Skanda Purana · Chapter 6.28

// sūta uvāca // //
tasyāṃ devasabhāyāṃ ca saṃsthitā ye dvijottamāḥ //
prabhāsādīni tīrthāni mūrtāni sakalāni ca

tāni śrutvā vacastasya devācāryasya tādṛśam //
bhayaṃ kṛtvā mahaccitte procuśca tridiveśvaram

yadyevaṃ devadeveśa bhaviṣya tyaśubhaṃ yugam //
vayaṃ nāśaṃ sameṣyāmo na sthāsyāmo jagattraye

puraṃdarādya cāsmākaṃ sthānaṃ kiṃcitpradarśaya //
tasmātkīrtaya naḥ sthānaṃ kiṃcitkvāpi puraṃdara

yadāśritya nayiṣyāmo raudraṃ kaliyugaṃ vibho //
aspṛṣṭāni narairmlecchaiḥ prabhāvasahitāni ca //
pātāle svargaloke vā martye vā surasattama

teṣāṃ tadvacanaṃ śrutvā kṛpāviṣṭaḥ śatakratuḥ //
provāca brāhmaṇaśreṣṭhaṃ bhūya eva bṛhaspatim

aspṛṣṭaṃ kalinā sthānaṃ kiṃci dvada bṛhaspate //
samāśrayāya tīrthānāṃ yadi vetsi jagattraye

śakrasya tadvacaḥ śrutvā ciraṃ dhyātvā vṛhaspatiḥ //
tatra provāca tīrthāni bhayā dbhītāni harṣayan

hāṭakeśvaramityuktamasti kṣetramanuttamam //
liṃgasya patanājjātaṃ devadevasya śūlinaḥ

yatra pūrvaṃ tapastaptaṃ viśvāmitreṇa dhīmatā //
triśaṃkorbhūmipālasya kṛte tīrthe mahātmanā

yatra sthitvā sabhūpālastriśaṃkuḥ pāpavarjitaḥ //
caṇḍālatvaṃ parityajya sadeha stridivaṃ gataḥ

yatra śakrasamādeśātpūritaṃ pāṃsubhiḥ purā //
saṃvartakena raudreṇa vāyunā tīrthamuttamam

yatra rakṣatyadhastācca sa svayaṃ hāṭakeśvaraḥ //
upariṣṭātpradeśaṃ ca kalau devo'caleśvaraḥ

hāṭakeśvaramāhātmyādaspṛṣṭaṃ kalinā hi tat //
paṃcakrośapramāṇena acaleśvarajena ca

tasmāsvāṃśena gacchaṃtu tatra tīrthānyaśeṣataḥ //
teṣāṃ kalibhayaṃ śakra naiva tatrāstyasaṃśayam

tacchrutvā vacanaṃ tasya sarvatīrthāni tatkṣaṇāt //
hāṭakeśvarasaṃjñaṃ tatkṣetraṃ jagmurdvijottamāḥ

yajñopavītamātrāṇi kṛtvā sthānāni cātmanaḥ //
kṣetramāsādayāmāsustatsarvahi dvijottamāḥ

etasmātkāraṇājāta kṣetraṃ puṇyatamaṃ hi tat //
hāṭakeśvaradevasya mahāpātakanāśanam

// ṛṣaya ūcuḥ // //
atyāścaryamidaṃ sūta yattvayaitadudāhṛtam //
saṃgamaṃ sarvatīrthānāṃ kṣetre tatra prakīrtitam

tāvanmātraprabhāvāṇi tatsthāni prabhavaṃti kim //
tāni tīrthāni no brūhi vistareṇa mahāmate

nāmataḥ sthānataścaiva tathā caiva prabhāvataḥ //
sarvāṇyapimahābhāga paraṃ kautūhalaṃ hi naḥ //

// sūta uvāca // //
tisraḥ koṭyo'rdhakoṭiśca tīrthānāṃ dvijasattamāḥ //
hāṭakeśvarajaṃ kṣetraṃ vyāpya sarvaṃ vyavasthitāḥ //

na teṣāṃ kīrtanaṃ śakyaṃ kartuṃ varṣaśatairapi //
tathā svāyaṃbhuvasyādau kalpasya prathamasya ca

kṛtaḥ samāśrayastatra kṣetre tīrthaiḥ śubhāvahe //
bahutvādatha kālasya bahūni dvijasattamāḥ

ucchedaṃ saṃprayātāni tīrthānyāyatanāni ca //
yānyahaṃ veda kārtsnyena prabhāvasahitāni ca //
tāni vaḥ kīrtayiṣyāmi śṛṇudhvaṃ susamāhitāḥ

yeṣāṃ saṃśravaṇādeva naraḥ pāpātpramucyate
dhyānātsnānāttathā dānātsparśanādvijasattamāḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye hāṭakeśvarakṣetre sarvatīrthasamāśrayavarṇanaṃnāmāṣṭāviṃśo'dhyāyaḥ