Skanda Purana · Chapter 6.36

// ṛṣaya ūcuḥ // //
citreśvaramidaṃ pīṭhamagastyamuninirmitam //
yatpramāṇaṃ yatprabhāvaṃ tadasmākaṃ prakīrtaya

// sūta uvāca // //
tasya pīṭhasya māhātmyaṃ vaktuṃ no śakyate dvijāḥ //
sahasreṇāpi varṣāṇāṃ mukhānāmayutairapi

tatra siddhimanuprāptāḥ śataśo'tha sahasraśaḥ //
anudhyānasamāyuktā yoginaḥ śaṃsitavratāḥ

anyapīṭheṣu yā siddhirvarṣānuṣṭhānato bhavet //
dinenaikena tāṃ siddhiṃ labhaṃte yogino dhruvam

yastatrātha rvaṇānmaṃtrāñjapecchraddhāsamanvitaḥ //
teṣāmarthodbhavaṃ kṛtsnaṃ phalaṃ prāpnoti sa dhruvam

putrakāmo narastatra puṃliṃgānyo japennaraḥ //
sa labhetepsitānputrānyadyapi syājjarānvitaḥ

garbhopaniṣadaṃ tatra putrakāmo japennaraḥ //
api vandhyāprasaṃgena syātsa putrasamanvitaḥ

śatrulokavināśāya yo japecchatarudriyam //
tasminpīṭhe'rayastasya sadyo gacchaṃti saṃkṣayam ०/ ८ //
bhūtapretapiśācādirakṣārthaṃ tatra mānavaḥ //
yo japedvāmadevyaṃ ca sa syāddhi nirupadravaḥ

ko'dāditi narastatra kanyārthaṃ yo japedṛcam //
yāṃ kanyāṃ dhyāyamānastu sa tāṃ prāpnotyasaṃśayam

yo bhūpālaprasādārthamimaṃ devā niśaṃ japet //
nirargalaḥ prasādaḥ syāttasya pārthivasaṃbhavaḥ

svastrīsnehakṛteyastu taṃ patnībhiriti dvijāḥ ///
japedbhāryā bhavetsādhvī tasya sā snehavatsalā

yo lokānugrahārthāya japedaditirityapi //
tasya lokānurāgaḥ syātsalābhaśca viśeṣataḥ //

vittārthī yo japettatra śrīsūktaṃ manujo dvijāḥ //
sarvatastasya vittāni samāgacchaṃtyanekaśaḥ // १४ /
bhūmīti yo japetsāma bhūmyarthaṃ tatra mānavaḥ //
sa bhavedbhūpatirnūnaṃ nīcajātirapi dhruvam ///५//
japedrathaṃtaraṃ sāma yānārthaṃ tatra yo naraḥ //
sa prāpnoti hi yānāni śīghragāni śubhāni ca

gajārthī yo japettatra gaṇānāṃ dvijasattamāḥ //
sa prāpnoti gajānmartyo madaplāvitabhūtalān

na tadrakṣeti yo mantraṃ japedra kṣākṛte naraḥ //
tasya syātsarvato rakṣā sameṣu viṣameṣu ca

saptarṣaya iti śreṣṭhāṃ yo japettu samāhitaḥ //
ṛcaṃ rogavināśāya sa rogaiḥ pari mucyate

yadubhī yo japettatra grahapīḍārdito janaḥ //
sānukūlā grahāstasya prabhavaṃti na saṃśayaḥ

bhūtapīḍārdito yaśca bṛhatsāma japennaraḥ //
pitṛvajjāyate tasya sa bhūto'pyaṃtako'pi cet

yātrāsiddhikṛte yaśca japetsūktaṃ ca śākunam //
tasya saṃsidhyate yātrā yadyapi syādakiṃcanaḥ

sarpanāśāya yastatra sārpasūktaṃ japennaraḥ //
na tasya maṃdire sarpāḥ praviśaṃti kathaṃcana

viṣanāśāya yastatra japecchra ddhāsamanvitaḥ //
uttiṣṭheti viṣaṃ sadyastasya nāśaṃ prayāsyati

sthāvarajagamaṃ vāpi kṛtrimaṃ yadi vā viṣam //
tasya nāmnā viniryāti tamaḥ sūryodaye yathā

vyāghrasāma japedyastu tatra śraddhāsamanvitaḥ //
tasya vyāghrādayo vyālā jāyaṃte saumyacetasaḥ

kṛṣikarmaprasi ddhyarthaṃ yo japellāṃgalāni ca //
vṛṣṭihīne'pi loke'sminkṛṣistasya prasidhyati

ītināśāya tatraiva japeddevavrataṃ naraḥ //
tataḥ saṃkīrttanā deva ītayo yāṃti saṃkṣayam

anāvṛṣṭihate loke paṃceṃdraṃ tatra yo japet //
tasya hastakṛte home tanmaṃtraiḥ syājjalāgamaḥ

daṃṣṭrābhyā miti yastatra naraścaurārditaḥ paṭhet //
nopadravo bhavettasya kadāciccaurasaṃbhavaḥ

vivādārthaṃ japedyastu saṃsṛṣṭamiti tatra ca //
vivāde vijaya stasya pāpasyāpi prajāyate

yo ripūccāṭanārthāya naro rudraśiro japet //
tasya te ripavo yāṃti deśaṃ tyaktvā kubuddhitaḥ

mohanāya ripūṇāṃ ca yo japedviṣṇusaṃhitām //
tasya mohābhibhūtāste jāyaṃte ripavo dhruvam

vaśīkaraṇahetoryaḥ kūṣmāṃḍīḥ prajapennaraḥ //
śatravo'pi vaśe tasya kiṃ punaḥ pramadādayaḥ

yaḥ staṃbhāya ripūṇāṃ vai prājāpatyaṃ ca vāruṇam //
maṃtraṃ japeddvijaśreṣṭhāḥ samyakchraddhāparāyaṇaḥ //
maṃtrasaṃstaṃbhitāstasya jāyaṃte sarvaśatravaḥ

japetkālī karālīti yaḥ śoṣāya naro dvijāḥ //
sa śoṣayati tatkṛtsnaṃ yaccitte dhārayennaraḥ

eṣa maṃtrastadā japto hyagastyena mahātmanā//
yatprabhāvānnadīnāthastena saṃśoṣito dhruvam

etatprabhāvaṃ yatpīṭhaṃ maṃtrāṇāṃ siddhikārakam//
aihikānāṃ phalānāṃ ca tanmayā vaḥ prakīrtitam

yo vāṃchati punaḥ svargaṃ sa tatra dvijasattamāḥ //
snānaṃ karotu dānaṃ ca śrāddhaṃ cāpi viśeṣataḥ

atha vāṃchati yo mokṣaṃ virakto bhavasāgarāt //
niṣkāmastatra saṃtuṣṭastapastapyetsubuddhimān

// ṛṣaya ūcuḥ // //
maṃtrajāpyasya māhātmyaṃ yattvayā naḥ prakīrtitam//
tatkathaṃ siddhimāyāti maṃtrajāpyaṃ hi sūtaja

// sūta uvāca // //
atra tatkathayiṣyāmi yanmayā pitṛtaḥ śrutam //
vadato brāhmaṇeṃdrasya purā durvāsaso muneḥ

tena pūrvaṃ pitā'smākaṃ pṛṣṭo durvāsasā dvijāḥ //
maṃtravādakṛte yacca śṛṇudhvaṃ susamāhitāḥ

//
// durvāsā uvāca // //
sādhayiṣyāmyahaṃ mantramabhīṣṭaṃ kamapi vratī //
tasya siddhikṛte brūhi vidhānaṃ śāstrasaṃbhavam

// lomaharṣaṇa uvāca // //
maṃtrāṇāṃ sādhanaṃ kaṣṭaṃ sarveṣāmapi sanmune //
pratyavāyasamopetaṃ bahucchidrasamākulam

tasmānmaṃtrakṛte siddhiṃ yadi tvaṃ vāṃchasi dvija//
camatkārapure kṣetre tatra tvaṃ gaṃtumarhasi

tatra citreśvarīpīṭhamagastyena vinirmitam //
sadyaḥ siddhikaraṃ proktaṃ mantrāṇāṃ hṛdi vartinām

na tatra jāyate chidraṃ pratyavāyo na ca dvija //
nāsiddhirvaradānena sarveṣāṃ tridivaukasām

cāturyuṃgyaṃ hi tatpīṭhaṃ sthitānāṃ siddhimāha ret //
yugānurūpataḥ sadyastato vakṣyāmyahaṃ dvija

yo yaṃ sādhayituṃ mantramicchati dvijasattama //
sa tasya pūrvamevātha lakṣamekaṃ japennaraḥ //

tato bhavati saṃsiddho maṃtrārhaḥ sa naraḥ śuciḥ //
japedbrāhmaṇaśārdūla tato lakṣacatuṣṭayam //
daśāṃśena tu homaḥ syātsusamiddhe hutāśane //

tatastu jāyate siddhirnūnaṃ tanmaṃtrasaṃbhavā //
tatra saumyeṣu kṛtyeṣu homaḥ siddhārthakaiḥ sitaiḥ

jātīpuṣpaiśca viprendra smṛto brāhmaṇa bhojanaiḥ //
tathā raudreṣu kṛtyeṣu raktapuṣpaiḥ saguggulaiḥ ०//
tarpaṇaiḥ kanyakānāṃ ca homaḥ syātsa phalapradaḥ

etatkṛtayuge proktaṃ maṃtrasādhanamutta mam //
sarveṣāṃ sādhakānāṃ ca mayā proktaṃ dvijottama

etattretāyuge proktaṃ pādonaṃ mantrasādhanam //
yugmārdhaṃ dvāpare kāryaṃ caturthāṃśaṃ kalau yuge

evaṃ tatra samāsādya siddhiṃ maṃtrasamudbhavām //
tatra pīṭhe tataḥ kṛtyaṃ sādhayetsvecchayā naraḥ

śāpānugrahasāmarthyasaṃyutasteja sā'nvitaḥ //
ajeyaḥ sarvabhūtānāṃ sādhūnāṃ saṃmatastathā

// sūta uvāca // //
tacchrutvā sa munistasya piturmama vaco'khilam //
tataścitreśvaraṃ pīṭhaṃ samāyāto'tha sanmuniḥ

tatra saṃsādhayāmāsa sarvānmaṃtrānyathākramam //
vidhinā śāstradṛṣṭena śraddhayā parayā yutaḥ

iti saṃsiddhamaṃtraḥ sa camatkārapuraṃ gataḥ //
viprāṇāṃ prārthanārthāya bhūmikhaṃḍakṛte dvijāḥ

iti śrīskāṃde mahapurāṇa ekāśītisāhasryāṃ saṃhitāyāṃ ṣaṣṭhe nāgarakhaṃḍe hāṭakeśvarakṣetramāhātmye citreśvarīpīṭhamāhātmyavarṇanaṃnāma ṣaṭtriṃśattamo'dhyāyaḥ