Scripture Library

Skanda Purana · Chapter 6.3

6.3.6.3.1

sūta uvāca/
tataḥ praṇamya bhūyaḥ sa vasiṣṭhaṃ munipuṃgavam/
yayau tatra sutāstasya yatra te śatasaṃkhyakāḥ

6.3.6.3.2

tānapi prāha natvā sa tamevārthaṃ narādhipaḥ/
vasiṣṭhavacanaṃ kṛtsnaṃ tasya tairapi śaṃsitam

6.3.6.3.3

tatastānsa punaḥ prāha yuṣmākaṃ janako'dhunā/
aśakto mā divaṃ netuṃ saśarīraṃ visarjitaḥ

6.3.6.3.4

tasmādyadi na māṃ yūyaṃ yājayiṣyatha sāṃpratam/
parityajya kariṣyāmi śīghramanyaṃ purohitam

6.3.6.3.5

yo māṃ yajñaprabhāvena nayiṣyati surālayam/
anenaiva śarīreṇa sahitaṃ guruputrakāḥ

6.3.6.3.6

tasya tadvacanaṃ śrutvā sarve te munisattamāḥ/
paraṃ kopaṃ samāviṣṭāstamūcuḥ paruṣākṣaraiḥ

6.3.6.3.7

yasmāttvayā gurustyakto hitakṛtpāpavānasi/
tasmādbhavādhunā pāpa caṃḍālo lokaniṃditaḥ

6.3.6.3.8

atha tadvacanāṃte sa tatkṣaṇātpṛthivīpatiḥ/
babhūvāṃtyajarūpāḍhyo vikṛtākāradehabhṛt

6.3.6.3.9

yavamadhyaḥ kṛśagrīvaḥ piṃgākṣo bhugnanāsikaḥ/
kṛṣṇāṃgaḥ śaṃkuvarṇaśca durgaṃdhena samāvṛtaḥ

6.3.6.3.10

athātmānaṃ samālokya vikṛtaṃ sa narādhipaḥ/
caṇḍāladharmiṇaṃ sadyo lajjayā'dhomukhaḥ sthitaḥ

6.3.6.3.11

yāhiyāhīti vipraistairbhartsyamāno muhurmuhuḥ/
sarvataḥ sārameyaiśca kliśyamāno nirargalaiḥ/
kākakokilasaṃkāśo jīrṇavastrāvaguṃṭhitaḥ

6.3.6.3.12

tataḥ sa cintayāmāsa duḥkhena mahatā vṛtaḥ/
kiṃ karomi kva gacchāmi kathaṃ śāṃtirbhaviṣyati

6.3.6.3.13

kiṃ mayaitatsumūrkheṇa vāṃchitaṃ durlabhaṃ padam/
tatprabhāvena vibhraṣṭaḥ kuladharmo'pi me svakaḥ

6.3.6.3.14

kiṃ jalaṃ praviśāmyadya kiṃ vā dīptaṃ hutāśanam/
bhakṣayāmi viṣaṃ kiṃ vā kathaṃ syānmṛtyuradya me

6.3.6.3.15

anena vapuṣā dārānvīkṣayiṣyāmi tānkatham/
tādṛśena śarīreṇa yābhiḥ saṃkrīḍitaṃ mayā

6.3.6.3.16

kathaṃ putrāṃstathā pautrānsuhṛtsaṃbaṃdhibāṃdhavān/
vīkṣayiṣyāmi tānbhūyastathānyaṃ sevakaṃ janam

6.3.15

ye mayā nirjitāḥ sarve ripavaḥ saṃgare purā

6.3.6.3.17

te'dya māmīdṛśaṃ śrutvā harṣaṃ yāsyaṃti nirbhayāḥ

6.3.6.3.18

ye mayā tarpitā dānairbrāhmaṇā vedapāragāḥ/
te'dya māmīdṛśaṃ śrutvā saṃbhaviṣyaṃti duḥkhitāḥ

6.3.6.3.19

tathā ye suhṛdo'bhīṣṭā nityaṃ mama hite ratāḥ/
kāmavasthāṃ prayāsyanti dṛṣṭvā māṃ sthitamīdṛśam

6.3.6.3.20

bhadrajātyā gajā ye me madāndhāḥ ṣaṣṭihāyanāḥ/
mayā vinā mitho yuddhe kastānadya niyokṣyati

6.3.6.3.21

aśvāstittirakalmāṣāḥ sudāṃtāḥ sādibhirdṛḍhaiḥ/
kastāṃścitrapadanyāsairniyāmyati mayā vinā

6.3.6.3.22

tathā me bhṛtyavargāste kulīnā yuddhadurmadāḥ/
māṃ vinā kasya yāsyaṃti samīpe'dya suduḥkhitāḥ

6.3.6.3.23

saṃkhyāhīnastathā kośastādṛṅme bahuratnabhāk/
kasya yāsyati saṃbhogaṃ mayā hīnastu rakṣitaḥ

6.3.6.3.24

tathā me saṃkhyayā hīnaṃ dhānyaṃ gojāvikaṃ mahat/
bhaviṣyati kathaṃ hīnaṃ mayābhīṣṭaistu rakṣitam

6.3.6.3.25

evaṃ bahuvidhaṃ rājā sa vilapya ca duḥkhitaḥ/
jagāma nagarābhyāśaṃ padbhyāmeva śanaiḥśanaiḥ

6.3.6.3.26

tato rātrau samāsādya svaṃ puraṃ janavarjitam/
dvāre sthitvā samāhūya putraṃ maṃtribhiranvitam

6.3.6.3.27

kathayāmāsa vṛttāṃtaṃ sarvaṃ śāpasamudbhavam/
dūre sthitaḥ sa putrāṇāṃ vasiṣṭhasya mahātmanaḥ

6.3.6.3.28

vajrapātopamaṃ vākyaṃ te'pi tasya niśamya tat/
bāṣpaparyākulairāsyai ruruduḥ śokasaṃyutāḥ

6.3.6.3.29

hā nātha hā mahārāja hā nityaṃ dharmavatsala/
tvayā hīnā bhaviṣyāmaḥ kathamadya suduḥkhitāḥ

6.3.6.3.30

kimetadyujyate teṣāṃ vāsiṣṭhānāṃ durātmanām/
śāpaṃ daduḥ svayājyasya viśeṣādvinatasya ca

6.3.6.3.31

te vayaṃ rājaśārdūla parityajya gṛhādikam/
antyajatvaṃ gamiṣyāmastvayā sārdhamasaṃśayam

6.3.6.3.32

triśaṃkuruvāca/
bhaktiścedasti yuṣmākaṃ mamopari nirargala/
tanme putrasya maṃtritvaṃ sarve kuruta sāṃpratam

6.3.6.3.33

hariścaṃdraḥ suputroyaṃ mama jyeṣṭhaḥ suvallabhaḥ/
niyojayadhvamavyagrāḥ padavyāṃ mama satvaram

6.3.6.3.34

ahaṃ punaḥ kariṣyāmi yanme manasi saṃsthitam/
mṛtyuṃ vā saṃprayāsyāmi sadeho vā surālayam

6.3.6.3.35

evamuktvā parityajya sarvāṃstānsa mahīpatiḥ/
jagāmāraṇyamāśritya padbhyāmeva śanaiḥ śanaiḥ

6.3.6.3.36

tepi sanmaṃtriṇastūrṇaṃ putraṃ tasya susammatam/
rājye niyojayāsamāsurnādavāditraniḥsvanaiḥ

6.3.3

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye triśaṃkūpākhyāne hariścandrarājyopalaṃbhonāma tṛtīyo'dhyāyaḥ

Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0