Skanda Purana · Chapter 6.35

// sūta uvāca // //
evaṃ teṣu prabhagneṣu hateṣu ca surottamāḥ //
prahṛṣṭamanasaḥ sarve stutvā devaṃ maheśvaram

tenaiva cātha nirmuktāḥ praṇamya ca muhurmuhuḥ //
svaṃsvaṃ sthānamathājagmuḥ śakraviṣṇupuraḥsarāḥ

te'pi dānavaśārdūlā hatāśāśca surottamaiḥ //
maṃtraṃ pracakrire sarve nāśāya tridivaukasām

teṣāṃ maṃtrayatāmeṣa niścayaḥ samapadyata //
nānyatra dharmavidhvaṃsāddevānāṃ jāyate kṣayaḥ

tasmāttapasvino yai ca ye ca yajñaparāyaṇāḥ //
tathānye niratā dharme nihantavyā niśāgame

evaṃ te niścayaṃ kṛtvā niṣkramya varuṇālayāt //
rātrau sadaiva nighnaṃti janāndharmaparāyaṇān

yatra yatra bhavedyajñaḥ satraṃ 'pyutsavo'thavā //
tatra gatvā niśāyoge prakurvaṃti janakṣayam

taiḥ prasūtā makhā dhvastā dīkṣitā vinipātitāḥ //
ṛtvijaśca tathānye'pi sāmānyā dvijasattamāḥ // ८- //
āśrame munimukhyasya śāṃḍilyasya mahātmanaḥ //
sahasraṃ brāhmaṇeṃdrāṇāṃ bhakṣitaṃ tairdurātmabhiḥ.

śatāni ca sahasrāṇi nihatāni dvijanmanām //
viśvāmitrasya pañcaiva saptātreścaiva dhīmataḥ

etasminneva kāle tu samastaṃ dharaṇītalam //
naṣṭayajñotsavaṃ jātaṃ kāleyabhayapīḍitam

na kaścicchayanaṃ rātrau prakaroti mahī tale //
dhṛtāyudhā janāḥ sarve tiṣṭhaṃti saha tāpasaiḥ

rātrau svapaṃti ye kecidviśvastā dharmabhājanāḥ //
teṣāmasthīni dṛśyaṃte prātareva hi kevalam

atha devagaṇāḥ sarve yajñabhāgavinākṛtāḥ //
prajagmuḥ paramāmārti brahmaviṣṇupurassarāḥ

tato gatvā samudrāṃtaṃ vadhāya suravidviṣām //
na śekurviṣamasthāṃstānmanasāpi pradharṣitum

tataḥ samudranāśāya maṃtraṃ cakruḥ suduḥkhitāḥ //
tasminnaṣṭe bhavantyeva vadhyā dānavasattamāḥ

agastyena vinā naiṣa śoṣaṃ yāsyati sāgaraḥ //
tasmātsaṃprārthayāmotra kṛtye gatvā munīśvaram

camatkārapure kṣetre sa tiṣṭhati ca sanmuniḥ //
tasmāttatraiva gacchāmo yena gacchati satvaram

evaṃ niścitya te sarve tridaśāstasya cāśramam //
saṃprāptā munimukhyasya mitrāvaruṇa janmanaḥ

so'pi sarvānsamālokya saṃprāptānsurasattamān //
prahṛṣṭaḥ sammukhastūrṇaṃ jagāmātīva sanmuniḥ

provāca prāṃjalirvākyaṃ harṣa gadgadayā girā //
brahmādīṃstānsurāndṛṣṭvā vismayotphullalocanaḥ

camatkārapuraṃ kṣetrametanmedhyamapi sthitam //
bhūyo medhyataraṃ jātaṃ yuṣmākaṃ hi samāśrayāt

tasmādvadata yatkṛtyaṃ mayā saṃsiddhyate'dhunā //
tatsarvaṃ prakariṣyāmi yadyapi syātsuduṣkaram

// devā ūcuḥ // //
kāleyā iti daityā ye hataśeṣāḥ suraiḥ kṛtāḥ //
te samudraṃ samāśritya nighnaṃti śubhakāriṇaḥ

śubhe nāśamanuprāpte dhruvaṃ nāśo divaukasām //
tasmātteṣāṃ vadhārthāya tvaṃ śoṣaya mahārṇavam

yena te gocaraṃ prāptā dṛṣṭerdānavasattamāḥ //
badhyaṃte vibudhaiḥ sarve jāyaṃte ca makhā iha

//
// agastya uvāca // //
ahaṃ saṃvatsarasyāṃte śoṣayiṣyāmi sāgaram //
vidyābalaṃ samāśritya yoginīnāṃ surottamāḥ

tasmādvrajata harmyāṇi yūyaṃ yāti hi vatsaram //
yāvadbhūyo'pi varṣāṃte kāryamāgamanaṃ dhruvam

tato mayā samaṃ gatvā śoṣite varuṇālaye //
haṃtavyā dānavā duṣṭā hanta yaiḥ pīḍyate jagat

tato devagaṇāḥ sarve gatāḥ svesve niketane //
agastyo'pi samudyogaṃ cakre vidyāsamudbhavam

tataḥ sarvāṇi pīṭhāni yāni saṃti dharātale //
tāni tatrānayāmāsa maṃtraśaktyā mahāmuniḥ

aṣṭamyāṃ ca caturdaśyāṃ teṣu saṃpūjya bhaktitaḥ //
yoginīnāṃ ca vṛndāni kanyakānāṃ viśeṣataḥ

vidyāṃ viśoṣiṇīnāma samārādhayata dvijaḥ //
pūjayitvā diśāṃ pālānkṣetrapālānapi dvijaḥ //
ākāśacāriṇīṃ caiva devatāṃ śraddhayā dvijaḥ

tataḥ saṃvatsarasyāṃte prasannā tasya devatā //
provāca vada yatkṛtyaṃ siddhāhaṃ tava sanmune //

// agastya uvāca // //
yadi devi prasannā me tadāsyaṃ viśa satvaram //
yena saṃśoṣayāmyāśu samudraṃ devi vāgyataḥ

sā tatheti pratijñāya praviṣṭā satvaraṃ mukhe //
saṃśoṣaṇī mahāvidyā tasyarṣerbhāvitātmanaḥ

etasminnaṃtare prāptāḥ sarve devāḥ savāsavāḥ //
dhṛtāyudhakarā hṛṣṭāḥ saṃnaddhā yuddhahetave

tataḥ saṃprasthito vipro devaiḥ sarvaiḥ samāhitaḥ //
vārirāśiṃ samuddiśya saṃśuṣkavadanastadā

atha gatvā samudrāṃtaṃ stūyamāno divālayaiḥ //
pipāsākulito'tīva sarvāndevānuvāca ha

eṣo'haṃ sāgaraṃ sadyaḥ śoṣayiṣyāmi sāṃpratam //
yūyaṃ bhavata sodyogā vadhāya suravidviṣām

// sūta uvāca // //
evamuktvā muniḥ so'tha matsyakacchapasaṃkulam//
helayā prapapau kṛtsnaṃ grāhaiḥ kīrṇaṃ mahārṇavam

tataḥ sthalopame jāte te daityāḥ surasattamaiḥ //
vadhyante niśitairbāṇaiḥ samantādvijigīṣubhiḥ

atha kṛtvā mahadyuddhaṃ yathā śaktyātidāruṇam //
hatabhūyiṣṭhaśeṣā ye bhittvā bhūmiṃ gatā adhaḥ

tataḥ procuḥ surāḥ sarve stutvā taṃ munisattamam //
parityaja jalaṃ bhūyaḥ pūraṇārthaṃ mahodadheḥ

naiṣā vasumatī vipra samudreṇa vinākṛtā //
rājate vastusaṃtyaktā yathā nārī vibhūṣitā

// agastya uvāca // ///
yā mayā''rādhitā vidyā varṣaṃyāvatpraśoṣaṇī //
tayā pītamidaṃ toyaṃ pariṇāmagataṃ tathā

eṣa yāsyati vai pūrtiṃ bhūyo'pi varuṇālayaḥ //
khātaścāgādhatāṃ prāpto gaṃgātoyaiḥ sunirmalaiḥ

sagaronāma bhūpālo bhaviṣyati mahītale //
tatputrāḥ ṣaṣṭisāhasrāḥ khaniṣyaṃti na saṃśayaḥ

tasyaivānvayavānrājā bhaviṣyati bhagīrathaḥ //
sa jñātikāraṇādgaṃgāṃ brahmāṃḍādānayiṣyati

pravāheṇa tatastasyāḥ samaṃtādaṃbhasāṃnidhiḥ //
bhaviṣyati susaṃpūrṇaḥ satyametanmayoditam

// devā ūcuḥ // //
devakṛtyaṃ muniśreṣṭha bhavatā hyupapāditam //
tasmātprārthaya cittasthaṃ varaṃ sarvaṃ munīśvara

// agastya uvāca // //
camatkārapure kṣetre mayā pīṭhānyaśeṣataḥ //
ānītāni prabhāvena maṃtrāṇāṃ surasattamāḥ

tasmātteṣāṃ sadā vāsastatraivāstu prabhāvataḥ //
sarvāsāṃ yoginīnāṃ ca mātṝṇāṃ ca viśeṣataḥ

aṣṭamyāṃ ca caturdaśyāṃ tāni yaḥ śraddhayā'nvitaḥ //
pūjayiṣyati tasya syātsamastaṃ manasepsitam

// devā ūcuḥ // //
yasmāccitrāṇi pīṭhāni tvayānītāni tatra hi //
tasmāccitreśvaraṃ nāma pīṭhamekaṃ bhaviṣyati

yo yaṃ kāmamabhidhyāya tatra pūjāṃ kariṣyati //
yoginīnāṃ ca vidyānāṃ mātṝṇāṃ ca viśeṣataḥ

taṃtaṃ kāmaṃ naraḥ śīghraṃ saṃprāpsyati mahāmune //
asmākaṃ varadānena yadyapi syātsupāpakṛt

evamuktvā surāḥ sarve tamāmantrya munīśvaram //
gatāstriviṣṭapaṃ hṛṣṭāḥ so'pyagastyaḥ svamāśramam

// sūta uvāca // //
etadvaḥ sarvamākhyātaṃ yathā sa payasāṃnidhiḥ //
agastyena purā pīto devakāryaprasiddhaye

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'gastyakṛtasamudra prāśanavṛttāṃte'gastyāhūtapīṭhasamūhasya devaiścitreśvarapīṭhanāmapūrvakavarapradānavarṇanaṃnāma pañcatriṃśattamo'dhyāyaḥ