Skanda Purana · Chapter 6.33

// sūta uvāca // //
agastyasyāśramo'nyosti tathā tatra dvijottamāḥ //
yatra tiṣṭhati viśvātmā svayaṃ devo maheśvaraḥ

śuklapakṣe caturdaśyāṃ caitramāse divākaraḥ //
svayamabhyetya deveśaṃ pūjayatyeva śaṃkaram

tasmādanyo'pi yastasyāṃ bhaktyā cāgatya śaṃkaram //
tameva pūjayedbhaktyā sa yāti devamandiram //

yastatra kurute śrāddhaṃ samyakchraddhāsamanvitaḥ //
pitarastasya tṛpyaṃte pitṛmedhe kṛte yathā

// ṛṣaya ūcuḥ // //
agastyasyāśramaṃ prāpya kasmāddevo divākaraḥ //
pradakṣiṇāṃ prakurute vadaitanme suvistaram

// sūta uvāca // //
kathayāmi kathāmetāṃ śṛṇuta dvija sattamāḥ //
asti viṃdhya iti khyātaḥ parvataḥ pṛthivītale

yasya vṛkṣāgraśākhāyāṃ saṃlagnāstaraṇeḥ karāḥ //
puṣpapūgā ivādhaḥsthairlakṣyaṃte mugdhasi ddhakaiḥ

anabhijñāstamisrasya yasya sānunivāsinaḥ //
ratnaprabhāpraṇunnasya kṛṣṇapakṣaniśāsvapi

yasya sānuṣu muṃcaṃto bhāṃti puṣpāṇi pādapāḥ //
vāyuvegavaśānnūnaṃ nīraugha nīradā iva

yasminnānāmṛgā bhāṃti dhāvamānā itastataḥ //
kalatraputrapuṣṭyarthaṃ lobhārthaṃ mānavā iva //

niryāsacchadmanā bāṣpaṃ vāsitāśeṣadiṅmukham //
muñcaṃti taravo yatra dantidantakṣatatvacaḥ

cīrikāvirutairdīrghai rudaṃta iva cāpare //
hastihastahatā vṛkṣā manyante yasya sānuṣu

itaścetaśca gacchadbhirnirjharāṃbhobhirāvṛtaḥ //
śuśubhe sitavastrāḍhyaiḥ pumāniva vibhūṣitaḥ //

yasya sparddhā samutpannā pūrvaṃ saha sumeruṇā //
tataḥ prāha sahasrāṃśuṃ gatvā sa krodhamūrcchitaḥ

kasmādbhāskara merostvaṃ prakaroṣi pradakṣiṇām //
kulaparvatasaṃjñe'pi na karoṣi kathaṃ mayi

// bhāskara uvāca // //
na vayaṃ śraddhayā tasya gireḥ kurmaḥ pradakṣiṇām //
eṣa me vihitaḥ panthā yenedaṃ vihitaṃ jagat

tasya tuṃgāni śṛṃgāṇi vyāpya khaṃ saṃśritāni ca //
tena saṃjāyate tasya balādeva prada kṣiṇā

etacchrutvā viśeṣeṇa saṃkruddho viṃdhyaparvataḥ //
provāca paśya bhāno tvaṃ tarhi tuṃgatvamadya me //
rurodhātha nabhomārgaṃ yena gacchati bhāskaraḥ

atha ruddhaṃ samālokya mārgaṃ vāsaranāyakaḥ //
cintayāmāsa citte sve sāṃprataṃ kiṃ karomyaham

karomi yadyahaṃ cāsya parvatasya pradakṣiṇām //
tadbhaviṣyati kālasya calanaṃ bhuvanatraye

māsartubhuvanānāṃ ca tathā bhāvī viparyayaḥ //
agniṣṭomādikāḥ sarvāḥ kriyā yāsyaṃti saṃkṣayam //
naṣṭayajñotsave loke devānāṃ syānmahāvyathā

evaṃ saṃcintya cittena bahudhā tīkṣṇadīdhitiḥ //
jagāma manasā bhītaḥ so'gastyaṃ munipuṃgavam

nānyosti vāraṇe śakto viṃdhasyāsya hi taṃ vinā //
agastyaṃ brāhmaṇaśreṣṭhaṃ mitrāvaruṇasaṃbhavam

tato dvijamayaṃ rūpaṃ sa kṛtvā tīkṣṇadīdhitiḥ //
camatkārapurakṣetre tasyāśramapadaṃ yayau

tatastu vaiśvadevāṃte vedoccāraparāyaṇaḥ //
provāca so'tithiḥ prāptastavāhaṃ munisattama

tato'gastyaḥ kṛtānandaḥ svāgataṃ te mahāmune //
manoratha ivādhyāto yo'gnikāryāṃta āgataḥ

tattvaṃ brūhi muniśreṣṭha yaddadāmi tavepsitam //
adeyaṃ nāsti me kiñcitkāle'sminprārthitasya ca

// bhāskara uvāca // //
ahaṃ bhāskara āyāto viprarūpeṇa sanmune //
sarvakāryakṣamaṃ matvā tvāmekaṃ bhuvanatraye

tvayā pūrvaṃ surārthāya prapītaḥ payasāṃnidhiḥ //
vātāpiśca tathā daityo bhakṣito dvijakaṇṭakaḥ

tasmādgatirbhavāsmākaṃ sāṃprataṃ munisattama //
devānāmiha varṇānāṃ tvameva śaraṇaṃ yataḥ

// sūta uvāca // //
tacchrutvā sa munirviprā viśeṣeṇa praharṣitaḥ //
arghyaṃ dattvā dineśāya tataḥ provāca sādaram

dhanyo'smyanugṛhītosmi yanme tvaṃ gṛhamāgataḥ //
tasmādbrūhi kariṣyāmi tava vākyamakhaṃḍitam

// bhāskara uvāca // //
eṣa viṃdhyācalo'smākaṃ mārgamāvṛtya saṃsthitaḥ // /
sparddhayā girimukhyasya sumerormunisatama

sāmādyairvividhopāyaistasmādenaṃ nivāraya //
kālātyayo yathā na syādgaterbhaṃgastathā kuru

/ //
// agastya uvāca // //
ahaṃ te vārayiṣyāmi vardhamānaṃ kulācalam //
svasthānaṃ gaccha tasmāttvaṃ sukhībhava divākara

tataḥ sa preṣitaste na bhāskarastīkṣṇadīdhitiḥ //
svaṃ sthānaṃ prayayau hṛṣṭastamāmaṃtrya munīśvaram

agastyo'pi drutaṃ gatvā viṃdhyaṃ provāca sādaram //
nyūnatāṃ vraja madvākyācchīghraṃ parvatasattama

dākṣiṇātyeṣu tīrtheṣu snāne jātādya me matiḥ //
tavāyattā gire saiva tatkuruṣva yathocitam

sa tasya vacanaṃ śrutvā viṃdhyaḥ parvatasattamaḥ //
abhajannimnatāṃ sadyo vinayena samanvitaḥ

agastyo'pi samāsādya tasyāṃtaṃ dakṣiṇaṃ dvijāḥ//
tvayaivaṃ saṃsthitenātha() sthātavyamityuvāca tam

yāvadāgamanaṃ mahyaṃ nātra kāryā vicāraṇā //
no cecchāpaṃ pradāsyāmi yena saṃyāsyasi kṣayam

/
sa tatheti pratijñāya śāpādbhīto nagottamaḥ//
na jagāma punarvṛddhiṃ tasyāgamanavāṃchayā

so'pi tenaivamārgeṇa nivṛttiṃ na karoti ca//
yāvadadyāpi vipreṃdrā dakṣiṇāṃ diśamāśrita taḥ

atha tatraiva cānīya lopāmudrāṃ munīśvaraḥ //
samāhūya sahasrāṃśuṃ tataḥ provāca sādaram

tava vākyānmayā tyaktaḥ svāśramastīkṣṇadī dhite //
tavārthe ca na gaṃtavyaṃ bhūyastatra kathaṃcana

tasmānmadvacanādbhāno caturdaśyāṃ madhau site //
yanmayā sthāpitaṃ tatra liṃgaṃ pūjyaṃ hi tattva yā

// bhāskara uvāca // //
evaṃ mune kariṣyāmi tava vākyādasaṃśayam //
pūjayiṣyāmi talliṃgaṃ varṣāṃte svayameva hi

yo'nyo hi taddine liṃgaṃ pūjayiṣyati mānavaḥ //
mama lokaṃ samāsādya sa bhaviṣyati muktibhāk

// sūta uvāca // //
etasmātkāraṇāttatra bhagavāṃstīkṣṇadīdhitiḥ //
caitraśuklacaturdaśyāṃ sāṃnidhyaṃ kurute sadā

etadvaḥ sarvamākhyātaṃ yatpṛṣṭosmi dvijottamāḥ //
bhūyo vadata vai kaścitsaṃdehaśce ddhṛdi sthitaḥ

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye 'gastyāśramamāhātmyavarṇanaṃ nāma trayastriṃśattamo'dhyāyaḥ