Skanda Purana · Chapter 6.43

// menakovāca // //
anyāstā nāyikā vipra yāsāṃ dharmastvayoditaḥ //
svecchācāravihāriṇyo vayaṃ veśyā divaukasām

sa tvaṃ vada mahābhāga kasmāddeśātsamāgataḥ //
mama cittaharo vāpi tīrthe dharmiṣṭhasaṃśraye

tvāṃ dṛṣṭvāhaṃ mahābhāga kāmadeva samākṛtim //
pulakāṃcitasarvāṃgī kāmabāṇaprapīḍitā

tasmādbhajasva māṃ raktāṃ no cedyāsyāmi saṃkṣayam //
kāmabāṇapradagdhā vai puro'pi tava tāpasa //
tataḥ strīvadhapāpena lipyase tvaṃ na saṃśayaḥ

// tāpasa uvāca // //
vayaṃ vratadharāḥ subhru brahmacaryaparāyaṇāḥ //
mūrkhāḥ kāmavidhau bhadre niratāḥ śivaśāsane

sarveṣāṃ vratināṃ mūlaṃ brahmacaryamudāhṛtam //
viśeṣācchivabhaktānāmevaṃ bhūyo vidhāsyasi

api varṣaśataṃ sāgraṃ yattapaḥ kurute vratī //
sakṛtstrīsaṃgamānnāśaṃ yāti pāśupatasya ca

māṃ ca pāśupataṃ lubdhā kasmāttvaṃ bhīru bhāṣase //
īdṛkpāpatamaṃ karma garhitaṃ śivaśāsane

yaḥ strīṃ bhajati pāpātmā vṛthā pāśupatavratī //
so'tītāndaśa cādhāya puruṣānnarake pacet

āstāṃ tāvatsamā saṃgaṃ saṃsparśaṃ ca varānane //
saṃbhāṣamapi pāpāya strībhiḥ pāśupatasya ca

tasmād drutataraṃ gaccha sthānādasmādvarāṃgane //
yatrāvāpsyasi cābhīṣṭaṃ tatra tvaṃ gantumarhasi

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye viśvāmitrakuṇḍotpattivṛttānte viśvāmitramenakāsaṃvādavarṇanaṃnāma tricatvāriṃśo'dhyāyaḥ