Skanda Purana · Chapter 6.50

evaṃ tasya narendrasya vyāghrarūpasya kānane //
jagāma sumahānkālo nighnato vividhāndvija

kasyacittvatha kālasya tasmindeśe dvijottamāḥ //
ā yātaṃ gokulaṃ ramyaṃ gopagopīsamākulam

tatrāsti nandinīnāma dhenuḥ pīnapayodharā //
vistīrṇajaghanābhogā haṃsavarṇā ghaṭasravā

atha sā nijayūthasya sadāgre tṛṇavāṃchayā //
bhramamāṇā nikuñjāṃte liṃgaṃ devasya śūlinaḥ

apaśyattejasā yuktaṃ svayameva vyavasthitam //
dvādaśārkapratīkāśaṃ cittāhlādakaraṃ param

tatastasyopari sthitvā susrāva sumahatpayaḥ //
śraddhayā parayā yuktā tasya snānakṛte dvijāḥ

evaṃ tāṃ snapanaṃ tasya sadā liṃgasya kurvatīm //
na jānāti janaḥ kaścidvane vṛkṣasamākule

anyasmindivase tatra sthāne vyāghraḥ samāgataḥ //
tīkṣṇadaṃṣṭro mahākāyaḥ sarvajantubhayāvahaḥ

atha sā tatra āyātā patitā dṛṣṭigocare //
nandinī dvīpinastasya daivayogāddvijottamāḥ

tataḥ sā gokule baddhaṃ smṛtvā svaṃ laghuvatsakam //
atṛṇādaṃ payovṛttiṃ karuṇaṃ paryadevayat

adyaikāhaṃ ca saṃprāptā kānane janavarjite //
putraṃ bālaṃ parityajya gopairgoṣṭhe niyaṃtritam

yena satyena bhaktyādya snapanāyāhamāgatā //
śivasya tena satyena bhūyānme sutasaṃgamaḥ

evaṃ sā karuṇaṃ yāvannandinī vilapatyalam//
tāvadvyāghraḥ smitaṃ kṛtvā provāca paruṣākṣaram

// vyāghra uvāca // //
pralāpānkiṃ mudhā dheno karoṣi vaśagā mama //
tasmādiṣṭatamaṃ devaṃ smara svargakṛte śubhe

// dhenuruvāca // //
nāhamātmakṛte vyāghra vilapāmi suduḥ khitā //
śivārcanakṛte mṛtyurmama jātaḥ śubhāvahaḥ

vatso me gokule baddhaḥ smaramāṇo mamāgamam //
santiṣṭhate payovṛttiḥ kathaṃ syātsa mayā vinā

etasmātkāraṇādvyāghra vilapāmi suduḥkhitā //
na cātmajīvanārthāya satyenātmānamālabhe

tasmānmuṃca mahāvyāghra māṃ sadyaḥ sutavatsalām //
sakhījanasya taṃ dattvā samāgacchāmi teṃtikam

// vyāghra uvāca // //
kathaṃ mṛtyumukhaṃ prāpya niṣkramya ca kathañcana //
bhūyastatraiva niryāsi tasmāttvāṃ bhakṣayāmyaham

// nandinyuvāca // //
śapathairāgamiṣyāmi yaiḥ punarvyāghra teṃ'tikam //
tānākarṇaya me vaktrāttato yuktaṃ samācara

yatpāpaṃ brahmahatyāyāṃ mātāpitrośca vaṃcane //
tena pāpena lipyehaṃ nāgacchāmi punaryadi

vivastraṃ snānasaktānāṃ divāmaithunagāminām //
yatpāpaṃ tena lipye'haṃ nāgacchāmi punaryadi

rajasvalānusaktānāṃ yatpāpaṃ nagnaśāyinām //
tena pāpena lipye'haṃ nāgacchāmi punaryadi

viśvāsaghātakānāṃ ca kṛtaghnānāṃ ca yadbhavet //
tena pāpena lipye'haṃ nāgacchāmi punaryadi //

gokanyābrāhmaṇānāṃ ca dūṣakānāṃ ca yadbhavet //
tena pāpena lipye'haṃ nāgacchāmi punaryadi

vṛthāpākaprakartṛṇāṃ vṛthāmāṃsāśināṃ ca yat //
tena pāpena lipye'haṃ nāgacchāmi punaryadi

vratabhaṃgaprakartṛṇāmanṛtau gāmināṃ ca yat //
tena pāpena lipye'haṃ nāgacchāmi punaryadi //

paiśunyasūcakānāṃ ca yatpāpaṃ śastrakarmaṇām//
tena pāpena lipye'haṃ nāgacchāmi punaryadi

iti śrīskānde mahāpurāṇa ekāśīti sāharasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye kalaśeśvaramāhātmye govyāghrasaṃvādavarṇanaṃnāma pañcāśattamo'dhyāyaḥ