Skanda Purana · Chapter 6.37

// sūta uvāca //
athāpaśyatsa viprāṇāṃ vṛndaṃ vṛndārakopamam//
saṃniviṣṭaṃ dharāpṛṣṭhe līlābhāji dvijottamāḥ/////
eke vedavidastatra vedavyākhyānatatparāḥ//
parasparaṃ susaṃkruddhā vivadaṃti jigīṣavaḥ

yajñavidyāvido'nye'pi yajñākhyānaparāyaṇāḥ //
tatra viprāḥ pradṛśyaṃte śataśo brahmavādinaḥ

anye brāhmaṇaśārdūlā vedāṃgeṣu vicakṣaṇāḥ //
pravadaṃti ca saṃdehānvṛndānāmagrataḥ sthitāḥ

vedābhyāsaparāścānye tāranādena sarvaśaḥ //
nādayaṃto diśāṃ cakraṃ tatra samyagdvijottamāḥ

anye kautūhalāviṣṭāḥ saṃcarānviṣamānmithaḥ //
papracchurjahasuścānye jñātvā mārgapravartinam

smṛtivādaparāścānye tathānye śrutipāṭhakāḥ //
saṃdehānsmṛtijānanye pṛcchaṃti ca parasparam

kīrtayaṃti tathā cānye purāṇaṃ brāhmaṇottamāḥ //
vṛddhānāṃ puratastatra sabhāmadhye vyavasthitāḥ

atha tānsa munirdṛṣṭvā brāhmaṇānsaṃśitavratān //
abhivādya tataḥ prāha sādaraṃ vinayānvitaḥ

mama buddhiḥ samutpannā śambhorāyatanaṃ prati //
kartuṃ brāhmaṇaśārdūlāstasmātsthānaṃ pradarśyatām

tavāhaṃ devadevasya śambhoḥ prāsādamuttamam //
vidhāyārādhayiṣyāmi tameva vṛṣabhadhvajam

sa evaṃ jalpamāno'pi muhurmuhurataṃdritaḥ //
na teṣāmuttaraṃ lebhe śubhaṃ vā yadi vāśubham

tataḥ kopaparītātmā samunistāndvijottamān //
śaśāpa tāraśabdena yathā śṛṇvaṃti kṛtsnaśaḥ

// durvāsā uvāca // //
vidyāmado dhanamadastṛtīyo'bhijanodbhavaḥ //
ete madāvaliptānāmeta eva satāṃ damāḥ

tatra ye'pi hi yuṣmākaṃ madā eva vyavasthitāḥ //
yatastato'nvaye'pyevaṃ bhaviṣyati madānvitāḥ

sadā sauhṛdanirmuktāḥ pitaro'pi sutaiḥ saha //
bhaviṣyaṃti pure hyasminkiṃ punarbāṃdhavādayaḥ

evamuktvā sa viprendro nivṛttastadanantaram //
apamānaṃ paraṃ prāpya brāhmaṇānāṃ dvijottamāḥ

atha tanmadhyago vipra āsīdvṛddhatamaḥ sudhīḥ //
suśīla iti vikhyāto vedavedāṃgapāragaḥ

sa dṛṣṭvā taṃ muniṃ kruddhaṃ gacchaṃtamapamānitam //
satvaraṃ prayayau pṛṣṭhe tiṣṭha tiṣṭheti ca bruvan

athāsādya gataṃ dūraṃ praṇipatya muniṃ ca saḥ //
provāca kṣamyatāṃ vipra viprāṇāṃ vacanānmama

etaiḥ svādhyāyasaṃpannairna śrutaṃ vacanaṃ tava //
nottaraṃ tena saṃdattaṃ satyametadbravīmyaham

tasmādbhūmirmayā dattā śaṃbhuharmyakṛte tava //
asminsthāne dvijaśreṣṭha prāsādaṃ kartumarhasi

tasya tadvacanaṃ śrutvā durvāsā harṣasaṃyutaḥ //
kṣitidānodbhavāṃ cakre svasti brāhmaṇasattamāḥ //
prāsādaṃ nirmame paścāttasya vākye vyavasthitaḥ

atha te brāhmaṇā jñātvā suśīlena vasundharā //
devatāyatanārthāya dattā tasmai tapasvine

sarve kopasamāyuktāḥ suśīlaṃ prati te dvijāḥ

tataḥ procuḥ samāsādya yena śaptā durātmanā //
vayaṃ tasmai tvayā dattā prāsādārthaṃ vasundharā

tasmāttvamapi cāsmākaṃ bāhya eva bhaviṣyasi //
suśīlo'pi hi duḥśīlo nāmnā saṃkīrtyase budhaiḥ

eṣo'pi tāpaso duṣṭo yaḥ karoti śivālayam ///
naiva tasya bhavetsiddhiścāpi varṣaśatairapi

tathā kīrtikṛtāṃ loke kīrtanaṃ kriyate naraiḥ //
tataḥ saṃpaśyatāṃ cāsya kīrtirnāsya tu durmateḥ //

eṣa duḥśīlasaṃjño vai tava nāmnā bhaviṣyati //
prāsādo nāmamātreṇa na saṃpūrṇaḥ kadācana

yasmātsauhṛdanirmuktāḥ kṛtāstena vayaṃ dvijāḥ //
madaistribhiḥ samāyuktāḥ sarvānvayasamanvitāḥ

tasmādeṣo'pi pāpātmā bhaviṣyati sa kopabhāk //
taptaṃ taptaṃ tapo yena saṃprayāsyati saṃkṣayam

evamuktvātha te viprāḥ kopasaṃraktalocanāḥ //
duḥśīlaṃ saṃparityajya praviṣṭāḥ svapure tataḥ

duḥśīlo'pi bahiścakre gṛhaṃ tasya purasya ca //
devaśarmā yathāpūrvaṃ saṃtyaktaḥ puravāsibhiḥ

tasyānvaye'pi ye jātāste bāhyāḥ saṃprakīrtitāḥ //
bāhyāḥ kriyāsu sarvāsu sarveṣāṃ puravāsinām

// sūta uvāca // //
evaṃ teṣu dvijeṃdreṣu śāpaṃ dattvā gateṣu ca //
durvāsāḥ prāha duḥśīlaṃ kopasaṃraktalo canaḥ

mama siddhiṃ gatā maṃtrāḥ samarthāḥ śatrusaṃkṣaye //
ātharvaṇāstathā cānye vedatrayasamudbhavāḥ

tasmādetatpuraṃ kṛtsnaṃ paśupakṣi samanvitam //
nāśamadya nayiṣyāmi yathā śatrorhi duṣṭakaḥ

// duḥśīla uvāca // //
naitadyuktaṃ naraśreṣṭha tava kartuṃ kathaṃcana ///
brāhmaṇānāṃ kṛte karma brāhmaṇasya viśeṣataḥ

nighnaṃto vā śapaṃto vā vadaṃto vāpi niṣṭhuram //
pūjanīyāḥ sadā viprā divyām̐llokānabhīpsubhiḥ

brāhmaṇairnirjitairmene ya ātmānaṃ jayānvitam //
tāmisrādiṣu ghoreṣu narakeṣu sa pacyate

ātmanaśca parābhūtiṃ tasmādviprātsaheta vai //
ya icchedvasatiṃ svarge śāśvatīṃ dvijasattama

eteṣāṃ brāhmaṇeṃdrāṇāṃ kṣetre siddhiṃ samāgatāḥ //
maṃtrāste tatkathaṃ nāśaṃ tvameteṣāṃ kariṣyasi

brahmaghne ca surāpe ca caure bhagnavate tathā //
niṣkṛtirvihitā sadbhiḥ kṛtaghne nāsti niṣkṛtiḥ //

tasmātkopo na kartavyaḥ kṣetre cātra vyavasthitaiḥ //
kṣamāṃ kuru muniśreṣṭha kṛpāṃ kṛtvā mamopari

// sūta uvāca // //
sa tatheti pratijñāya tatra kṛtvāvasattapaḥ //
prāptaśca paramāṃ siddhiṃ durlabhāṃ tridaśairapi

duḥśīlākhyaḥ kṣitau so'pi prāsādaḥ khyāti māgataḥ //
yasya saṃdarśanādeva naraḥ pāpātpramucyate

tasya madhyagataṃ liṃgaṃ śuklāṣṭamyāṃ sadā naraḥ //
yaḥ paśyati kṣaṇaṃ dhyātvā narakaṃ sa na paśyati

iti śrīskāṃde mahāpurāṇe ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye duḥśīlākhyaprāsādotpatti varṇanaṃnāma saptatriṃśo'dhyāyaḥ