Skanda Purana · Chapter 6.273

// sūta uvāca // //
eteṣāṃ tu sahasreṇa bhavedgrāhyaṃ dinaṃ dvijāḥ //
caturdaśa sahasrākṣā jāyaṃte tatra vāsare

saptamastu sahasrākṣaḥ sāṃprataṃ vartate'tra yaḥ //
ekasaptatisaṃvartacaturdaśadine vidheḥ

yugānāṃ kurute rājyaṃ manavaśca tathā pare //
svāyaṃbhuvaprabhṛtayo yathā śakrāstathā sthitāḥ //

jāyanto nāma śakro'yaṃ sāṃprataṃ vartate tu yaḥ //
vaivasvato manuścaiva aṣṭāviṃśatpramāṇakaḥ

caturyugasya saṃjāto gatesmiñcheṣamātrake //
bhaviṣyati baliḥ śakro vāsudevaprasādataḥ

tena tasya pratijñātaṃ rājyaṃ caivāṣṭame manau

evaṃ sarve surāścānye trayastriṃśatpramāṇataḥ ///
koṭayaḥ prabhaviṣyaṃti yathā caiva tathā purā

yo'yaṃ brahmā sthito viprāḥ sāṃprataṃ sṛṣṭikārakaḥ //
tasyānena pramāṇena jātaṃ saṃvatsarāṣṭakam //

ṣaṇmāsāśca dinārdhaṃ ca prathamaṃ śuklapūrvakam//
saurasāvanacaṃdrārkṣairmānairebhiścaturvidhaiḥ

kalau niryāti sarveṣāṃ bhūtānāṃ kṣitimaṇḍale //
paṃcaṣaṣṭyā'dhikaiścaiva dinānāṃ ca śataistribhiḥ //
bhavetsaṃvatsaraṃ sauraṃ pañconaistaiśca sāvanam

cāṃdra ekādaśonastu triṃśaddhīna uḍūdbhavaḥ //
śītātapau tathā vṛṣṭiḥ sauramānena jāyate

vṛkṣāṇāṃ phalaniṣpattiḥ sasyānāṃ ca tathā parā /
agniṣṭomādayo yajñā vartaṃte ye dharātale

utsāhāśca vivāhāśca sāvanena bhavaṃti ca //
kusīdādyāśca ye kecidvyavahārāśca vṛttijāḥ

adhimāsaprayuktena te syuścāṃdreṇa nirmitāḥ //
nākṣatreṇa tu mānena sidhyaṃte grahacārikāḥ

nānyatkiṃciddharāpṛṣṭha etanmānacatuṣṭayāt //
etena tu pramāṇena devadaityāśca mānavāḥ

varttaṃte brāhmaṇaśreṣṭhāḥ śrutireṣā purātanī //
etadyugapramāṇaṃ tu yaḥ paṭhedbhaktisaṃyutaḥ

eteṣāmeva liṃgānāṃ saptānāṃ brāhmaṇottamāḥ //
nāpamṛtyu bhayaṃ tasya kathaṃcitsaṃbhaviṣyati

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye yugapramāṇavarṇanaṃnāma trisaptatyuttaradviśatatamo'dhyāyaḥ // २७३