Skanda Purana · Chapter 6.276

// sūta uvāca // //
tathānye'pi vasantīha rudrā ekādaśaiva tu //
sañjātā brāhmaṇaśreṣṭhā munīnāṃ hitakāmyayā

yairdṛṣṭaiḥ pūjitai rvāpi stutairvātha namaskṛtaiḥ //
vipāpmā jāyate martyaḥ sarvadoṣavivarjitaḥ

// ṛṣaya ūcuḥ // //
eka eva śruto rudro na dvitīyaḥ kathaṃcana //
gaurī bhāryāpriyā yasya skandaḥ putraḥ prakīrtitaḥ

tenaikaṃ vidmahe rudraṃ nānyamīśaṃ kathaṃcana //
tasmādbrūhi mahābhāga sarvānetānsuvistarāt

// sūta uvāca // //
satyametanmahābhāgā yadbhavadbhirudāhṛtam //
eka eva sthito rudro na dvitīyaḥ kathaṃcana

paraṃ yathā ca sañjātā rudrā ekādaśātra bhoḥ //
tathāhaṃ kīrtayiṣyāmi śṛṇudhvaṃ susamāhitāḥ

vārāṇasyāṃ purā saṃsthā munayaḥ śaṃsitavratāḥ //
hāṭakeśvaradevasya darśanārthaṃ samutsukāḥ

prasthitāḥ samayaṃ kṛtvā spardhamānāḥ parasparam //
ahaṃpūrvamahaṃ pūrvaṃ vīkṣayiṣyāmi taṃ vibhum

sarveṣāmagrato bhūtvā pātāle hāṭakeśvaram //
yaścādau tatra gatvā ca nekṣayiṣyati taṃ haram //
sarveṣāṃ śramajaṃ pāpaṃ tasyaikasya bhaviṣyati

evamuktvā tataḥ sarve vārāṇasyāṃ tataḥ param //
prasthitā dhāvamānāśca vegena mahatā tataḥ

etasminnantare devo hāṭakeśvarasaṃjñitaḥ //
jñātvā teṣāmabhiprāyaṃ mithaḥ sparddhāsamudbhavam //
ātmano darśanārthāya bahubhaktipuraskṛtam

laghunā rakṣyamāṇena sarveṣāṃ ca mahātmanām //
nāgaraṃdhreṇa niṣkramya pātālāccaiva tatkṣaṇāt

ekādaśaprakāraṃ sa kṛtvā rūpaṃ manoharam //
triśūlabhṛttrinetraṃ ca kapardena vibhūṣitam

śaśikhaṃḍadharaṃ caiva ruṇḍamālāpradhārakam //
samaṃ caiva sthitasteṣāṃ darśane śaṃkaraḥ prabhuḥ

tataste vai samālokya purasthaṃ vṛṣabhadhvajam //
jānubhyāṃ dharaṇīṃ gatvā stutiṃ cakrustatastataḥ

eko jānāti devo'yaṃ mama saṃdarśanaṃ gataḥ //
devadevo mahādevaḥ prathamaṃ bhaktavatsalaḥ

anyo jānāti me pūrvaṃ jātaste tāpasottamaḥ //
stutiṃ cakruśca vipreṃdrā jānubhyāmavaniṃ gatāḥ

//
// tāpasā ūcuḥ // //
namo devādhidevāya sarvadevamayāya ca //
namaḥ śāṃtāya sūkṣmāya namaścāṃdhakabhedine

namo'stu sarvarudrebhyo ye divaṃ saṃśritāḥ sadā //
jīvāpayaṃti jagatīṃ vāyubhiśca pṛthagvidhaiḥ

namo'stu sarvarudrebhyo ye sthitā vāruṇīṃ diśam //
rakṣaṃti sarvalokāṃśca piśācānāṃ durātmanām

namo'stu sarvarudrebhyo diśamūrdhvaṃ samāśritāḥ //
rakṣaṃti sakalāṃllokānbhūtārnāṃ jaṃbhakādbhayāt

namo'stu sarvarudrebhyo ye'dha ūrdhvaṃ samāśritāḥ //
rakṣaṃti sakalāṃllokānkūṣmāṃḍānāṃ bhayātsadā

asaṃkhyātāḥ sahasrāṇi ye rudrā bhūmimāśritāḥ //
namastebhyo'pi sarvebhyasteṣāṃ rakṣaṃti ye rujaḥ

evaṃ stutāstu te rudrā ekādaśatapasvibhiḥ //
ekādaśāpi tānprocurbhaktinamrāṃstu tāpasān

// rudrā ūcuḥ // //
ekādaśaprakāro'haṃ tuṣṭo vastāpasottamāḥ //
bahubhaktyatirekeṇa vriyatāṃ ca yathepsitam

// tāpasā ūcuḥ // //
yadi tuṣṭosi no deva yadi yacchasi vāṃchitam //
ekādaśaprakāraistu sadā stheyamihaiva tu

hāṭakeśvaraje kṣetre sarvatīrthamaye śubhe //
ārādhanaṃ prakurvāṇā vasāmo yena vai vayam

// śrībhagavānuvāca // //
ekādaśaprakārā yā mūrtayo nirmitā mayā //
etābhireva sarvābhiḥ sthāsyāmyatra sadaiva hi

ādyā tu mama yā mūrtiḥ sā kailāsaṃ samāśritā //
saṃtiṣṭhati sadaivātra kailāse parvatottame

etāstu mūrtayo'smākaṃ sthāsyaṃtyatraiva sarvadā //
sarveṣāmeva lokānāṃ hitāya dvijasattamāḥ

nāmabhiśca krameṇaiva yuṣmadīyaiḥ svayaṃ dvijāḥ //
viśvāmitrahrade snātvā etā mūrtīrmamātra vai //
pūjayiṣyaṃti ye martyāste yāsyaṃti parāṃ gatim

kiṃ vācā bahunoktena bhūyobhūyo dvijottamāḥ //
yā tāsāṃ kriyate pūjā ekādaśaguṇā bhavet

evamuktvā trinetrastu tatraivādarśanaṃ gataḥ //
te'pi tatrāśramaṃ kṛtvā śraddhayā parayā yutāḥ //
mūrtīśca tāḥ samārādhya saṃprāptāḥ paramaṃ padam

anyo'pi yaḥ pumāṃstāśca ārādhayati śraddhayā //
sa yāti paramaṃ sthānaṃ yatra devo maheśvaraḥ

tataḥ prabhṛti te jātā rudrā ekādaśaiva tu //
saṃkhyayā devadevasya maheśvaravapurdharāḥ

tejottamāste saṃyuktāstrinetrāḥ śūlapāṇayaḥ //
etadvaḥ sarvamākhyātaṃ yatpṛṣṭo'smi dvijottamāḥ

ekādaśaprakārastu yathā jāto maheśvaraḥ //
caitre māsi site pakṣe caturdaśyāṃ dine sthite

yastānpūjayate bhaktyā sa yāti paramāṃ gatim //
adhano dhanamāpnoti hyaputraḥ putravānbhavet

sarogo rogamuktastu parābhūto ripukṣayam //
tatsamārādhanādeva kāmānaṃtyamavāpnuyāt

yaḥ punaḥ śivadīkṣāḍhyo bhasmasnānaparāyaṇaḥ //
tatsamārādhanaṃ kuryācchṛṇu tasyāpi yatphalam

yadanyaḥ prāpnuyānmartyastatpūjāsaṃbhavaṃ phalam //
ṣaḍakṣareṇa maṃtreṇa puṣpeṇaikena tatphalam

śivadīkṣādharo yastu śataghnaṃ labhate phalam //
tasmācchataghnamāpnoti śaivātpāśupataśca yaḥ //
tasmātkālamukho yaśca mahāvratadharaśca yaḥ

mūrtīryāstāśca ye bhaktyā vinatāḥ pūjayaṃti ca //
sarveṣāmeva teṣāṃ tu phalaṃ śataguṇaṃ bhavet

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmya ekādaśarudrotpatti varṇanaṃ nāma ṣaṭsaptatyuttaradviśatatamo'dhyāyaḥ