સ્કંદ પુરાણ · અધ્યાય 6.38

॥ સૂત ઉવાચ ॥ ॥
તત્રૈવ સ્થાપિતં લિંગં ધુન્ધુમારેણ ભૂભુજા ॥
સર્વરત્નમયં કૃત્વા પ્રાસાદં સુમનોહરમ્

તત્ર કૃત્વાઽઽશ્રમં શ્રેષ્ઠં તપસ્તેપે સુદારુણમ્ ॥
યત્પ્રભાવાદયં દેવસ્તસ્મિઁલ્લિઙ્ગે વ્યવસ્થિતઃ

તસ્ય સંનિહિતા વાપી કૃતા તેન મહાત્મના ॥
સુનિર્મલજલાપૂર્ણા સર્વતીર્થોપમા શુભા

ધુન્ધુમારેશ્વરં પશ્યેત્તત્ર સ્નાત્વા નરોત્તમઃ ॥
ન સ પશ્યતિ દુર્ગાણિ નરકાણિ યમાલયે

॥ ઋષય ઊચુઃ ॥ ॥
ધુંધુમારો મહીપાલઃ કસ્મિન્વંશે બભૂવ સઃ ॥
કસ્મિન્કાલે તપસ્તપ્તં તેનાત્ર સુમહાત્મના

॥ સૂત ઉવાચ ॥ ॥
સૂર્યવંશસમુદ્ભૂતો બૃહદશ્વસુતો બલી ॥
ખ્યાતઃ કુવલયાશ્વેતિ ધંધુમારસ્તથૈવ સઃ

તેન ધુન્ધુર્મહાદૈત્યો નિહતો મરુજાંગલે ॥
ધુન્ધુમારઃ સ્મૃતસ્તેન વિખ્યાતો ભુવનત્રયે

ચમત્કારપુરં ક્ષેત્રં સ ગત્વા પાવનં મહત્ ॥
તપસ્તેપે વયોંઽતે ચ ધ્યાયમાનો મહેશ્વરમ્

સંસ્થાપ્ય સુમહલ્લિંગં પ્રાસાદે રત્નમંડિતે ॥
બલિપૂજોપહારાદ્યૈઃ પુષ્પધૂપાનુલેપનૈઃ

તતસ્તસ્ય મહાદેવઃ સ્વયમેવ મહેશ્વરઃ ॥
પ્રત્યક્ષોઽભૂદ્વૃષારૂઢો ગૌર્યા સહ તથા ગણૈઃ

ઉવાચ વરદોઽસ્મીતિ પ્રાર્થયસ્વ યથેપ્સિતમ્ ॥
સર્વં તેઽહં પ્રદાસ્યામિ યદ્યપિ સ્યાત્સુદુર્લભમ્

॥
ધુન્ધુમાર ઉવાચ ॥ ॥
યદિ દેયો વરોઽસ્માકં ત્વયા સર્વસુરેશ્વર ॥
સંનિધાનં પ્રકર્તવ્યં લિંગેઽસ્મિન્વૃષભધ્વજ

॥ શ્રીભગવાનુવાચ ॥ ॥
ચૈત્રે શુક્લચતુર્દશ્યાં સાંનિધ્યં નૃપસત્તમ ॥
અહં સદા કરિષ્યામિ ગૌર્યા સાર્ધં ન સંશયઃ

તત્ર વાપ્યાં નરઃ સ્નાત્વા યો માં સંપૂજયિષ્યતિ ॥
લિંગેઽસ્મિન્સંસ્થિતં ભૂપ મમ લોકં સ યાસ્યતિ

॥ સૂત ઉવાચ ॥ ॥
એવમુક્ત્વા સ ભગવાંસ્તતશ્ચાદર્શનં ગતઃ ॥
સોઽપિ રાજા પ્રહૃષ્ટા ત્મા સ્થિતસ્તત્રૈવ મુક્તિભાક્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે ધુન્ધુમારેશ્વરમાહાત્મ્યવર્ણનંનામાષ્ટાત્રિંશો અધ્યાયઃ