Skanda Purana · Chapter 6.2

sūta uvāca/
tasminnutpāṭite liṃge bhūtalāddvijasattamāḥ/
pātālājjāhnavītoyaṃ tena mārgeṇa niḥsṛtam/
sarvapāpaharaṃ nṝṇāṃ sarvakāmapradāyakam

tatra svayamabhūtpūrvaṃ yattaddvijavarottamāḥ/
śṛṇudhvaṃ vadato me'dya lokavismayakārakam

triśaṃkurnāma rājeṃdraścaṃḍālatvaṃ samāgataḥ/
tatra snātaḥ punarlebhe śarīraṃ pārthivocitam

ṛṣayaḥ ūcuḥ/
caṃḍālatvaṃ kathaṃ prāptastriśaṃkurnṛpasattamaḥ/
etattvaṃ sarvamācakṣva vistarātsūtanandana

sūta uvāca/
ahaṃ vaḥ kīrtayiṣyāmi kathāmetāṃ purātanīm/
sarvapāpaharāṃ medhyāṃ triśaṃkunṛpasaṃbhavām

sūryavaṃśodbhavaḥ pūrvaṃ triśaṃkuriti viśrutaḥ/
āsītpārthivaśārdūlaḥ śārdūlasamavikramaḥ

vasiṣṭhasya muneḥ śiṣyo yajvā dānapatiḥ prabhuḥ/
teneṣṭaṃ ca makhaiḥ sarvairagniṣṭomādibhiḥ sadā

saṃpūrṇadakṣiṇaireva vatsaraṃ vatsaraṃ prati/
tathā dānāni sarvāṇi pradattāni mahātmanā

brāhmaṇebhyo viśiṣṭebhyo dīnebhyaśca viśeṣataḥ/
vratāni ca pracīrṇāni rakṣitāḥ śaraṇāgatāḥ

putravallālitā lokāḥ śatravaśca niṣūditāḥ/
bhrāṃtāni bhūtale yāni tīrthānyāyatanāni ca/
tapasvibhyo yathākāmaṃ yacchatā vāṃchitaṃ dhanam

kasyacittvatha kālasya vasiṣṭho bhagavānmuniḥ/
tena proktaḥ sabhāmadhye saṃsthito natipūrvakam

triśaṃkuruvāca/
bhagavanyaṣṭumicchāmi tena yajñena sāṃpratam/
gamyate tridivaṃ yena saśarīreṇa satvaram

tasmātkuru prasādaṃ me saṃbhārānāhara drutam/
tasya yajñasya siddhyarthaṃ yathārhānbrāhmaṇāṃstathā

vasiṣṭha uvāca/
na sa kaścitkraturyena gamyate tridivaṃ nṛpa/
anenaiva śarīreṇa satyametadbravīmyaham

agniṣṭomādayo yajñā ye proktāḥ prāksvayaṃbhuvā/
anyadehāṃtare svargaḥ prāpyate taiḥ kṛtairnṛpa

yadi vā pṛthivīpāla tvayā yajñaprabhāvataḥ/
pārthivo vā dvijo vātha vaiśyo vānyataro'pi vā

svayaṃ dṛṣṭaḥ śruto vāpi saṃjāto'tra dharātale/
svargaṃ gataḥ śarīreṇa sahitastatprakīrtaya

triśaṃkuruvāca/
nāsādhyaṃ vidyate brahmaṃstavāhaṃ vedmi tattvataḥ/
tasmātkuru prasādaṃ me yathā syānmanasepsitam

vasiṣṭha uvāca/
anṛtaṃ noktapūrvaṃ me svaireṣvapi hi jihvayā/
tasmānnāsti makhaḥ kaścitsatyaṃ tvaṃ yaṣṭumicchasi

triśaṃkuruvāca/
yadi māṃ vipraśārdūla na tvaṃ yājayituṃ kṣamaḥ/
svargapradena yajñena vapuṣānena vai vibho

tatkiṃ te tapasaḥ śaktyā brāhmaṇasya vicakṣaṇa/
aparaṃ śṛṇu me vākyaṃ yadbravīmi parisphuṭam/
śṛṇvatāṃ munivṛndānāṃ tathānyeṣāṃ dvijottama

yadi me na karoṣi tvaṃ vacanaṃ vadato'sakṛt/
tena yajñena yakṣye'haṃ tatkṛtvānyaṃ dvijaṃ gurum

sūta uvāca/
tasya tadvacanaṃ śrutvā vasiṣṭho bhagavāṃstataḥ/
tamuvāca vihasyoccaiḥ kuruṣvaivaṃ mahīpate

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetra māhātmye triśaṃkūpākhyāne triśaṃkuvasiṣṭhasaṃvādavarṇanaṃ nāma dvitīyo'dhyāyaḥ