥ sadā vayam

tavāpi vinayaṃ dṛṣṭvā parituṣṭā vayaṃ nṛpa //
sarvānprārthaya tasmāttvaṃ varaṃ svaṃ manasi sthitam

// bhīṣma uvāca // //
eṣa eva varo'smākaṃ yatsaṃtuṣṭā dvijottamāḥ //
tathāpyāśu vacaḥ kāryaṃ yuṣmadīyaṃ mayādhunā // ३८ /१
etāni devasadmāni madīyāni naro bhuvi //
yo yaṃ kāmamabhidhyāya pūjayecchraddhayā'nvitaḥ //
prasādādeva yuṣmākaṃ tasya tatsyādasaṃśayam

// brāhmaṇā ūcuḥ // //
ādityasya kariṣyāmo yātrāṃ bhādrapade vayam //
saptamyāṃ sūryavāreṇa sarvadaiva samāhitāḥ

tathā śivasya cāṣṭamyāṃ caitraśukle viśeṣataḥ //
caturdaśyāṃ mahābhāga tava snehānna saṃśayaḥ

śayane bodhane viṣṇoḥ saṃprāpte dvādaśīdine //
viṣṇorapi ca durgāyāḥ saṃprāpte navamīdine

āśvine śuklapakṣe ca gītavāditranisvanaiḥ//
mahotsavaṃ tathā citrairhāsyalāsyaiḥ pṛthagvidhaiḥ // ४३.//
yastatra mānavo nityaṃ śraddhayā parayā yutaḥ //
kariṣyati ca gītādi sa yāsyati parāṃ gatim

vayaṃ tasya bhaviṣyāmaḥ sadaiva prītamānasāḥ //
pradāsyāmastathā kāmānmanasā vāṃchitānnṛpa //

evamuktvātha te viprāḥ svāni sthānāni bhejire //
bhīṣmo'pi harṣasaṃyuktaḥ svagṛhaṃ prasthitastataḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṃḍe śrīhāṭakeśvarakṣetramāhātmye gāṃgeyayātrākhyānaṃnāma saptapañcāśattamo'dhyāyaḥ