Skanda Purana · Chapter 6.268

ānarta uvāca//
karmaṇā kena martye ca narāṇāṃ jāyate vada//
cakravartitvamakhilaṃ sarvaśatruvimardanam

bhartṛyajña uvāca//
durlabhaṃ bhūmipālatvaṃ sarvapāpairnarādhipa//
tapobhirniyamairdānaistathānyaiśca śubhairvrataiḥ

yaḥ punarbhūpatirbhūtvā pṛthvīṃ dadyāddhiraṇmayīm//
gautameśvaradevasya purataḥ śraddhayānvitaḥ//
cakravartī bhavennūnamevamāha pitāmahaḥ

māṃdhātā dhundhumāraśca hariścaṃdraḥ purūravāḥ/
bharataḥ kārtavīryaśca ṣaḍete cakravartinaḥ//४/
pṛthvīdānaṃ purā kṛtvā gautameśvarasaṃnidhau/
dattvā hiraṇmayīṃ pṛthvīṃ sārvabhaumāstataḥ sthitāḥ

ānarta uvāca//
bhagavankena vidhinā dātavyā sā vasundharā//
ahaṃ dāsyāmi tāṃ nūnaṃ śraddhā me mahatī sthitā

bhartṛyajña uvāca//
kāryā palaśatenorvī vṛttākārā nṛpottama//
tadardhenāthavā śaktyā paṃcaviṃśatpalātmikā

dharādāne mahārāja vittaśāṭhyaṃ vivarjayet//
naiva paṃcapalādarvākpradātavyā kathañcana//
lavaṇekṣusurāsarpirdadhidugdhajalodbhavāḥ//
samudrāḥ sapta caitāṃstu kakṣāyāṃ tatra darśayet

jaṃbūplakṣakuśakrauṃcaśākaśālmalipuṣkarāḥ/
samudrānsaritaḥ sapta dvaiguṇyena prakalpayet

mahendro malayaḥ sahyo himavāngaṃdhamādanaḥ//
viṃdhyaḥ śṛṃgī ca saptaiva kalpayetkulaparvatān//११/.
madhye prakalpayenmeruṃ dikṣu viṣkambhaparvatān//
jaṃbūnyagrodhanīpāṃśca plakṣaścaiva tathā drumān

gaṃgādyāḥ saritastatra prādhānyena prakalpayet//
evaṃ nirmāpya vasudhāṃ sarvāṃ hemamayīṃ nṛpa//१३/.
maṃḍapaṃ kārayetpaścādyathāpūrvaṃ prakalpitam

kuṇḍāni toraṇānyeva brāhmaṇagrahapūjane//
pūrvavatsakalaṃ kṛtvā madhye vediṃ prakalpayet

tatra saṃsthāpayetpṛthvīṃ paṃcagavyena pārthiva//
yathoktamaṃtraistalliṃgaistataḥ śuddhodakena tu

imaṃ me gaṃge yamune paṃcanadyastripuṣkaram//
śrīsūktaṃ pāvamānaṃ ca haimīṃ ca tadanaṃtaram

snānakarmaṇi yogyāṃśa svādiṣṭhāyanamuttamam

evaṃ saṃsnāpya vidhivadvāsāṃsi paridhāpayet//
yuvā suvāsā maṃtreṇa sūkṣmāṇi vividhāni ca

ye bhūtānāmadhītyevaṃ tataḥ procya prapūjayet//
dhūrasīti ca maṃtreṇa dhūpaṃ dadyātsamāhitaḥ

agnirjyotīti maṃtreṇa kuryādārārtikaṃ tataḥ//
ahamasmīti maṃtreṇa saptadhānyaṃ prakalpayet

evaṃ kṛtvā'khilaṃ tasyā yajamānaḥ sitāṃbaraḥ//
puraḥ sthitoṃjaliṃ baddhvā maṃtrānetānudāharet

tvayā saṃdhāryate viśvaṃ jagadetaccarācaram//
tava dānaṃ kariṣyāmi sāṃnidhyaṃ kuru medini

śarīreṣvapi bhūtānāṃ tvaṃ devi prathamaṃ sthitā//
tataścānyāni bhūtāni jalādīni vasundhare

ye tvāṃ yacchaṃti te bhūyastvāṃ labhaṃte na saṃśayaḥ//
iha loke pare caiva pārthivaṃ rūpamāśritā

evaṃ stutvā samādāya toyaṃ hemākṛtiṃ nṛpa//
vāsudevaṃ hṛdi sthāpya maṃtreṇānena kalpayet

pātālāduddhṛtā yena pṛthvī sā lokakāriṇā//
asyā dānena ca sadā prīyatāṃ me janārdanaḥ

evamuccārya tattoyaṃ toyamadhye parikṣipet//
na bhūmau naiva haste ca brāhmaṇasya nṛpottama

tato visarjayeddevīṃ mantreṇānena bhāgaśaḥ//
āgatā ca yathānyāyaṃ pūjitā ca yathāvidhi

asmākaṃ tvaṃ hitārthāya yatreṣṭaṃ tatra gamyatām//
usrā vedeti maṃtreṇa samuccārya tataḥ param//
brāhmaṇebhyaḥ pradātavyā saṃvibhajya narādhipa

evaṃ te sarvamākhyātaṃ pṛthivīdānamuttamam/
śṛṇuyātpārthivo bhāvī dātā janmanijanmani

yo rājā pṛthivīṃ dadyādvidhinānena pārthiva//
rājyabhraṃśo na vaṃśe'pi tasya saṃjāyate kvacit

rājyabhraṃśasamopetā ye dṛśyaṃte mahībhujaḥ//
na tairvasundharā dattā brāhmaṇānāṃ dhṛtātmanām

tasmātsarvaprayatnena pṛthvīdānaṃ samācaret//
na haretparadattāṃ ca kathaṃcidapi medinīm

etatpuṇyaṃ praśasyaṃ ca pṛthivīdānamuttamam//
śṛṇvatāmapi rājeṃdra taddehādyaghanāśanam

āstāṃ tāvatpradānaṃ ca pṛthivyāḥ pṛthivīpateḥ//
dātuḥ saṃpreraṇaṃ yasyā ajñānaughavināśanam

rūpavānsubhagaścaiva tathā ca priyadarśanaḥ//
ādhivyādhivinirmuktaḥ putrapautrasamanvitaḥ

medhāvī jāyate martyo dānasyāsya prabhāvataḥ//
itthaṃbhūtā mahārāja kṛtvā rājyamakaṇṭakam

prītā viṣṇoḥ padaṃ yāṃti śāśvataṃ yannirāmayam//
anyatrāpi dharādānātprakuryāccakravartitām

ekajanmāṃtaraṃ yāvatsamyagdattaṃ nṛpottamaḥ//
gautameśvaradevasya yatpurā purataḥ kṛtam

saptajanmāṃtaraṃ yāvatprakaroti na saṃśayaḥ//
tasmātsarvaprayatnena tatra deyā mahī nṛpa

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye gautameśvaramāhātmye pṛthvīdānamāhātmyavarṇanaṃnāmāṣṭaṣaṣṭyuttaradviśatatamo'dhyāyaḥ