Skanda Purana · Chapter 6.54

// sūta uvāca // //
carmamuṃḍā tathā devī tasminsthāne vyavasthitā //
nalena sthāpitā pūrvaṃ svayameva mahātmanā

abhyarcayati tāṃ bhaktyā yo mahānavamī dine //
sa kāmānvāṃchitām̐llabdhvā padaṃ prāpnoti śāśvatam

vīrasenasutaḥ pūrvaṃ nalonāma mahīpatiḥ //
āsītsarvaguṇopetaḥ sarva śatrukṣayāvahaḥ

bhāryā tasyābhavatsādhvī prāṇebhyopi garīyasī //
damayaṃtīti vikhyātā vidarbhādhipateḥ sutā

athāsau kalināviṣṭo dyūtaṃ cakre mahīpatiḥ //
puṣkareṇa samaṃ viprā dāyādena divāniśam

tataḥ sa vyasanāsakto vāryamāṇo'pi sajjanaiḥ //
hārayāmāsa saptāṃgaṃ rājyaṃ muktvā ca tāṃ priyām

atha tāṃ sa samādāya praviṣṭo gahanaṃ vanam //
nirjalaṃ lajjayāviṣṭo duḥkhavyākuliteṃdriyaḥ

tataḥ sa ciṃtayāmāsa yadyeṣā bhīmamaṃdire //
yāti tanmucyate kaṣṭādvanavāsasamudbhavāt

na mayā tatra gaṃtavyaṃ kathaṃcidapi māninā //
tasmādenāṃ parityajya rātrau gacchāmi dūrataḥ

yena tyaktā mayā sādhvī kuṇḍinaṃ yāti tatpuram //
sa evaṃ niścayaṃ kṛtvā sukhasuptāṃ vihāya tām //
prajagāma vanaṃ ghoraṃ vanyaśvāpadasaṃkulam

pratyūṣe cāpi sotthāya yāvatpaśyati bhābhinī //
tāvatpaśyatiśūnyaṃ svaṃ pārśvaṃ yatra nalaḥ sthitaḥ

tato vilapya duḥkhārtā karuṇaṃ tatra kānane //
jagāma mārgamāśrittha piturharmyaṃ śanaiḥśanaiḥ

nalo'pi ca vane tasminbhramamāṇo mahīpatiḥ //
ekākī vṛkṣakuṃjāni sevayāmāsa sarvadā

tatastadvanamutsṛjya jagāmānyanmahāvanam //
nānāvṛkṣagaṇairyuktaṃ bahuśvāpadasaṃkulam

evaṃ sa pṛthivīpālo bhramamāṇovanādvanam //
hāṭakeśvarajaṃ kṣetramāsasāda tataḥ param

etasminnaṃtare prāptaṃ tanmahānavamīdinam //
viśeṣādyatra bhūpālāḥ pūjayanti sureśvarīm

tataḥ sa mṛnmayīṃ kṛtvā carmamuṇḍadharāṃ nṛpaḥ //
vibhavābhāvataḥ paścātphalamūlairatarpayat

tatastasyāḥ stutiṃ kṛtvā puraḥ sthitvā kṛtāṃjaliḥ //
śraddhayā parayā yukto niṣadhādhipatiḥ svayam

jaya sarvagate devi carmamuṇḍadhare vare //
jaya daityakulocchedadakṣe dakṣātmaje śubhe

kālarātri jayācintye navamyaṣṭamivallabhe //
trinetre tryaṃbakābhīṣṭe jaya devi surārcite//

bhīmarūpe surūpe ca mahāvidye mahābale //
mahodaye mahākāye jayadevi mahāvrate

nityarūpe jagaddhātri surāmāṃsavasāpriye //
vikarāli mahākāli jaya pretajanānuge

śavayānarate ramye bhujaṃgābharaṇānvite //
pāśahaste mahāhaste rudhiraughakṛtāspade

phetkārā ravaśobhiṣṭhe gītavādyavirājite //
jayānādye jaya dhyeye bhargadehārdhasaṃśraye

tvaṃ ratistvaṃ dhṛtistuṣṭistvaṃ gaurī tvaṃ sureśvarī //
tvaṃ lakṣmīstvaṃ ca sāvitrī gāyatrī tvamasaṃśayam

yatkiṃcittriṣu lokeṣu strīrūpaṃ devi dṛśyate //
tatsarvaṃ tvanmayaṃ nātra vikalpo'sti mama kvacit

yena satyena tena tvamatrāvāsaṃ drutaṃ kuru //
sānnidhyaṃ bhaktitastuṣṭā surāsuranamaskṛte

// sūta uvāca // //
evaṃ stutā ca sā devī nalena pṛthivībhujā //
provāca darśanaṃ gatvā taṃ nṛpaṃ bhaktavatsalā

// śrīdevyuvāca // //
parituṣṭā'smi te vatsa stotreṇānena sāṃpratam //
tasmādgṛhāṇa mattastvaṃ varaṃ manasi saṃsthitam

// nala uvāca // //
damayantīti me bhāryā prāṇebhyo'pi garīyasī //
sā mayā nirjane muktā
vane vyālagaṇānvite

akhaṇḍaśīlāṃ nirdoṣāṃ yathāhaṃ tvatprasādataḥ //
labhe bhūyo'pi tāṃ devi tathātra kuru satvaram

stotreṇānena yo devi stutiṃ kuryātpurastava //
tatraiva divase tasmai tvayā deyaṃ manogatam

// sūta uvāca // //
sā tatheti pratijñāya jagāmādarśanaṃ tataḥ //
so'pi pārthivaśārdūlo lebhe sarvaṃ tayoditam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye nalanirmitacarmamuṇḍāmāhātmyavarṇanaṃnāma catuṣpañcāśattamo'dhyāyaḥ