Skanda Purana · Chapter 6.49

sūta uvāca // //
tatraivāsti mahāpuṇyo hradatīre vyavasthitaḥ //
kalaśeśvara ityākhyaḥ sarvapāpapraṇāśanaḥ

dṛṣṭvā pramucyate pāpānmanuṣyaḥ kalaśeśvaram

purāsītkalaśonāma yaduvaṃśasamudbhavaḥ //
yajvā dānapatirdakṣaḥ sarvalokahite rataḥ

kasyacittvatha kālasya durvāsā muni sattamaḥ //
cāturmāsyavrataṃ kṛtvā tadgṛhaṃ samupasthitaḥ

athotthāya nṛpastūrṇaṃ sammukhaḥ prayayau mudā //
svāgataṃ svāgataṃ testu bruvāṇa iti sādaram

tataḥ praṇamya taṃ bhaktyā prakṣālya caraṇau svayam //
dattvārghamiti hovāca harṣabāṣpākulekṣaṇaḥ

idaṃ rājyamamī putrā imā nārya idaṃ dhanam//
brūhi sarvaṃ mune tvaṃ ca tava kāryaṃ dadāmyaham

// durvāsā uvāca // //
yuktametanmahārāja vaktuṃ te kāryamīdṛśam //
gṛhāgatāya viprāya vratine'smadvidhāya ca

na me kiñciddhanaiḥ kāryaṃ na rājyena nṛpottama //
cāturmāsyavrato'to'haṃ pāraṇaṃ kartṛmutsahe

tasmādyatkiñcidannaṃ te siddhamasti gṛhe nṛpa //
taddehi bhojanārthaṃ me bubhukṣātīva vardhate

// sūta uvāca // //
tataḥ sa pṛthivīpālo yathāsiddhaṃ susaṃskṛm //
annaṃ bhojyakṛte tasmai pradadau svayameva hi

vyañjanāni vicitrāṇi pakvānnāni bahūni ca //
peyaṃ coṣyaṃ ca khādyaṃ ca lehyamannamanekadhā //
tathā māṃsaṃ vicitraṃ ca lavaṇādyaiḥ susaṃskṛtam

athāsau bubhuje vipraḥ kṣutkṣāmastvarayānvitaḥ //
avindanna rasāsvādaṃ bṛhadgrāsairmudānvitaḥ

atha tṛptena māṃsasya jñātastena raso dvijāḥ //
tataḥ kopaparītātmā taṃ śaśāpa munīśvaraḥ

yasmānmāṃsaṃ tvayā dattvā vratabhaṃgaḥ kṛto mama //
tasmāttvamāmiṣāhāro raudro vyāghro bhaviṣyasi

tataḥ sa bhūpatirbhītaḥ praṇamya ca munīśvaram //
provāca dīnavadano vepamānaḥ suduḥkhitaḥ

tava kṣutkṣāmakaṇṭhasya mayā bhaktiḥ kṛtā mune //
yathāsiddhena bhojyena tatkasmācchaptumudyataḥ

tasmātkuru prasādaṃ me bhaktasya vinatasya ca //
śāpasyānugraheṇaiva śīghraṃ brāhmaṇasattama

// durvāsā uvāca // //
muktvā śrāddhaṃ tathā yajñaṃ na māṃsaṃ bhakṣayeddvijaḥ //
viśeṣeṇa vratasyāṃte cāturmāsyodbhavasya ca

upavāsaparo bhūtvā māṃsamaśnāti yo dvijaḥ //
vṛthāmāṃsādvṛthā tasya tadvrataṃ jāyate dhruvam

tasmādvrataṃ praṇaṣṭaṃ me cāturmāsyasamudbhavam //
tena śapto'si rājeṃdra mayā kopena sāṃpratam

//rājovāca // //
tathāpi kuru me vipra śāpasyāṃtaṃ yathepsitam //
bhaktiyuktasya dīnasya nirdoṣasya viśeṣataḥ

// durvāsā uvāca // //
yadā te naṃdinī dhenurliṃgaṃ bāṇārcitaṃ purā //
darśayiṣyati te muktistadā tūrṇaṃ bhaviṣyati

evamuktvā sa viprendro jagāma nijamāśramam //
babhūva so'pi bhūpālo vyāghro raudratamākṛtiḥ

naṣṭasmṛtistatastūrṇaṃ dṛṣṭvā jaṃtūnpuraḥsthitān //
jaghānoccāṭitonyaiśca praviveśa mahāvanam

atha te maṃtriṇastasya śāpasyātaṃ mahīpateḥ //
vāṃchatastasya tadrājyaṃ cakrureva surakṣitam

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye kalaśeśvarākhyāne kalaśanṛpaterdurvāsasaḥ śāpena vyāghratvaprāptivarṇanaṃnāmaikonapañcāśattamo'dhyāyaḥ