Skanda Purana · Chapter 6.270

ānarta uvāca//
mūrkhatvādvā pramādādvā kāmādbālasyato'pi vā//
yo naraḥ kurute pāpaṃ prāyaścittaṃ karoti na

tasya pāpakṣayakaraṃ puṇyaṃ brūhi dvijottama//
yena muktirbhavetsadyo yadi tuṣṭo'si me prabho

lobhamohaparo yo'sau pāpapiṃḍaṃ mahāmune//
pradadāti vidhiṃ brūhi yena yacchāmyahaṃ drutam

bhartṛyajña uvāca//
dadyātsvapiṃḍaṃ sauvarṇaṃ paṃcaviṃśatpalātmakam

vidhāyāparapakṣe tu snāpayitvā vidhānataḥ//
maṃḍapādyaṃ ca prākkṛtvā snātvā dhautāṃbaraḥ śuciḥ

tadā svarūpaṃ pṛthvyādi pūjayetpāpakṛnnaraḥ//
tathā sa mucyate pāpāttatkṛtāddhi na saṃśayaḥ

caturviṃśatitattvāni pṛthivyādīni yāni ca//
teṣāṃ nāmabhistatpiṃḍaṃ pūjayetannarādhipaḥ

ॐ pṛthivyai namaḥ//
ॐ adbhyo namaḥ//
ॐ tejase namaḥ//
ॐ vāyave namaḥ//
ॐ ākāśāya namaḥ//
ॐ ghrāṇāya namaḥ//
ॐ jihvāyai namaḥ//
ॐ cakṣuṣe namaḥ//
ॐ tvace namaḥ//
ॐ śrotrāya namaḥ//
ॐ gandhāya namaḥ//
ॐ rasāya namaḥ//
ॐ rūpāya namaḥ//
ॐ sparśāya namaḥ//
ॐ śabdāya namaḥ//
ॐ vāce namaḥ//
ॐ pāṇibhyāṃ namaḥ//
ॐ pādābhyāṃ namaḥ//
ॐ pāyave namaḥ//
ॐ upasthāya namaḥ//
ॐ manase namaḥ//
ॐ buddhyai namaḥ//
ॐ cittāya namaḥ//
ॐ ahaṃkārāya namaḥ/
ॐ kṣetrātmane namaḥ//
ॐ paramātmane namaḥ//
dhūpaṃ dhūrasi maṃtreṇa agnirjyotīti dīpakam//
yuvā suvāseti ca tato vāsāṃsi paridhāpayet

tato brāhmaṇamānīya vedavedāṃgapāragam//
prakṣālya caraṇau tasya vāsāṃsi paridhāpayet

keyūraiḥ kaṃkaṇaiścaiva aṃgulīyakabhūṣaṇaiḥ

bhūṣayitvā tanuṃ tasya tato mūrtiṃ samānayet//
maṃtreṇānena rājeṃdra brāhmaṇāya nivedayet

eṣa ātmā mayā dattastava hemamayo dvija//
yatkiṃcidvihitaṃ pāpaṃ pūrvaṃ bhūyāttavākhilam

iti dānamaṃtraḥ//
tatastu brāhmaṇo rājanmaṃtrametaṃ samuccaret

yatkiṃcidvihitaṃ pāpaṃ tvayā pūrvaṃmayā hi tat//
gṛhītaṃ mūrtirūpaṃ tattatastvaṃ pāpavarjitaḥ//
iti pratigrahamaṃtraḥ

evaṃ dattvā vidhānena tato vipraṃ visarjayet//
evaṃ kṛte tato rājaṃstasmai dattvātha dakṣiṇām

yathā tuṣṭiṃ samabhyeti tataḥ pāpaṃ nayatyasau//
tasminkṛte mahārāja pratyayastatkṣaṇādbhavet

śarīraṃ laghutāmeti tejovṛddhiśca jāyate//
svapne ca vīkṣate rātrau saṃtuṣṭamanasaḥ sthitān

narānstriyaḥ sitairvastraiḥ śvetamālyānulepanaiḥ//
śvetāngovṛṣabhānaśvāṃstīrthāni vividhāni ca

etatte sarvamākhyātaṃ pāpapiṃḍasya dāpanam//
śravaṇādapi rājeṃdra yasya pāpaiḥ pramucyate

anyatrāpi mahādānaṃ pāpapiṇḍo harennṛpa//६.२७०.२०/
ekajanmakṛtaṃ pāpaṃ nijakāyena nirmitam//
kapāleśvaradevasya sahasraguṇitaṃ haret

pūrvavaccaiva kartavyo vedimaṃḍapayorvidhiḥ//
paraṃ homaḥ prakartavyo gāyatryā kevalaṃ nṛpa//२२/
iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye kapāleśvarakṣetramāhātmyaprasaṃgena pāpapiṃḍapradānavidhānavarṇanaṃnāma saptatyuttaradviśatatamo'dhyāyaḥ