સ્કંદ પુરાણ · અધ્યાય 6.43

॥ મેનકોવાચ ॥ ॥
અન્યાસ્તા નાયિકા વિપ્ર યાસાં ધર્મસ્ત્વયોદિતઃ ॥
સ્વેચ્છાચારવિહારિણ્યો વયં વેશ્યા દિવૌકસામ્

સ ત્વં વદ મહાભાગ કસ્માદ્દેશાત્સમાગતઃ ॥
મમ ચિત્તહરો વાપિ તીર્થે ધર્મિષ્ઠસંશ્રયે

ત્વાં દૃષ્ટ્વાહં મહાભાગ કામદેવ સમાકૃતિમ્ ॥
પુલકાંચિતસર્વાંગી કામબાણપ્રપીડિતા

તસ્માદ્ભજસ્વ માં રક્તાં નો ચેદ્યાસ્યામિ સંક્ષયમ્ ॥
કામબાણપ્રદગ્ધા વૈ પુરોઽપિ તવ તાપસ ॥
તતઃ સ્ત્રીવધપાપેન લિપ્યસે ત્વં ન સંશયઃ

॥ તાપસ ઉવાચ ॥ ॥
વયં વ્રતધરાઃ સુભ્રુ બ્રહ્મચર્યપરાયણાઃ ॥
મૂર્ખાઃ કામવિધૌ ભદ્રે નિરતાઃ શિવશાસને

સર્વેષાં વ્રતિનાં મૂલં બ્રહ્મચર્યમુદાહૃતમ્ ॥
વિશેષાચ્છિવભક્તાનામેવં ભૂયો વિધાસ્યસિ

અપિ વર્ષશતં સાગ્રં યત્તપઃ કુરુતે વ્રતી ॥
સકૃત્સ્ત્રીસંગમાન્નાશં યાતિ પાશુપતસ્ય ચ

માં ચ પાશુપતં લુબ્ધા કસ્માત્ત્વં ભીરુ ભાષસે ॥
ઈદૃક્પાપતમં કર્મ ગર્હિતં શિવશાસને

યઃ સ્ત્રીં ભજતિ પાપાત્મા વૃથા પાશુપતવ્રતી ॥
સોઽતીતાન્દશ ચાધાય પુરુષાન્નરકે પચેત્

આસ્તાં તાવત્સમા સંગં સંસ્પર્શં ચ વરાનને ॥
સંભાષમપિ પાપાય સ્ત્રીભિઃ પાશુપતસ્ય ચ

તસ્માદ્ દ્રુતતરં ગચ્છ સ્થાનાદસ્માદ્વરાંગને ॥
યત્રાવાપ્સ્યસિ ચાભીષ્ટં તત્ર ત્વં ગન્તુમર્હસિ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે વિશ્વામિત્રકુણ્ડોત્પત્તિવૃત્તાન્તે વિશ્વામિત્રમેનકાસંવાદવર્ણનંનામ ત્રિચત્વારિંશોઽધ્યાયઃ