Skanda Purana · Chapter 6.56

// sūta uvāca // //
tasyāpi nātidūrasthaṃ sāṃbādityaṃ sureśvaram //
dṛṣṭvā kāmānavāpnoti sarvānmartyo hṛdi sthitān

yastu māghasya śuklāyāṃ saptamyāṃ ravivāsare //
bhaktyā saṃpaśyate martyo narakānna sa paśyati

āsītpūrvaṃ dvijo nāma gālavaḥ sa mahāmuniḥ //
svādhyāyanirato nityaṃ vedavedāṃgapāragaḥ

śucivrataparaḥ śāṃto devadvijaparāyaṇaḥ //
kṛtajñaśca suśīlaśca yajñakarmavicakṣaṇaḥ

tasyaivaṃ vartamānasya saṃprāptaṃ paścimaṃ vayaḥ //
aputrasya dvijaśreṣṭhāstato duḥkhaṃ vyajāyata

tataḥ sarvaṃ parityajya gṛhakṛtyaṃ sa bhaktimān //
sūryamārādhayāmāsa kṣetre'traiva samāhitaḥ

vaṭavṛkṣaṃ samāśritya śraddhayā parayā yutaḥ //
sthāpayitvā raverarcāṃ yathoktāṃ paṃcarātrike

varṣāsvākāśaśāyī ca hemaṃte jalasaṃśrayaḥ //
paṃcāgnisādhako grīṣme nirāhāro jitendriyaḥ

tataḥ paṃcadaśe varṣe saṃprāpte bhagavānraviḥ //
vaṭavṛkṣaṃ samāśritya samīpasthamuvāca tam

// śrīsūrya uvāca // //
varadosmyadya bhadraṃ te varaṃ prārthaya gālava //
atidurlabhamapyāśu tava dāsyāmyasaṃśayam

// gālava uvāca // //
aputro'haṃ suraśreṣṭha paścime vayasi sthitaḥ //
tasmāddehi sutaṃ mahyaṃ vaṃśavṛddhikaraṃ param

// śrīsūrya uvāca // //
vaṃśavṛddhikaro vipra putrastava bhaviṣyati //
tejasvī ca yaśasvī ca śāstrajño veda pāragaḥ///२//
yeyaṃ tvayā kṛtā me'rcā sāṃbasūryasya saṃnidhau //
sāṃbasūryābhidhāno'yaṃ bhaviṣyati dharātale///३//
anyo'pi śradrayopeto ya enaṃ pūjayiṣyati //
saptamyāṃ sūryavāreṇa yāvaddvādaśa bhāskarāḥ ///४//
saptamyaśca dvijaśreṣṭha nirāhārastu bhaktitaḥ yā //
sa prāpsyati na saṃdehaḥ putraṃ vaṃśavivardhanam

evamuktvā ca saptāśvo virarāma divākaraḥ //
gālavo'pi prahṛṣṭātmā jagāma nijamaṃdiram

nātidīrgheṇa kālena tatastasyābhava tatsutaḥ//
yathoktastena devena sarvalakṣaṇalakṣitaḥ

tataścakre pitā nāma vaṭeśvara iti svayam //
vaṭasthena yato dattaḥ saṃtuṣṭenāṃśumālinā

vaṭeśvarasutāndṛṣṭvā pautrāṃśca dvijasattamāḥ //
gālavaḥ sūryamāpannaḥ kṛtvā suvipulaṃ tapaḥ

vaṭeśvaro'pi saṃjñāya pitrā saṃsthāpitaṃ ravim //
tadarthaṃ kārayāmāsa prāsādaṃ sumanoharam

tataḥprabhṛti loke ca sa vaṭādityasaṃjñitaḥ //
putraprado hyaputrāṇāṃ vikhyāto bhuvanatraye

saptamyāṃ sūryavāreṇa upavāsaparāyaṇaḥ //
yastaṃ pūjayate bhaktyā saptamīrdvādaśa kramāt //
sa prāpnoti sutaṃ śreṣṭhaṃ svavaṃśasya vivardhanam

niṣkāmo vā naro yastu taṃ pūjayati mānavaḥ //
sa mokṣamāpnuyānnūnaṃ durlabhaṃ tridaśairapi

atha gāthā purā gītā nāradena surarṣiṇā //
dṛṣṭvā putrapradaṃ devaṃ vaṭādityaṃ sureśvaram

api varṣaśatā nārī vaṃdhyā vā durbhagāpi vā //
sāṃbasūryaprasādena sadyo garbhavatī bhavet

kiṃ dānaiḥ kiṃ vratairdhyānaiḥ kiṃ japaiḥ sopavāsakaiḥ //
putrārthaṃ vidyamāne'tha sāṃbasūrye sureśvare

varṣamekaṃ naro bhaktyā yaḥ paśyetsūryavāsare //
kṛtakṣaṇo'tra putraṃ sa labhate cottamaṃ sukham

tasmātsarvaprayatnena taṃ devaṃ yatnato dvijāḥ //
paśyedātmahitārthāya svavaṃśaparivṛddhaye

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṃḍe śrīhāṭakeśvarakṣetramāhātmye sāṃbādityamāhātmyavarṇanaṃnāma ṣaṭpañcāśattamo'dhyāyaḥ //