Skanda Purana · Chapter 6.38

// sūta uvāca // //
tatraiva sthāpitaṃ liṃgaṃ dhundhumāreṇa bhūbhujā //
sarvaratnamayaṃ kṛtvā prāsādaṃ sumanoharam

tatra kṛtvā''śramaṃ śreṣṭhaṃ tapastepe sudāruṇam //
yatprabhāvādayaṃ devastasmim̐lliṅge vyavasthitaḥ

tasya saṃnihitā vāpī kṛtā tena mahātmanā //
sunirmalajalāpūrṇā sarvatīrthopamā śubhā

dhundhumāreśvaraṃ paśyettatra snātvā narottamaḥ //
na sa paśyati durgāṇi narakāṇi yamālaye

// ṛṣaya ūcuḥ // //
dhuṃdhumāro mahīpālaḥ kasminvaṃśe babhūva saḥ //
kasminkāle tapastaptaṃ tenātra sumahātmanā

// sūta uvāca // //
sūryavaṃśasamudbhūto bṛhadaśvasuto balī //
khyātaḥ kuvalayāśveti dhaṃdhumārastathaiva saḥ

tena dhundhurmahādaityo nihato marujāṃgale //
dhundhumāraḥ smṛtastena vikhyāto bhuvanatraye

camatkārapuraṃ kṣetraṃ sa gatvā pāvanaṃ mahat //
tapastepe vayoṃ'te ca dhyāyamāno maheśvaram

saṃsthāpya sumahalliṃgaṃ prāsāde ratnamaṃḍite //
balipūjopahārādyaiḥ puṣpadhūpānulepanaiḥ

tatastasya mahādevaḥ svayameva maheśvaraḥ //
pratyakṣo'bhūdvṛṣārūḍho gauryā saha tathā gaṇaiḥ

uvāca varado'smīti prārthayasva yathepsitam //
sarvaṃ te'haṃ pradāsyāmi yadyapi syātsudurlabham

//
dhundhumāra uvāca // //
yadi deyo varo'smākaṃ tvayā sarvasureśvara //
saṃnidhānaṃ prakartavyaṃ liṃge'sminvṛṣabhadhvaja

// śrībhagavānuvāca // //
caitre śuklacaturdaśyāṃ sāṃnidhyaṃ nṛpasattama //
ahaṃ sadā kariṣyāmi gauryā sārdhaṃ na saṃśayaḥ

tatra vāpyāṃ naraḥ snātvā yo māṃ saṃpūjayiṣyati //
liṃge'sminsaṃsthitaṃ bhūpa mama lokaṃ sa yāsyati

// sūta uvāca // //
evamuktvā sa bhagavāṃstataścādarśanaṃ gataḥ //
so'pi rājā prahṛṣṭā tmā sthitastatraiva muktibhāk

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye dhundhumāreśvaramāhātmyavarṇanaṃnāmāṣṭātriṃśo adhyāyaḥ