Skanda Purana · Chapter 6.52

// sūta uvāca // //
umāmaheśvarau tatra sthāpitau tena bhūbhujā //
prāsādaṃ paramaṃ kṛtvā sādhudṛṣṭisukhapradam

tasyāgrataḥ śubhaṃ kuṃḍaṃ tatra caiva vinirmitam //
svacchodakena sampūrṇaṃ padminīkhaṃḍamaṃḍitam

snātvā tatra naro bhaktyā tau paśyedyaḥ samāhitaḥ //
māghaśuklacaturdaśyāṃ na sa bhūyo'tra jāyate

tasyaiva pūrvadigbhāge'gastyakuṇḍasamīpataḥ //
asti vāpī mahāpuṇyā sarvapātakanāśinī

tasyāṃ yaḥ kurute snānaṃ māsi vai phālgune naraḥ //
sopavāsaḥ sitāṣṭamyāṃ vāṃchitaṃ labhate ca saḥ

tasyā dakṣiṇadigbhāge tatrāsti kapilā nadī //
kapilo yatra saṃprāptaḥ siddhiṃ sāṃkhyasamudbhavām

kapilāyāśca pūrveṇa siddhakṣetraṃ prakīrtitam //
yatra siddhiṃ gatāḥ siddhāḥ purā śata sahasraśaḥ

yo yaṃ kāmamabhidhyāya tapastatra samācaret //
ṣaṇmāsābhyaṃtare nūnaṃ sa tamāpnoti mānavaḥ

tasyādhastācchilā viprā vidyate vaiṣṇavī śubhā //
bhramantī caturasrā ca sarvapātakanāśinī

sadā mahānadītoyakṣālitā muktidā nṛṇām //
gaṃgāyamunayormadhye saṃniviṣṭā sarasvatī

triveṇī vahate tasyāḥ purato bhuktimuktidā //
tasyāmupari dagdhānāṃ brāhmaṇānāṃ viśeṣataḥ

nūnaṃ muktirbhavetteṣāṃ citā bhasmani goṣpadam //
dṛśyate tatra tajjñātvā saṃskāryā brāhmaṇā mṛtāḥ

tasyaivottaradigbhāge rudrakoṭirdvijottamāḥ //
asti saṃpūjitā viprai rdākṣiṇātyairmahātmabhiḥ

mahāyogisvarūpeṇa dākṣiṇātyā dvijottamāḥ //
camatkārapure kṣetre śrutvā svayamumāpatim

tataḥ kautūhalāviṣṭāḥ śraddhayā parayā yutāḥ //
koṭisaṃkhyā drutaṃ jagmustasya darśanavāṃchayā

ahaṃpūrvamahaṃpūrvaṃ vīkṣayiṣyāmi taṃ haram //
iti śraddhāsamo petāścakruste śapathaṃ gatāḥ

eteṣāṃ madhyato yastaṃ mahāyoginamīśvaram //
caramaṃ devamīkṣeta bhaviṣyati sa pāpakṛt

tatasteṣāmabhiprāyaṃ jñātvā devo maheśvaraḥ //
bhaktiprīto hitārthāya koṭirūpairvyavasthitaḥ

helayā darśanaṃ prāptaḥ sarveṣāṃ dvijasattamāḥ //
tataḥ prabhṛti tatsthānaṃ rudrakoṭītiviśrutam

tadarthaṃ paṭhitaḥ śloko nāradena purā dvijāḥ //
rudrāvartaṃ samālokya prahṛṣṭena dvijottamāḥ

āṣāḍhīṃ kārtikīṃ māghīṃ tathā caitrasamudbhavām //
dhanyāḥ pṛthivyāṃ lapsyaṃte rudrāvarte caturdaśīm

ājanmaśatasāhasraṃ kṛtvā pāpaṃ naraḥ kṣitau //
rudrāvartaṃ samālokya vipāpmatvaṃ prapadyate

rudrāvartte naro gatvā dṛṣṭvā yogeśvaraṃ haram //
śuklapakṣe caturdaśyāṃ vipāpmā jāyate dhruvam

yastatra kurute śrāddhaṃ mahāyogipure dvijāḥ //
rudrāvarte sa cāpnoti phalaṃ śatamakhodbhavam

upavāsaparo bhūtvā yaḥ kuryādrātrijāgaram //
kāmagena vimānena sa svarge yāti mānavaḥ

tatra yaḥ kapilāṃ dadyādbrāhmaṇāyāhitāgnaye //
sa gaṇaḥ syānna saṃdeho harasya dayitastathā

ṣaḍakṣaraṃ japedyastu mahāyogipuraḥ sthitaḥ //
maṃtraṃ tasya bhavecchreyaḥ ṣaṅguṇaṃ rājasūyataḥ

yastasya purato bhaktyā japedvā śatarudriyam //
caturṇāmapi vedānāṃ so'dhītānāṃ bhajetphalam

gītaṃ vā yadi vā nṛtyaṃ tatpuraḥ kurute naraḥ //
sa sarveṣāṃ bhajecchreyo makhānāṃ nātra saṃśayaḥ

evamuktvā dvijaśreṣṭhāḥ sa munirbrahmasaṃbhavaḥ //
virarāma tato hṛṣṭastīrthayātrāṃ gato drutam

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṃḍe hāṭakeśvarakṣetramāhātmye rudrakoṭimāhātmyavarṇanaṃnāma dvipañcāśattamo'dhyāyaḥ