Skanda Purana · Chapter 6.269

sūta uvāca//
kapāleśasya māhātmyaṃ śrūyatāmadhunā dvijāḥ//
caturthasya mahābhāgāstatra kṣetre sthitasya ca//१/.
śrutamātreṇa yenātra naraḥ pāpātpramucyate

ṛṣaya ūcuḥ//
trayāṇāṃ caiva liṃgānāṃ pūrvoktānāṃ mahāmate//
śrutāsmābhiḥ samutpattiḥkapāleśvaravarjitā//
kenāyaṃ sthāpito devaḥ kapāleśvarasaṃjñitaḥ

tasmindṛṣṭe phalaṃ kiṃ syātpūjite ca vadasva naḥ

sūta uvāca//
iṃdreṇa sthāpitaḥ pūrvameṣa devo dvijottamāḥ//
kapāleśvasaṃjñastu brahmahatyā vimuktaye

tatprabhāvatsuraśreṣṭha stayā mukte dvijottamāḥ//
pāpaṃ pūruṣadānena ityeṣā vaidikī śrutiḥ////
anyo'pi yo narastaṃ ca pūjayitvā prabhaktitaḥ//
prayacchedbrāhmaṇendrāya śuddhaye pāpapūruṣam//
sa mucyetpātakādghorādbrahmahatyāsamudbhavāt

dakṣiṇāmūrtimāsādya provācedaṃ bṛhaspatiḥ//
hāṭakeśvaraje kṣetre gatvā taṃ vīkṣya śaṃkaram

yo dadāti śarīraṃ ca kṛtvā hemamayaṃ tataḥ//
mucyate nātra saṃdehaḥ pātakaiḥ pūrvasaṃyutaiḥ

ṛṣaya ūcuḥ//
brahmahatyā kathaṃ jātā surendrasya hi sūtaja//
etannaḥ sarvamācakṣva paraṃ kautūhalaṃ hi naḥ

kapāleśvarasaṃjñastu kathaṃ devo'tra saṃsthitaḥ//
brahmahatyā kathaṃ naṣṭā tatprabhāvāddivaspateḥ

sa pāpapūruṣo deyo vidhinā kena sūtaja//
kairmaṃtraiḥ sa hi deyaḥ kaiścaiva hyupaskaraiḥ

darśanātpūjanāccāpi kiṃ phalaṃ jāyate nṛṇām//
adattvā svaśarīraṃ vā pūjayā kevalaṃ vada

sūta uvāca//
ahaṃ vaḥ kīrtayiṣyāmi kathāmetāṃ purātanīm//
yāṃ śrutvāpi mahābhāgā naraḥ pāpātpramucyate

ajñānājjñānato vāpi vihitairanyajanmajaiḥ//
dṛṣṭamātreṇa yenātra pātakāttaddinodbhavāt//
mucyate nātra saṃdehaḥ satyametanmayoditam

purā tvaṣṭuḥ suto jajñe vṛtro hi dvijasattamāḥ//
pulomaduhituḥ pārśvādvibhāvaryāḥ suvīryavān

sa bāla eva dharmātmā āsītsarvajanapriyaḥ//
dānavaṃ bhāvamutsṛjya dvijabhaktiparāyaṇaḥ

sa gatvā puṣkarāraṇyaṃ parameṇa samādhinā//
toṣayāmāsa deveśaṃ padmajaṃ tapasi sthitaḥ

tasya tuṣṭaḥ svayaṃ brahmā dṛṣṭigocaramāgataḥ//
provāca varado'smīti kiṃ te kṛtyaṃ karomyaham

vṛtra uvāca//
yadi tuṣṭosi me deva brāhmaṇatvaṃ prayaccha me/
brāhmaṇatvaṃ samāsādya sādhayāmi paraṃ padam

tena kiṃcidasādhyaṃ na brāhmaṇyena bhavenmama//
brāhmaṇena samaṃ cānyanna kiṃcitpratibhāti me

paramaṃ daivataṃ kiṃcinna viprādvidyate param//
tasmānme hṛtsthitaṃ nānyadapi rājyaṃ triviṣṭape

sūta uvāca//
tasya tadvacanaṃ śrutvā tuṣṭastasya pitāmahaḥ//
brāhmaṇatvaṃ svayaṃ dattvā tataḥ provāca sādaram

mayā tvaṃ vihito vipra putra prakuru vāṃchitam//
prasādayasva satataṃ brāhmaṇānbrahmavittamān

brāhmaṇaiḥ suprasannaiśca prīyaṃte sarvadevatāḥ//
tasmātsarvaprayatnena pūjanīyā dvijottamāḥ

sūta uvāca//
evamuktastadā tena vṛtro'bhūdbrāhmaṇastataḥ//
brāhmyā lakṣmyā samopeto brahmacaryaparāyaṇaḥ

tasmiṃstapasi saṃsthe tu hatā iṃdreṇa dānavāḥ//
vaṃśocchede samāpanne dānavānāṃ mahātmanām

tataste dānavāḥ sarve parābhūtāḥ suraistataḥ//
svaṃ sthānaṃ saṃparityajya duḥkhaśokasamanvitāḥ

tanmātaraṃ puraskṛtvā tatsakāśamupāgatāḥ//
sa ca tāṃ mātaraṃ dṛṣṭvā vṛtāṃ taiśca samanvitaḥ

dānavaiśca parābhūtaistathābhūtāṃ ca mātaram//
kimāgamanakṛtyaṃ ca duḥkhitānāṃ mamāṃtike

dānavā ūcuḥ//
vayaṃ devaiḥ parābhūtā bhavaṃtaṃ śaraṇāgatāḥ//
kva yāmo'nyatra cā'smākaṃ tvāṃ vinā nāsti saṃśrayaḥ

teṣāṃ tadvacanaṃ śrutvā vṛtraḥ provāca sādaram//
devānahaṃ haniṣyāmi gamyatāṃ tatra mā ciram

tavāgamanakṛtyaṃ ca mātaḥ kathaya sāṃpratam

mātovāca//
tathā kuru mahābhāga śīghraṃ dāraparigraham//
vaṃśavṛddhau pramāṇaṃ cedvākyaṃ tava mamodbhavam

eṣa eva paro dharma eṣa eva paro nayaḥ//
putrasya jananīvākyaṃ yatkaroti samāhitaḥ

tathā strīṇāṃ patiṃ muktvā nānyāsti bhuvi devatā//
jananyāṃ jīvamānāyāṃ tathaiva ca sutasya ca

atikramya ca yā nārī patiṃ dharmaparā bhavet//
tatsarvaṃ viphalaṃ tasyā jāyate nātra saṃśayaḥ

putraḥ svajananīvākyaṃ yo'tikramya yathāruci//
karoti dharmakṛtyāni tāni sarvāṇi tasya ca

bhavaṃti ca tathā nūnaṃ vṛthā bhasmahutaṃ yathā//
araṇye ruditānīva ūṣare vāpitāni ca

yathaiva badhirasyāgre gītaṃ nṛtyamacakṣuṣaḥ//
tadvanmātṛmatādanyakṛtaṃ putrasya dharmajam

sarvaṃ karma na saṃdehastenāhaṃ tvāmupāgatā//
baṃdhūnāṃ vacanātputra duḥkhārtā ca viśeṣataḥ

kiṃ vā te bahunoktena bhūyo bhūyaśca putraka//
ānṛṇyaṃ jāyate yadvatpitṝṇāṃ tattathā śṛṇu

tava vatsa pramāṇaṃ cetkuruṣva ca vaco mama//
tasyāstadvacanaṃ śrutvā vṛtraḥ saṃciṃtya cetasi

śrutismṛtyuktamārgeṇa na māturvidyate param//
sa tatheti pratijñāya ānināya parigraham

tvaṣṭā tasmai dadau prītastato ratnānyanekaśaḥ//
saṃkhyāhīnāni tasyaiva kupyākupyamanaṃtakam

hastyaśvayānakośāḍhyaṃ so'bhiṣiktaḥ pade nije//
dānavānāṃ mahāvīryo brāhmaṇyena samanvitaḥ

abhiṣiktaṃ tadā vṛtraṃ svarājye te'surādayaḥ//
śrutvābhiṣekaṃ saṃhṛṣṭāstasya vṛtrasya bāṃdhavāḥ

dānavāśca samājagmurye tatrāsanpurogatāḥ//
pātālādgiridurgācca sthaladurgebhya eva ca//
kṛtavairāḥ samaṃ devaiḥ kopena mahatā vṛtāḥ

tataḥ protsāhitaḥ sarvairdānavaiḥ sa mahābalaḥ//
prasthitaḥ śatrunāśāya mahendrabhavanaṃ prati

śakro'pi vṛtramākarṇya samāyāṃtaṃ yuyutsayā//
sanmukhaḥ prayayau hṛṣṭaḥ sarvadevasamanvitaḥ

tataḥ samabhavadyuddhaṃ devānāṃ dānavaiḥ saha//
merupṛṣṭhe suvistīrṇe nityameva divāniśam

nityaṃ parājayo jajñe devānāṃ dānavaiḥ saha//
tatrovāca guruḥ śakra mā yuddhaṃ kuru devapa

vṛtro'yaṃ dāruṇo yuddhe baladvayasamanvitaḥ//
catvāraścāgrato vedāḥ pṛṣṭhataḥ saśaraṃ dhanuḥ

tena jeyatamo daityastavaiva ca mahāhave//
tasmātsaṃdhānametena tvaṃ kuruṣva śacīpate

tato viśvāsamāyā taṃ jahi vajreṇa dānavam//
ṣaḍupāyai ripurvadhya iti śāstranidarśanam

bhuṃjānaśca śayānaśca dattvā kanyāmapi svakām//
vipradānena saṃyojya kṛtvāpi śapathaṃ gurum//
māyāprapaṃcamāsādya tasmādevaṃ samācara

indra uvāca//
yadyevaṃ ca svayaṃ gatvā tvaṃ viśvāse niyojaya//
tava vākyena viśvāsaṃ nūnaṃ yāsyati dānavaḥ

sūta uvāca//
śakrasya matamājñāya pratasthe ca bṛhaspatiḥ//
yatra vṛtraḥ sthito daityo yuddhārthaṃ kṛtaniścayaḥ

vṛtro'pi taṃ samālokya svayaṃ prāptaṃ bṛhaspatim//
sadaiva dvijabhaktaḥ sa hṛṣṭātmā samapadyata//
viśeṣātpraṇipatyoccairvākyametadabhāṣata

vṛtra uvāca//
svāgataṃ te dvijaśreṣṭha kiṃ karomi praśādhi mām//
priyā me brāhmaṇā yasmāttasmātkīrtaya sāṃpratam

bṛhaspatiruvāca// saṃdigdho vijayo yuddhe yasmāddaivena sattama//
tasmātkuru maheṃdreṇa vyavasthāṃ vacanānmama

tvaṃ bhuṃkṣva bhūtalaṃ kṛtsnaṃ śakraścāpi triviṣṭapam//
vyavasthayā'nayā nityaṃ vartitavyaṃ parasparam

vṛtra uvāca//
ahaṃ tava vaco brahmankariṣyāmi sadaiva hi/
saṃgamaṃ kuru śakreṇa sāṃprataṃ mama saddvija

sūta uvāca//
atha śakraṃ samānīya bṛhaspatirudāradhīḥ//
vṛtreṇa saha saṃdhānaṃ cakre caiva parasparam

ekārimitratāṃ gatvā tāvubhau daityadevapau//
prahṛṣṭau gatavantau tau tataścaiva nijaṃ gṛham

atha śakracchalānveṣī sadā vṛtrasya vartate//
na cchidraṃ labhate kvāpi vīkṣamāṇopi yatnataḥ

kathaṃcidapi so'bhyeti tatsakāśaṃ puraṃdaraḥ//
kiṃcicchidraṃ samāsādya tatpratāpena dahyate

iṃdra uvāca//
na śaknomi ca taṃ daityaṃ vīkṣituṃ ca kathaṃcana//
tejasā sarvato vyāptaṃ tatkathaṃ sūdayāmyaham

tasmātkaṃcidupāyaṃ me tadvadhārthaṃ prakīrtaya//
yathā śaknomi tatsoḍhuṃ tejastasya durātmanaḥ

sūta uvāca//
tasya tadvacanaṃ śrutvā ciraṃ dhyātvā bṛhaspatiḥ//
tataḥ provāca taṃ śakraṃ vinayāvanataṃ sthitam

bṛhaspatiruvāca//
tasya brāhmyaṃ sthitaṃ tejaḥ samyaggātre puraṃdara//
vīkṣituṃ naiva śaknoṣi tena tvaṃ tridaśādhipa

tathā te kīrtayiṣyāmi tasyopāyaṃ vadhodbhavam//
vadhayiṣyasi yenātra taṃ tvaṃ dānavasattamam

prācīsarasvatītīre puṣkarāraṇyamāśritaḥ//
dadhīcirnāma viprarṣiḥ śatayojanamucchritaḥ//७३/.
tatra nityaṃ tapaḥ kurvanstauti nityaṃ pitāmaham/
sa nirviṇṇo muniśreṣṭhaḥ prāṇānāṃ dhāraṇe hare

ciraṃtano muniḥ sa syājjarayātisamāvṛtaḥ//
taṃ prārthaya drutaṃ gatvā tasyāsthīni gurūṇi ca

sa te dāsyastyasaṃdigdhaṃ tyaktvā prāṇānatipriyān//
tasyāsthibhiḥ praharaṇaṃ vajrākhyaṃ te bhaviṣyati

amoghaṃ te tato nūnaṃ tvaṃ vṛtraṃ sūdayiṣyasi//
tasya vajrasya tattejo brahmatejo'bhibṛṃhitam//
tena vṛtrodbhavaṃ tejaḥ praśamaṃ saṃprayāsyati

sūta uvāca//
tacchrutvā satvaraṃ śakraḥ sarvairdaivagaṇaiḥ saha//
jagāma puṣkarāraṇye yatra prācī sarasvatī

trayastriṃśatsamopetā tīrthānāṃ koṭibhiryutā//
dadhīcerāśramaṃ tatra so'viśaccitrasaṃyutam

krīḍaṃte nakulaiḥ sarpā yatra tuṣṭiṃ gatā mithaḥ//
mṛgāḥ paṃcānanaiḥ sārdhaṃ vṛṣadaṃśāstathā''khubhiḥ

ulūka sahitāḥ kākā mitho dveṣavivarjitāḥ//
prabhāvāttasya tapaso dadhīceḥ sumahātmanaḥ

dadhīcirapi cālokya devāñchakrapurogamān//
samāyātānprahṛṣṭātmā satvaraṃ saṃmukhobhyagāt

tataścārghyaṃ samādāya praṇipatya muhurmuhuḥ//
śakramabhyāgataṃ prāha kiṃ te kṛtyaṃ karomyaham

gṛhāyātasya deveśa tacchīghraṃ me nivedaya//८४/.
iṃdra uvāca//
ātithyaṃ kuru vipreṃdra gṛhāyātasya sanmune//
tvadasthīni nijānyāśu mama dehyavikalpitam

atadarthamahaṃ prāptastvatsakāśaṃ munīśvara//
asthibhiste paraṃ kāryaṃ devānāṃ siddhimeṣyati

sūta uvāca//
iṃdrasya tadvacaḥ śrutvā dadhīcistoṣasaṃyutaḥ//
tataḥ prāha sahasrākṣaṃ sarvairdevaiḥ samanvitam

aho nāsti mayā tulyaḥ sāṃprataṃ bhuvi kaścana//
puṇyavānyasya deveśaḥ svayamarthī gṛhāgataḥ/८८//
dhanyāni ca mamāsthīni yāni deveśa te hitam//
kariṣyaṃti sadā kāryaṃ rakṣārthaṃ tridivaukasām

eṣo'haṃ saṃpradāsyāmi priyānprāṇānkṛte tava//
gṛhāṇa svecchayā'sthīni svakāryārthaṃ puraṃdara

evamuktvā maharṣiḥ sa dhyānamāśritya satvaram//
brahmaraṃdhreṇa niḥsārya prāṇamātmānamatyajat

tadātmanā parityaktaṃ tasya gātraṃ ca tatkṣaṇāt//
patitaṃ medanīpṛṣṭhe vyasu taddvijasattamāḥ

tasminneva kāle tu tasyāsthīni śatakratuḥ//
pragṛhya viśvakarmāṇaṃ tataḥ provāca sādaram

etairasthibhiḥ śīghraṃ me kuru tvaṃ vajramāyudham//
yena vyāpādayāmyāśu vṛtraṃ dānavasattamam

tasya tadvacanaṃ śrutvā viśvakarmā tvarānvitaḥ//
yathāyudhaṃ tathā cakre vajrākhyaṃ dāruṇākṛti

ṣaḍasri śataparvākhyaṃ madhye kṣāmaṃ vibhīṣaṇam//
pradadau ca tatastasmai sahasrākṣāya dhīmate

atha taṃ sa samādāya dvādaśārkasamaprabham//
samādhisthaṃ carairjñātvā vṛtraṃ saṃdhyārcane ratam

tataśca pṛṣṭhabhāgaṃ sa samāśritya trilokarāṭ//
cikṣepa vajramuddiśya tadvadhārthaṃ samutsukaḥ

sa hatastena vajreṇa dānavo bhasmasādgataḥ//
śakropi hatamajñātvā bhayāttasyātha dudruve

manuṣyarahite deśe viṣame gulmasaṃvṛte//
lilye śakrastadā sarvaṃ mene vṛtramayaṃ jagat

etasminnaṃtare devāḥ paśyaṃtaḥ sarvato diśam//
siddhacāraṇagandharvā ājagmuśca śatakratum

tataḥ kṛcchrācca tairdṛṣṭaḥ śakro'sau gahane vane/
nilīno bhayasaṃtrasto gulmamadhye vyavasthitaḥ

devā ūcuḥ//
kiṃ tvaṃ bhītaḥ sahasrākṣa vṛtro'yaṃ ghātitastvayā//
parivāreṇa sarveṇa vīkṣito'smābhireva ca

asmādāgaccha gacchāmo gṛhaṃ prati puraṃdara//
kuru trailokyarājyaṃ tvaṃ sāṃprataṃ hatakaṇṭakam

tacchrutvā'tha viniṣkrāṃto gulmamadhyācchatakratuḥ//
hṛṣṭaromā hataṃ śrutvā vṛtraṃ dānavasattamam

atha paśyaṃti yāvattaṃ devāḥ sarve śatakratum//
tāvattejovihīnaṃ tadgātraṃ durgaṃdhitāyutam

dṛṣṭvā lokagururbrahmā devānsarvānuvāca ha//
śakro'yaṃ sāṃprataṃ vyāptaḥ pāpayā brahmahatyayā

yadanena hato vṛtro brahmabhūtaśchalena saḥ//
tasmāttyājyaḥ sudūreṇa no cetpāpamavāpsyatha

brahmaghnena samaṃ sparśaḥ saṃbhāṣo'tha vinirmitaḥ//
pāpāya jāyate puṃsāṃ tasmāttaṃ dūratastyajet

āstāṃ saṃsparśanaṃ tasya saṃbhāṣo vā viśeṣataḥ//
darśanaṃ vāpi tasyāhuḥ sarvapāpapradaṃ nṛṇām

sūta uvāca/.
tacchrutvā brahmaṇo vākyaṃ śakro dṛṣṭvā''tmanastanum//
tejasā saṃparityaktāṃ durgandhena samāvṛtām

tataḥ provāca lokeśaṃ dīnaḥ praṇatakandharaḥ//
tavāhaṃ kiṃkaro deva tvayeṃdratve niyojitaḥ

tasmātkuru prasādaṃ me brahmahatyāvināśanam//
prāyaścittaṃ vibho brūhi yena śuddhiḥ prajāyate//११३/
brahmovāca//
aṣṭaṣaṣṭiṣu tīrtheṣu tvaṃ snātvā balasūdana//
ātmānaṃ hemajaṃ dehi pāpapūruṣasaṃjñitam

maṃtravattaṃ yathoktaṃ ca brāhmaṇāya mahātmane//
snātvā puṇyajale tīrthe brahmaghno'hamiti bruvan

snātamātrasya te hastādyatra tatpatati kṣitau//
tejaḥ saṃjāyategātre durgaṃdhaśca praṇaśyati

tasmiṃstīrthe tvayā tacca sthāpyaṃ śakra kapālakam//
maheśvarasya nāmnā ca pūjanīyaṃ tataḥ param

paṃcabhirvaktramaṃtraiśca tato deyā''tmatastanūḥ//
hemodbhavā dvijendrāya tataḥ śuddhimavāpsyasi

śakrastu tadvacaḥ śrutvā brahmaṇo'vyaktajanmanaḥ//
kapālaṃ vṛtrajaṃ gṛhya tīrthayātrāṃ tato gataḥ

aṣṭaṣaṣṭiṣu tīrtheṣu gacchansa ca sureśvaraḥ//
hāṭakeśvaraje kṣetre samāyātaḥ krameṇa ca

viśvāmitrahrade snātvā yāvattasmādvinirgataḥ//
kapālaṃ patitaṃ tasmātsvayameva hatātmanaḥ

tatastaṃ pūjayāmāsa mantrairvaktrasamudbhavaiḥ//
sarvapāpaharaiḥ puṇyairyathoktairbrahmaṇā purā

etasminneva kāle tu durgandho nāśamāptavān//
taccharīrāddvijaśreṣṭhā mahattejo vyajāyata

etasminnantare brahmā saha devaiḥ samāgataḥ//
brahmahatyāvimuktaṃ taṃ jñātvā sarvasurādhipam

śrībrahmovāca//
brahmahatyākṛto doṣo gataste surasattama//
śeṣapāpaviśuddhyarthaṃ svarṇadānaṃ prayaccha bhoḥ

kapālametaddeśe'tra yattvayā paripūjitam//
vṛtrasya paṃcabhirmaṃtrairharavaktrasamudbhavaiḥ

pradāsyasi tato bhaktyā hemajāmātmanastanum//
vidhinā maṃtrayuktena tava pāpaṃ prayāsyati//
yadyatpūrvakṛtaṃ kṛtsnaṃ pradāya brāhmaṇāya bhoḥ

evamuktastataḥ śakro brahmaṇā surasaṃnidhau//
tathetyuktvā tu tatkālaṃ pāpapiṃḍaṃ nijaṃ dadau

kṛtvā hemamayaṃ viprā brāhmaṇāya mahātmane//
gartātīrthasamutthāya vātākhyāyāhitāgnaye

etasminnaṃtare vipro garhitaḥ so'tha nāgaraiḥ/.
dhigdhikpāpa vṛthā vedā ye tvayā pāritāḥ purā

nāsmābhiḥ saha saṃparkaṃ kadācittvaṃ kariṣyasi//
gṛhītaṃ yattvayā dānaṃ pāpapiṃḍasamudbhavam

tataḥ provāca vipraḥ sa upamanyukulodbhavaḥ//
vivarṇavadano bhūtvā nāmnā khyātaḥ sa vātakaḥ

tvayā śakra pradatto me pāpapiṃḍaḥ svako yataḥ//
mayā pratigrahastena dākṣiṇyena kṛtastava

na lobhena suraśreṣṭha paśyataste vigarhitaḥ//
ahaṃ ca brāhmaṇaiḥ sarvairetairnagaravāsibhiḥ

tasmānnāhaṃ grahīṣyāmi etaṃ tava pratigraham

bhūyo'pi tava dāsyāmi na tvaṃ gṛhṇāsi cetpunaḥ// bra
hmaśāpaṃ pradāsyāmi dāruṇaṃ ca kṣayātmakam

iṃdra uvāca//
vedāgaṃpārago vipro yadi kuryātpratigraham//
na sa pāpena lipyeta padmapatramivāṃbhasā

tasmātte pātakaṃ nāsti śṛṇuṣvātra vaco mama//
etaistvaṃ garhite yasmādbrāhmaṇairnagarodbhavaiḥ

eteṣāṃ sarvakṛtyeṣu pradhānastvaṃ bhaviṣyasi//
eteṣāṃ putrapautrā ye bhaviṣyaṃti tathā tava

te sarve cājñayā teṣāṃ vartayiṣyaṃtyasaṃśayam//
yuṣmadvākyavihīnaṃ yatkṛtyaṃ svalpamapi dvija

teṣāṃ saṃpatsyate vandhyaṃ yathā bhasmahutaṃ tathā//
kapālamocanaṃ nāma khyātametadbhaviṣyati

ye tu saṃsmṛtya manujāḥ kapālaṃ mama saddvija//
tatra śrāddhaṃ kariṣyaṃti te narā muktisaṃyutāḥ//
śrāddhapakṣe viśeṣeṇa prayāsyaṃti parāṃgatim

sthānabāhyadvijātīnāṃ kule dāraparigraham//
kṛtvā tvadgotrasaṃbhūtā brāhmaṇā matprasādataḥ

vyavahāryā bhaviṣyaṃti nagare sarvakarmasu//
evamuktvā sahasrākṣastataścādarśanaṃ gataḥ

vātopi tena vittena pratigrahakṛtena ca//
cakāra tatra prāsādaṃ devadevasya śūlinaḥ

tataḥ provāca śakrastānbrāhmaṇānnagarodbhavān//
kapālamocane snātvā yo devaṃ hyarcayiṣyati

brahmahatyodbhavaṃ pāpaṃ tasya naśyatyasaṃśayam//
mahāpātakayukto vā vipāpmā saṃbhaviṣyati

sa tatheti pratijñāya brāhmaṇānnagarodbhavān//
tatraiva svāśramaṃ kṛtvā pūjayāmāsa śaṃkaram

tataḥprabhṛti yatkiṃcitteṣāṃ kṛtyaṃ prajāyate//
tadvākyena prakurvaṃti tatra ye nāgaraḥ sthitāḥ

etasmātkāraṇājjāto madhyago dvitīyastviha

etadvaḥ sarvamākhyātamākhyānaṃ pāpanāśanam//
kapāleśvaradevasya śṛṇvatāṃ paṭhatāṃ nṛṇām

yathā deveśvarasyātra pāpaṃ naṣṭaṃ mahātmanaḥ//
brahmahatyā yathā naṣṭā tasmiṃstīrthe dvijottamāḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye vātakeśvarakṣetrakapālamocaneśvarotpattimāhātmyavarṇanaṃ nāmaikonasaptatyuttaradviśatatamo'dhyāyaḥ