Skanda Purana · Chapter 6.30

// ṛṣaya ūcuḥ // //
toṣitaḥ kena siddhena tatra siddheśvaro vibhuḥ //
etatsarvaṃ samācakṣva vistarātsūtanandana

// sūta uvāca // //
āsītsiddhādhiponāma purā haṃsa iti smṛtaḥ //
anapatyatayā tasya kālaścakrāma bhūriśaḥ

tataścintā prapannaḥ sa gatvā devapurohitam //
papracchāgirasaḥ putraṃ vipraśreṣṭhaṃ bṛhaspatim

bhagavaṃścānapatyasya vārddhakaṃ me samāgatam //
tasmādapatyalābhāya mamopāyaṃ prakīrtaya

tīrthayātrāṃ vrataṃ vāpi śāṃtikaṃ vā dvijottama //
yena syātsaṃtatiḥ śīghraṃ tvatprasādādbṛhaspate

bṛhaspatiściraṃ dhyātvā siddhaṃ prāha tataḥ param //
camatkārapuraṃ kṣetraṃ gatvā tatra tapaḥ kuru

tataḥ prāpsyasi satputraṃ vaṃśoddhārakṣamaṃ śubham //
nānyaṃ paśyāmi siddheśa sutopāyaṃ śubhāvaham

tatastatkṣetramāsādya sa siddhaḥ śraddhayānvitaḥ //
liṃgaṃ saṃpūjayāmāsa yathoktavidhinā svayam

tataścārādhayāmāsa divānaktamataṃdritaḥ //
bali pūjopahāreṇa gītavādyocchrayādibhiḥ

cāṃdrāyaṇaistathā kṛcchraiḥ pārākairdvijasattamāḥ //
tathā māsopavāsaiśca toṣayāmāsa śaṃkaram

tato varṣasahasrābhyāṃ tasya tuṣṭo maheśvaraḥ //
provāca darśanaṃ gatvā vṛṣārūḍhaḥ sahomayā

haṃsādya tava tuṣṭo'haṃ tasmātprārthaya vāṃchitam //
ahaṃ te saṃpradāsyāmi duṣprāpyamapi niścitam

// haṃsa uvāca // //
apatyārthaṃ samāraṃbho mayā'dya vihitaḥ purā //
tasmāttvaṃ dehi me putrānvaṃśoddhārakṣa mānvibho

tvayā caiva sadā liṃge stheyamatra surottama //
mama vākyādasaṃdigdhaṃ sarvalokahitārthataḥ

// śrībhagavānuvāca //
adyaprabhṛti liṃgesminnāśrayo me bhaviṣyati //
tava vākyena siddheśa satyametanmayoditam ///५//
yo māmatra sthitaṃ martyaḥ pūjayiṣyati bhaktitaḥ //
tasyāhaṃ saṃpradāsyāmi cittasthaṃ sakalaṃ phalam

yo me liṃgasya yāmyāśāṃ sthitvā maṃtraṃ japiṣyati //
ṣaḍakṣaraṃ pradāsyāmi tasyāyuṣyaṃ sutānvitam ////

evamuktvā mahādevastataścādarśanaṃ gataḥ //
haṃso'pi ca gṛhaṃ gatvā putrānāpa mahodayān

tasmātsarvaprayatnena talliṃgaṃ yatnato dvijāḥ //
sparśanīyaṃ ca pūjyaṃ ca namaskāryaṃ prayatnataḥ

ṣaḍakṣareṇa mantreṇa kīrtanīyaṃ ca śaktitaḥ //
vāṃchadbhirvāṃchitānkāmāndurlabhāṃstridaśairapi

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye siddheśvarotpattivṛttāntavarṇanaṃnāma triṃśo'dhyāyaḥ //