Skanda Purana · Chapter 6.39

// sūta uvāca // //
tasyaivottaradigbhāge dhundhumāreśvarasya ca //
yayātinā nareṃdreṇa sthāpitaṃ liṃgamuttamam

devayānyā tathānyacca tathā śarmiṣṭhayā dvijāḥ //
bhāryayā bhūpatestasya sarvakāmaphalapradam

sa yadā sarvabhogānāṃ tṛptiṃ prāpto dvijottamāḥ //
tadā putrasya rājyaṃ svaṃ vapuścaiva nyavedayat

jarāmādāya tadgātrādbhāryābhyāṃ sahitastadā //
papraccha vinayopeto mārkaṃḍaṃ munisattamam

bhagavansarvatīrthānāṃ kṣetrāṇāṃ ca vadasva me //
yatpradhānaṃ pavitraṃ yattadasmākaṃ prakīrtaya

//
// śrīmārkaṃḍeya uvāca // //
kṣetrāṇāmiha sarveṣāṃ tīrthaiḥ sarvairalaṃkṛtam //
camatkārapuraṃ kṣetraṃ sāṃprataṃ pratibhāti naḥ

yatra viṣṇupadī gaṃgā jaṃtūnāṃ pāpanāśinī //
svayaṃ sthitā nṛpaśreṣṭha tathā devā harādayaḥ

tathānyāni ca tīrthāni yāni saṃti dharātale //
teṣāṃ yatra ca sāṃnidhyaṃ sarvadā nṛpasattama

śilā yatra dvipañcāśaddhastānāṃ parisaṃkhyayā //
pitāmahena nirmuktā pramodāya dvijanmanām

yadanyatra śubhaṃ karma varṣeṇaikena sidhyati //
tattatra divasenāpi siddhiṃ yāti kṣitīśvara

tasmāttatra drutaṃ gatvā tapaḥ kuru mahīpate //
yena prāpsyasi cittasthām̐llokānbhāryāsamanvitaḥ

tasya tadvacanaṃ śrutvā sa rājā nahuṣātmajaḥ //
camatkārapure kṣetre bhāryābhyāṃ sahito yayau

tataḥ saṃsthāpya talliṃgaṃ devadevasya śūlinaḥ //
samyagārādhayāmāsa śraddhayā parayā yutaḥ

tatastasya prabhāvena bhāryābhyāṃ sahito nṛpaḥ //
vimānavaramārūḍho jagāma tridivālayam

kinnarairgīyamānaśca stūyamānaśca cāraṇaiḥ //
sparddhamānaḥ samaṃ devairdvādaśārkasamaprabhaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye yayātīśvaramāhātmyavarṇanaṃnāmaikonacatvāriṃśo'dhyāyaḥ//