Skanda Purana · Chapter 6.34

// ṛṣaya ūcuḥ // //
yadetadbhavatā proktaṃ taṃ muniṃ prati sūtaja //
tvayā purā surārthāya prapītaḥ payasāṃnidhiḥ

tattvaṃ sūtaja no brūhi vistareṇa mahāmate //
yathā tena purā pīto muninā payasāṃnidhiḥ

// sūta uvāca // //
kāleyā iti vikhyātāḥ purā dānavasattamāḥ //
saṃbhūtāḥ sarvadevānāṃ vīryotsāhapraṇāśakāḥ

tatastaiḥ pīḍitaṃ dṛṣṭvā viṣṇunā prabhaviṣṇunā //
trailokyaṃ śaktiyogena prokto devo maheśvaraḥ

etadīśāna daiteyaistrailokyaṃ paripīḍitam//
kālikeyairmahāvīryestasmātkāryo mahāhavaḥ//
adyaiva taiḥ samaṃ deva samāsādya dharātalam

tato viṣṇuśca rudraśca sahasrākṣaḥ suraiḥ saha //
śitaśastradharāḥ sarve saṃprāptā dharaṇītalam

atha te dānavāḥ sarve śrutvā devānsa- māgatān //
yuddhārthaṃ sahasā jagmuḥ saṃmukhāḥ kopasaṃyutāḥ

tato'bhavanmahāyuddhaṃ devānāṃ dānavaiḥ saha //
trailokyaṃ kaṃpitaṃ yena samastaṃ bhaya vihvalam

atha kālaprabhonāma dānavo balagarvitaḥ //
sa śakraṃ purato dṛṣṭvā vajrocchritakaraṃ sthitam//
provāca prahasanvākyaṃ meghagambhīraniḥsvanaḥ

muṃca vajra sahasrākṣa paśyāmi tava pauruṣam //
cirātprāpto'si me dṛṣṭiṃ diṣṭyā tvaṃ tridiveśvaraḥ

tataścikṣepa saṃkruddhastasya vajraṃ śatakratuḥ //
so'pi tallīlayā dhṛtvā jagṛhe savyapāṇinā

tataḥ śakraṃ samuddiśya gadāṃ gurvīṃ mumoca saḥ //
sarvāyasamayīṃ raudrāṃ yamajihvāmivāparām

tayā hataḥ sahasrākṣo visaṃjño rudhiraplutaḥ //
dhvajayaṣṭiṃ samāśritya saṃniviṣṭo rathopari

atha taṃ mātalirdṛṣṭvā visaṃjñaṃ valaghātinam//
prāṅmukhaṃ ca rathaṃ cakre saṃsmaransārathernayam

tataḥ parāṅmukhībhūte rathe śakrasya saṃgare //
dudruvurbhayasaṃtrastāḥ sarve devāḥ samaṃtataḥ

ādityā vasavo rudrā viśvedevā marudgaṇāḥ //
vrīḍāṃ vihāya vidhvastāḥ pṛṣṭhadeśe śitaiḥ śaraiḥ

atha bhagnaṃ balaṃ dṛṣṭvā dānavairmadhusūdanaḥ //
āruhya garuḍaṃ tūrṇaṃ kālaprabhamupādravat

tataste dānavāḥ sarve parivārya śitaiḥ śaraiḥ //
samyagācchādayāmāsurgarjamānā muhurmuhuḥ///८ //
sa tairācchādito viṣṇuḥ śuśubhe ca samaṃtataḥ //
samyakpulakitāṃgaśca raktācala ivāparaḥ

tataḥ śārṅgavinirmuktaiḥ śaraiḥ kaṃkapatatribhiḥ //
chedayitveṣujālāni daiteyānnijaghāna saḥ

tato daityagaṇāḥ sarve hanyamānā surāriṇā //
trātāraṃ nābhyagacchaṃta mṛgāḥ siṃhārditā iva

etasminnaṃtare daityaḥ kālakhaṃja iti smṛtaḥ//
sa kopavaśamāpanno vāsudevamupādravat

sa hatvā pañcabhirbāṇairvāsudevaṃ śilā śitaiḥ //
jaghāna garuḍaṃ kruddho daśabhirnataparvabhiḥ

tataḥ sudarśanaṃ cakraṃ tasya daityasya mādhavaḥ /]
pramumoca vadhārthāya jvālāmālāsamāvṛtam

so'pi taccakramālokya vāsudevakarāccyutam //
āgacchaṃtaṃ prasāryāsyaṃ grastuṃ tatsaṃmukho yayau

agrasacca mahādaityastiṣṭhatiṣṭheti cābravīt //
vāsudevaṃ samuddiśya tataścikṣepa sāyakān

tataścakrī sa daityena grastacakreṇa tāḍitaḥ //
suparṇena samāyukto jagāma viṣamāṃ vyathām

etasminnaṃtare kruddho bhagavāṃstripurāṃtakaḥ //
dṛṣṭvā hariṃ tathābhūtaṃ śakraṃ cāpi parāṅmukham

tataḥ śūlaprahāreṇa taṃ nihatya danoḥ sutam //
śaraiḥ pinākanirmuktairjaghānoccaistathā parān

kālaprabhaṃ prakālaṃ ca kālāsyaṃ kālavigraham //
jaghāna bhagavāñchaṃbhustathānyānapi nāyakān

tataḥ pradhānāste sarve dānavā apidāruṇāḥ //
palāyanaparā jātā nirutsāhā dviṣajjaye

tataḥ śakraśca viṣṇuśca labdhasaṃjñau dhṛtāyudhau //
ślāghayaṃtau mahādevaṃ saṃsthitau raṇamūrdhani

etasminnaṃtare bhagnānsamudvīkṣya danoḥ sutān //
jaghnuḥ śaraśataiḥ śastraiḥ sarve devāḥ savāsavāḥ

atha te hatabhūyiṣṭhā dānavā balavattarāḥ //
hanyamānāḥ śitairbāṇaistridaśairjitakāśibhiḥ

agamyaṃ manasā teṣāṃ praviṣṭā varuṇālayam //
śastraiśca kṣatasarvāṃgā hatanāthāḥ suduḥkhitāḥ

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramā hātmye'gastyāśramamāhātmye'gastyakṛtasamudraprāśanavṛttānte devāsurasaṃgrāmavarṇanaṃnāma catustriṃśo'dhyāyaḥ