Skanda Purana · Chapter 6.4

sūta uvāca/
triśaṃkuriti saṃcintya viśvāmitraṃ mahāmunim/
manasā suciraṃ kālaṃ tataścakre viniścayam

viśvāmitraṃ parityajya nānyosti bhuvanatraye/
yaḥ kuryānme paritrāṇaṃ duḥkhādasmātsudāruṇāt

kurukṣetraṃ samuddiśya pratasthe sa tataḥ param/
suśrāṃtaḥ kṣutpipāsārto mārgapṛcchāparāyaṇaḥ

tataḥ kālena saṃprāpya kurukṣetraṃ sa pārthivaḥ/
yatnenānveṣayāmāsa viśvāmitrāśramaṃ tataḥ

evaṃ cānveṣamāṇena tena bhūmibhṛtā tadā/
sudūrādeva saṃdṛṣṭaṃ nīladrumakadambakam

upariṣṭādbakairhaṃsairbhramamāṇaiḥ samaṃtataḥ/
āṭibhirmadgubhiścaiva samantājjalapakṣibhiḥ

sa matvā salilaṃ tatra pipāsārto mahīpatiḥ/
pratasthe satvaro hṛṣṭo jalavātahṛtaklamaḥ

athāpaśyanmanohāri saumyasattvaniṣevitam/
āśramaṃ naditīrasthaṃ manaḥśokavināśanam

puṣpitaiḥ phalitairvṛkṣaiḥ samaṃtātparivāritam/
vividhairmadhurārāvairnāditaṃ vihagottamaiḥ

krīḍaṃti nakulāḥ sarpairūlūkā yatra vāyasaiḥ/
mūṣakairvṛṣadaṃśāśca dvīpino vividhairmṛgaiḥ

athāpaśyannadītīre sa tapasvigaṇāvṛtam/
svādhyāyanirataṃ dāṃtaṃ viśvāmitraṃ taponidhinam

tejasā tapasātīva dīpyamānamivānalam/
cīravalkalasaṃvītaṃ śālavṛkṣaṃ samāśritam

atha gatvā sa rājendro dūrastho'pi praṇamya tam/
aṣṭāṃgena praṇāmena svanāma parikīrtayan

tathānyānapi tacchiṣyānkṛtāñjalipuṭaḥ sthitaḥ/
yathākramaṃ yathājyeṣṭhaṃ śraddhayā parayā yutaḥ

dhūlidhūsaritāṃgaṃ taṃ te tu dṛṣṭvā mahīpatim/
caṃḍāla iti manvānāścihnairgātrasamudbhavaiḥ

bhartsayāmāsurevātha vacanaiḥ paruṣākṣaraiḥ/
dhikchabdaiśca tathaivānye yāhiyāhīti cāsakṛt

kastvaṃ pāpeha saṃprāpto munīnāmāśramottame/
vedadhvanisamākīrṇe sādhūnāmapi durlabhe

tasmādgaccha drutaṃ yāvanna kaścittāpasastava/
dattvā śāpaṃ karotyāśu prāṇānāmapi saṃkṣayam

triśaṃkuruvāca/
triśaṃkurnāma bhūpo'haṃ sūryavaṃśasamudbhavaḥ/
śapto vasiṣṭhaputraiśca caṃḍālatve niyojitaḥ

so'haṃ śaraṇamāpannaḥ śāpamuktyai dvijottamāḥ/
viśvāmitraṃ jaganmitraṃ nānyā me'sti gatiḥ parā

viśvāmitra uvāca/
vasiṣṭhasya bhavānyājyastatputrāṇāṃ viśeṣataḥ/
tatkasmādīdṛśe pāpe taistvamadya niyojitaḥ

ko'parādhastvayā teṣāṃ kṛtaḥ pārthivasattama/
prāṇadrohaḥ kṛtaḥ kiṃ vā dāradharṣaṇasaṃbhavaḥ

triśaṃkuruvāca/
anenaiva śarīreṇa svargāya gamanaṃ prati/
mayā saṃprārthito yajño vasiṣṭhānmunisattamāt

tenoktaṃ na sa yajño'sti yena svarge pragamyate/
anenaiva śarīreṇa muktvā dehāṃtaraṃ nṛpa

tacchrutvā sa mayā prokto yadi māṃ na nayiṣyati/
svargaṃ cānena kāyena sadyo yajñaprabhāvataḥ

tadanyaṃ gurumevādya kartāhaṃ nāsti saṃśayaḥ/
etajjñātvā muniḥ prāha yatkṣemaṃ tatsamācara

tato'haṃ tena saṃtyaktastatputrānprāpya niṣṭhurān/
proktavānatha tatsarvaṃ yadvasiṣṭhasya kīrtitam

tatastaiḥ śokasaṃtaptaiḥ śaptosmi munisattama/
nītaścemāṃ daśāṃ pāpāṃ caṃḍālatve niyojitaḥ

so'haṃ tvāṃ manasā dhyātvā sudūrādiharāgataḥ(?)/
āśāṃ garīyasīṃ kṛtvā kurukṣetre munīśvara

nāsādhyaṃ vidyate kiṃcittriṣu lokeṣu te mune/
tasmātkuru pratīkāraṃ duḥkhitasya mamādhunā

sūta uvāca/
tasya tadvacanaṃ śrutvā viśvāmitro munīśvaraḥ/
vasiṣṭhaspardhayovāca munimadhye vyavasthitaḥ

ahaṃ tvāṃ yājayiṣyāmi tena yajñena pārthiva/
gacchasi tridivaṃ yena iṣṭamātreṇa tatkṣaṇāt

tvamevaṃ vihito bhūpa vāsiṣṭhairaṃtyajastu taiḥ/
mayā bhūyo'pi bhūpālaḥ kartavyo nātra saṃśayaḥ

tasmādāgaccha bhūpāla tīrthayātrāṃ mayā saha/
kuru tīrthaprabhāveṇa yena tvaṃ syāḥ śuciḥ punaḥ

tathā yajñakriyārhaśca caṃḍālatvavivarjitaḥ/
nāsti tatpātakaṃ yacca tīrthasnānānna naśyati

sūta uvāca/
evaṃ sa niścayaṃ kṛtvā gādhiputro munīśvaraḥ/
triśaṃkuṃ pṛṣṭhataḥ kṛtvā tīrthayātrāmathāvrajat

kurukṣetraṃ sarasvatyāṃ prabhāse kurujāṃgale/
pṛthūdake gayāśīrṣe naimiṣe puṣkaratraye

vārāṇasyāṃ prayāge ca kedāre śravaṇe nade/
citrakūṭe ca gokarṇe śāligrāme'caleśvare

śuklatīrthe surājyākhye dṛṣadvati nade śubhe/
athānyeṣu supuṇyeṣu tīrtheṣvāyataneṣu ca

evaṃ tasya nareṃdrasya sārdhaṃ tena mahātmanā/
atikrāṃto mahānkālo bhramamāṇasya bhūtale

mucyate na ca pāpena caṃḍālatvena sa dvijāḥ/
evaṃvidheṣu tīrtheṣu snātopi ca pṛthakpṛthak

tataḥ kramātsamāyātaḥ so'rbudaṃ parvataṃ prati/
tatrāruhya samālokya pāpaghnamacaleśvaram

yāvadāyatanāttasmānnirgacchati munīśvaraḥ/
tāvattenekṣito nāmamārkaṃḍo munisattamaḥ

so'pi dṛṣṭvā jaganmitraṃ viśvāmitraṃ munīśvaram/
provācātha kutaḥ prāptaḥ sāṃprataṃ tvaṃ munīśvara

ko'yaṃ tavānugo raudro dṛśyate cāṃtyajākṛtiḥ/
etatsarvaṃ samācakṣva pṛcchato mama sanmune

viśvāmitra uvāca/
eṣa pārthivaśārdūlastriśaṃkuriti viśrutaḥ/
vasiṣṭhasya sutairnītaścaṃḍālatvaṃ prakopataḥ

mayā cāsya pratijñātaṃ saptadvīpavatīṃ mahīm/
prabhramiṣyāmyahaṃ yāvanmedhyatvaṃ tvamupeṣyasi

bhrāṃto'haṃ bhūtale yāni tīrthānyāyatanāni ca/
nacaiṣa medhyatāṃ prāptaḥ pariśrāṃtosmi sāṃpratam

tasmātsarvāṃ mahīṃ tyaktvā lajjayā parayā yutaḥ/
dvīpānmahārṇavāṃstyaktvā saṃprayāsyāmyataḥ param

mā vasiṣṭhasya putrāṇāmupahāsapadaṃ gataḥ/
pratijñārahito vipra satyamedbravīmyaham

śrīmārkaṃḍeya uvāca/
yadyevaṃ muniśārdūla kuruṣva vacanaṃ mama/
saptadvīpavatīṃ pṛthvīṃ mā tyaktvā kutracidvraja

etasmātparvatātkṣetraṃ hāṭakeśvarasaṃjñitam/
asti nairṛtadigbhāge deśe cānartasaṃjñake

tatrādyaṃ sthāpitaṃ liṃgaṃ hāṭakena surottamaiḥ/
yattatsaṃkīrtyate loke pātāle hāṭakeśvaram

pātālajāhnavītoyaṃ yatraivāsti dvijottama/
uddhṛte śaṃbhunā liṃge viniṣkrāṃtaṃ rasātalāt

tatra praviśya yatnena pātālaṃ vasudhādhipaḥ/
karotu jāhnavītoye snānaṃ śraddhāsamanvitaḥ

paścātpaśyatu talliṃgaṃ hāṭakeśvarasaṃjñitam/
bhaviṣyati tataḥ śuddhaścaṃḍālatvavivarjitaḥ

tvamapi prāpsyasi śreyaḥ paraṃ hṛdayasaṃsthitam/
tatonyadapi yatkiṃcittatraiva tapasi sthitaḥ

sūta uvāca/
tasya tadvacanaṃ śrutvā viśvāmitro munīśvaraḥ/
triśaṃkunā samāyukto gatastatra drutaṃ tataḥ

pātāle devamārgeṇa praviśya nṛpasattamam/
triśaṃkuṃ snāpayāmāsa vidhidṛṣṭena karmaṇā

snātamātrotha rājā sa hāṭakeśvadarśanāt/
caṃḍālatvena nirmukto babhūvārkasamadyutiḥ

tatastaṃ sa muniḥ prāha praṇataṃ gatakalmaṣam/
diṣṭyā muktosi rājeṃdra caṃḍālatvena sāṃpratam

diṣṭyā prāptaḥ paraṃ tejo diṣṭyā prāptaḥ paraṃ tapaḥ/
tasmādyajasva satreṇa vidhivaddakṣiṇāvatā

yena saṃprāpsyase siddhiṃ nityaṃ yā hṛdaye sthitā/
tvatkṛte prārthayiṣyāmi svayaṃ gatvā pitāmaham

makhāṃśaṃ sarvadevādyo yena gṛhṇāti te makhe/
tasmādatraiva saṃbhārānsarvānyajñasamudbhavān/
ānaya brahmalokācca yāvadāgamanaṃ mama

bāḍhamityeva so'pyāha sa muniḥ saṃśitavrataḥ/
pitāmahamupāgamya praṇipatyābravīdvacaḥ

yājayiṣyāmyahaṃ bhūpaṃ triśaṃkuṃ prapitāmaha/
mānuṣeṇa śarīreṇa yena gacchati te padam

tasmādāgaccha tatra tvaṃ yajñavāṭaṃ pitāmaha/
sarvaiḥ suragaṇaiḥ sārdhaṃ śivaviṣṇupuraḥsaraiḥ

pragṛhāṇa svahastena yajñabhāgaṃ yathocitam/
saśarīro divaṃ yāti yenāsau tvatprasādataḥ

brahmovāca/
na yajñakarmaṇā svargaḥsvena kāyena labhyate/
muktvā dehāṃtaraṃ brahmaṃstasmānmaivaṃ vadasva mām

vayamagnimukhāḥ sarve havirgṛhṇāmahe makhe/
vedoktavidhinā samyagyajamānahitāya vai

tasmādvahnimukhe bhūyaḥ sa juhoti havirdvija/
tataḥ saṃprāpsyati svargaṃ tvatprasādādasaṃśayam

iti śrīskāṃde mahāpurāṇa ekāśītisāhasrayāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye triśaṃkūpākhyāne viśvāmitrakṛtatriśaṃkuyājanopakramavarṇanaṃnāma caturtho'dhyāyaḥ