સ્કંદ પુરાણ · અધ્યાય 6.58

॥ સૂત ઉવાચ ॥ ॥
એવં સંસ્થાપ્ય ગાંગેયઃ પુણ્યં દેવચતુષ્ટયમ્ ॥
તતઃ સંસ્થાપયામાસ ગંગાં ત્રિપથગામિનીમ્

કૂપિકાયાં મહાભાગ શિવલિંગસ્ય પૂર્વતઃ ॥
તતઃ પ્રોવાચ તાન્હૃષ્ટઃ સંપૂજ્ય દ્વિજસત્તમાન્

અસ્યાં યઃ પુરુષઃ સ્નાનં કૃત્વા માં વીક્ષયિષ્યતિ ॥
સર્વપાપવિનિર્મુક્તઃ શિવલોકં પ્રયાસ્યતિ

કરિષ્યતિ તથા યસ્તુ શપથં ચાત્ર માનવઃ ॥
અસત્યં યાસ્યતિ ક્ષિપ્રં સ યમસ્ય ગૃહં પ્રતિ

એવમુક્ત્વા મહાભાગો ભીષ્મઃ કુરુપિતામહઃ ॥
જગામ સ્વપુરં તસ્માદ્ધર્ષેણ મહતા વૃતઃ

॥ સૂત ઉવાચ ॥
તત્રાસીચ્છૂદ્રસંભૂતઃ પૌંડ્રકોનામ નામતઃ ॥
બાલભાવે સમં મિત્રૈઃ સ ક્રીડતિ દિવાનિશમ્

હાસ્યભાવાચ્ચ મિત્રસ્ય પુસ્તકં તેન ચોરિતમ્ ॥
મિત્રૈઃ પૃષ્ટઃ પૌણ્ડ્રકઃ સ પ્રાહ નૈવ મયા હૃતમ્

પુસ્તકં ચૈવ યુષ્માકં ચિન્તનીયં સદૈવ તત્ ॥
ભવદ્ભિર્યત્નમાસ્થાય દૃશ્યતાં ક્વાપિ પુસ્તકમ્

કૃતાશ્ચ શપથાસ્તત્ર સ્નાત્વા ભાગીરથીજલે ॥
અદુષ્ટચેતસા તેન દત્તં તત્પુસ્તકં હૃતમ્

પુનશ્ચ રુચિરં હાસ્યં કૃત્વા તેન સમં બહુ ॥
અથાસાવભવત્કુષ્ઠી તત્ક્ષણાદેવ ગર્હિતઃ

સ ત્યક્તો બાંધવૈઃ સર્વૈઃ કલત્રૈરપિ વલ્લભૈઃ ॥
તતો વૈરાગ્યમાપન્નો ભૃગુપાતં પપાત સઃ

જાતશ્ચ તત્પ્રભાવેન કુષ્ઠેન પરિવર્જિતઃ ॥
શાસ્ત્રચૌર્યકૃતાદ્દોષાન્મૂકરૂપઃ સ હાસ્યકૃત્

ન કાર્યઃ શપથસ્તસ્માત્તસ્યાગ્રેઽપિ લઘુર્દ્વિજાઃ ॥
અપિ હાસ્યોપચારેણ આત્મનઃ સુખમિચ્છતા

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે શિવગંગામાહાત્મ્યવર્ણનંનામ અષ્ટપઞ્ચાશત્તમોઽધ્યાયઃ