Skanda Purana · Chapter 6.42

// sūta uvāca // //
viśvāmitrasamudbhūtaṃ kuṇḍaṃ tatrāparaṃ śubham //
saṃtiṣṭhate dvijaśreṣṭhāḥ sarvakāmapradāyakam

tatra caitratṛtīyāyāṃ kṛte snāne bhavennaraḥ //
divyarūpadharaḥ sākṣātkāmo'nyo dvijasattamāḥ

nārī vā śraddhayopetā tatra snātvā prajāvatī //
bhavetsaubhāgyasaṃyuktā spṛhaṇīyatamā kṣitau

//
// ṛṣaya ūcuḥ // //
tīrthaṃ tasya munestatra kasminkāle vyavasthitam //
nirmalaṃ kena niḥśeṣaṃ vada tvaṃ sūtanaṃdana

// sūta uvāca // //
tatrāsti nirjharaḥ pūrvaṃ sāmānyo dvijasattamāḥ //
avadhūto dharāpṛṣṭhe māhātmyena vyavasthitaḥ

yatra devanadī gaṃgā svayameva vyavasthitā //
yasyāṃ snātaḥ pumānsadyaḥ sarvapāpaiḥ pramucyate

yastatra kurute śrāddhaṃ pitṝnuddiśya bhāvitaḥ //
tadakṣayaṃ bhavecchrāddhaṃ pitṝṇāṃ tṛptikārakam

yatkiṃciddīyata dānaṃ tasmiṃstīrthavare dvijāḥ //
hutajapyādikaṃ caiva tadanaṃtaphalaṃ bhavet

kasyacittvatha kālasya mṛgī vyādhaśarāhatā //
praviṣṭā salile tasmiṃstatra pañcatvamāgatā

caitraśuklatṛtīyāyāṃ madhyāhne dvijasattamāḥ //
nakṣatre yamadaivatye mārtaṃḍasya ca vāsare

atha tattoyamāhātmyānmenakānāma sā'bhavat //
apsarāstridaśeṃdrasya samaṃtāccāruhāsinī

smaramāṇā'tha sā tasya prabhāvaṃ varavarṇinī //
tīrthamāgatya sadbhaktyā snānaṃ tatra samācarat //
caitraśuklatṛtīyāyāṃ yāmarkṣe sūryavāsare

ekadā divase tasminbhramamāṇo munīśvaraḥ //
viśvāmitra iti khyātastatrāyātastapo'nvitaḥ

sā'pi svargātsamāyātā devatādarśanārthataḥ //
pūjayitvātha taṃ devaṃ prasthitā tridivaṃ prati

sā dṛṣṭvā taṃ muniṃ tatra bhramamāṇamitastataḥ //
yauvanasthaṃ surūpāḍhyaṃ paṃcabāṇamivāparam

vrataprabhāvajairvyāptaṃ tejobhirbhāskaraṃ yathā //
bālyātprabhṛti cīrṇena tapasā dagdhakilbiṣam

sā tasya darśanādeva kāmabāṇaprapīḍitā //
sānaṃdāḥ suratārthāya samīpaṃ samupādravat

sa dṛṣṭvā'dṛṣṭapūrvāṃ tāṃ mārgapṛcchākṛte tataḥ //
sammukhaḥ prayayau tūrṇaṃ prahṛṣṭenāṃtarātmanā

uvāca deśaṃ tāṃ pṛcchanstrīdharmāṃśca viśeṣataḥ //
śubhalābho'stu te bhadre manasā karmaṇā girā

sadaiva vāsudevasya bhaktiścāvyabhicāriṇī//
kaccittvaṃ vartase putri patipādaparāyaṇā //
cāritravinayopetā sarvadā priyavādinī

kaccittvaṃ sarvadābhīṣṭā patyurdānaistathārccanaiḥ //
baṃdhūnsvamitravargaṃ ca tatpuraḥ pṛṣṭhatopi vā

kaccidbhartari saṃsupte tvaṃ niśavaśameṣyasi//
utthānamaprabuddhe ca karoṣi varavarṇini

kaccitprātaḥ samutthāya karoṣi gṛhamārjanam //
svayameva varārohe maṇḍanaṃ copamaṇḍanam

kaccidevānnamaskṛtya guruṃ ca tadanaṃtaram //
karoṣi tvaṃ prāṇayātrāṃ dattvānnaṃ śaktito jalam

kaccidastaṃgate sūrye nānnamaśnāsi bhābhini //
adattvā vā svabhṛtyebhyaḥ sādhubhyaśca viśeṣataḥ

kaccitpibasi pānīyaṃ saptavāraviśodhitam [/
nibiḍena svavastreṇa pālayaṃtī jalodbhavān// २६.//
kacciddayāsamopetā gātrakleśakarānapi //
yūkāmatkuṇadaṃśādīnputravatparirakṣasi

kaccitsādhumukhānnityaṃ śivadharmaṃ subhaktitaḥ //
śṛṇoṣi bhaktito bhadre prakaroṣi ca sādaram

kvacicchrutvā''gamaṃ puṇyaṃ prakaroṣi ca pūjanam//
śāstrasya vācakasyāpi vyākhyātuśca viśeṣataḥ

kaccitpurāṇaśāstrāṇi praṇītāni janeśvaraiḥ //
saṃlekhyākṣararamyāṇi sādhubhyaḥ saṃprayacchasi

yaḥ śrutvā sarva śāstrāṇi niṣkrayaṃ na prayacchati //
śāstracauraḥ sa vijñeyo na caivāpnoti tatphalam

kaccicchivālaye nṛtyagītavādyādikāḥ kriyāḥ //
balipūjopahārāṃśca tvaṃ karoṣi ca śaktitaḥ

kaccitprāvaraṇaṃ vastraṃ subhage sarvameva ca //
saṃprayacchasi sādhubhyaḥ praṇipātapuraḥsaram

vṛthā paryaṭanaṃ nityaṃ kaccinna paramaṃdire //
tvaṃ karoṣi viśālākṣi viśeṣeṇa niśāgame

kaccinnāśnāsi bhadre tvaṃ svabhartari bubhukṣite //
ājñābhaṃgaṃ prayatnena kaccittatra prarakṣasi

kaccitprakupite kāṃte nottarāṇi prayacchasi //
tasyakopapraṇāśārṣaṃ priyaṃ kaccicca jalpasi

kaccittvaṃ proṣite kāṃte malināṃbaradhāriṇī //
jāyase ca tathā dīnā vivarṇavadanā kṛśā

kaccinmaṃdirapṛṣṭhe tvaṃ na dhatse bhinnabhājanam //
ucchiṣṭaṃ vā janaistyaktamapi kāryopakārakam

kaccidvrajasi no rātrau jāgareṣu kathāsu ca //
nirjhareṣu vivikteṣu pulineṣu vaneṣu ca

kaccinna kuruṣe maitrīṃ baṃdhakībhiḥ samaṃ śubhe //
dhātrībhirmālikastrībhī rajakībhiśca bhāmini

kañciddadhāsi nityaṃ tvaṃ mukhaṃ kuṃkumaraṃjitam //
śiraḥ puṣpasamākīrṇaṃ netre kajjalaraṃjite

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye viśvāmitrakuṇḍotpattivṛttānte viśvāmitramenakāsamāgamavarṇanaṃnāma dvicatvāriṃśo dhyāyaḥ