સ્કંદ પુરાણ · અધ્યાય 6.39

॥ સૂત ઉવાચ ॥ ॥
તસ્યૈવોત્તરદિગ્ભાગે ધુન્ધુમારેશ્વરસ્ય ચ ॥
યયાતિના નરેંદ્રેણ સ્થાપિતં લિંગમુત્તમમ્

દેવયાન્યા તથાન્યચ્ચ તથા શર્મિષ્ઠયા દ્વિજાઃ ॥
ભાર્યયા ભૂપતેસ્તસ્ય સર્વકામફલપ્રદમ્

સ યદા સર્વભોગાનાં તૃપ્તિં પ્રાપ્તો દ્વિજોત્તમાઃ ॥
તદા પુત્રસ્ય રાજ્યં સ્વં વપુશ્ચૈવ ન્યવેદયત્

જરામાદાય તદ્ગાત્રાદ્ભાર્યાભ્યાં સહિતસ્તદા ॥
પપ્રચ્છ વિનયોપેતો માર્કંડં મુનિસત્તમમ્

ભગવન્સર્વતીર્થાનાં ક્ષેત્રાણાં ચ વદસ્વ મે ॥
યત્પ્રધાનં પવિત્રં યત્તદસ્માકં પ્રકીર્તય

॥
॥ શ્રીમાર્કંડેય ઉવાચ ॥ ॥
ક્ષેત્રાણામિહ સર્વેષાં તીર્થૈઃ સર્વૈરલંકૃતમ્ ॥
ચમત્કારપુરં ક્ષેત્રં સાંપ્રતં પ્રતિભાતિ નઃ

યત્ર વિષ્ણુપદી ગંગા જંતૂનાં પાપનાશિની ॥
સ્વયં સ્થિતા નૃપશ્રેષ્ઠ તથા દેવા હરાદયઃ

તથાન્યાનિ ચ તીર્થાનિ યાનિ સંતિ ધરાતલે ॥
તેષાં યત્ર ચ સાંનિધ્યં સર્વદા નૃપસત્તમ

શિલા યત્ર દ્વિપઞ્ચાશદ્ધસ્તાનાં પરિસંખ્યયા ॥
પિતામહેન નિર્મુક્તા પ્રમોદાય દ્વિજન્મનામ્

યદન્યત્ર શુભં કર્મ વર્ષેણૈકેન સિધ્યતિ ॥
તત્તત્ર દિવસેનાપિ સિદ્ધિં યાતિ ક્ષિતીશ્વર

તસ્માત્તત્ર દ્રુતં ગત્વા તપઃ કુરુ મહીપતે ॥
યેન પ્રાપ્સ્યસિ ચિત્તસ્થાઁલ્લોકાન્ભાર્યાસમન્વિતઃ

તસ્ય તદ્વચનં શ્રુત્વા સ રાજા નહુષાત્મજઃ ॥
ચમત્કારપુરે ક્ષેત્રે ભાર્યાભ્યાં સહિતો યયૌ

તતઃ સંસ્થાપ્ય તલ્લિંગં દેવદેવસ્ય શૂલિનઃ ॥
સમ્યગારાધયામાસ શ્રદ્ધયા પરયા યુતઃ

તતસ્તસ્ય પ્રભાવેન ભાર્યાભ્યાં સહિતો નૃપઃ ॥
વિમાનવરમારૂઢો જગામ ત્રિદિવાલયમ્

કિન્નરૈર્ગીયમાનશ્ચ સ્તૂયમાનશ્ચ ચારણૈઃ ॥
સ્પર્દ્ધમાનઃ સમં દેવૈર્દ્વાદશાર્કસમપ્રભઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે યયાતીશ્વરમાહાત્મ્યવર્ણનંનામૈકોનચત્વારિંશોઽધ્યાયઃ॥