Skanda Purana · Chapter 6.55

// sūta uvāca // //
tasyā eva samīpasthaṃ devadevaṃ naleśvaram //
dṛṣṭvā vimucyute pāpātsthāpitaṃ nalabhūbhujā

yastaṃ paśyennaro bhaktyā māghe ṣaṣṭhyāṃ site dvijāḥ //
sarva rogavinirmuktaḥ prāpnoti paramaṃ padam

kaṇḍūḥ pāmātha dadrūṇi maṃḍalāni vicarcikā //
darśanāttasya naśyanti jantūnāṃ bhāvitātmanām

asti tasyāgrataḥ kuṇḍaṃ svacchodakasupūritam//
matsyakūrmasamākīrṇaṃ padminīkhaṃḍamaṃḍitam

yastatra kurute snānaṃ pratyūṣe somavāsare //
api kuṣṭhāmayamastaḥ sa bhūyaḥ syātpunarnavaḥ

yadā saṃsthāpitaḥ śaṃbhurnalena pṛthivībhujā //
tadā tuṣṭena sa prokto brūhi kiṃ te karomyaham

//
// nala uvāca // //
atra stheyaṃ tvayā deva sadā sannihitena ca //
sarvalokahitārthāya roganāśāya śaṃkara

// śaṃkara uvāca // //
ahaṃ tvadvacanādrājansaṃprāpte somavāsare //
pratyūṣe ca nivatsyāmi prāsāde nātra saṃśayaḥ

māghāṣṭamyāmahorātraṃ sakalaṃ ca mahīpate ०/
prāṇināṃ roganāśāya śuklapakṣe viśeṣataḥ

yo māmatra sthitaṃ tatra divase vīkṣayiṣyati //
snātvā suvimale kuṃḍe samyakchraddhāsamanvitaḥ //
tasya nāśaṃ prayāsyaṃti vyādhayo gātrasaṃbhavāḥ

yo'sya kuṃḍasya saṃbhūtāṃ mṛttikāmapi mānavaḥ //
saṃdhāsyati nije dehe somavāre niśākṣaye //
so'pi rogairvinirmuktaḥ saṃbhaviṣyati puṣṭimān

niṣkāmastu punaryo māṃ tasminkāle nṛpottama //
pūjayiṣyati sadbhaktyā puṣpadhūpānulepanaiḥ //
sarvapāpavinirmukto mama lokaṃ sa yāsyati

// sūta uvāca // //
evamuktvā sa bhagavāṃstrailokyadīpako haraḥ //
antardhānaṃ gato viprā yathā dīpo'tra tatkṣaṇāt

nalo'pi tuṣṭimāpannastamārādhya ciraṃ nṛpaḥ //
tadāhūyākhilānviprāṃścamatkārapurodbhavān ///४//
eṣa saṃsthāpitaḥ śaṃbhurmayā yuṣmatpuroṃtike //
yena dṛṣṭena rogāṇāṃ sarveṣāṃ jāyate kṣayaḥ

adhunāhaṃ gamiṣyāmi svarājyāya kṛte dvijāḥ //
niṣadhāṃ ca purīmeṣa sarvaiḥ pūjyaḥ samāhitaiḥ

// brāhmaṇā ūcuḥ // //
evaṃ pārthivaśārdūla kariṣyāmaḥ samāhitāḥ //
tava devakṛte yatnaṃ yātrādyāsu kriyāsu ca

tathā pūjāṃ kariṣyāmaḥ śraddhayā parayā yutāḥ //
asmākaṃ putrapautrā ye bhaviṣyaṃti tathā pare //
vaṃśajāste kariṣyaṃti pūjāmasya subhaktitaḥ

// sūta uvāca // //
evamuktaḥ sa bhūpālastairvipraistuṣṭisaṃyutaḥ //
pratasthe tānpraṇamyoccaiḥ sarvaistaiścābhinaṃditaḥ //

evaṃ sa bhagavāñchaṃbhustasminsthāne vyavasthitaḥ //
hitāya sarvalokānāṃ sarvarogakṣayāvahaḥ

tasmātsarvaprayatnena vīkṣaṇīyaḥ sadā hi saḥ //
viśeṣātsomavāreṇa śāśvataṃ śreya icchatā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvara kṣetramāhātmye naleśvaramāhātmyavarṇanaṃnāma pañcapañcāśattamo'dhyāyaḥ