Skanda Purana · Chapter 6.267

sūta uvāca//
tasmādeṣā mahārāja śivarātrirvipaścitā///
kartavyā puruṣeṇātra lokadvayamabhīpsunā

ānarta uvāca//
maṃkaṇeśvaramāhātmyaṃ mayā vistarataḥ śrutam//
śivarātrisamopetaṃ yattvayā parikīrtitam

sāṃprataṃ vada me kṛtsnaṃ siddheśvarasamudbhavam//
vistareṇa mahābhāga paraṃ kautūhalaṃ hi me

bhartṛyajña uvāca//
siddheśvara iti khyāto mahādevo mahīpate//
tasyotpattistvayā pūrvaṃ śrutātra vadato mama

sāṃprataṃ tatphalaṃ vacmi tasmindṛṣṭe tu dānajam//
yatphalaṃ jāyate nṝṇāṃ cakravartitva saṃbhavam

tulāpuruṣadānaṃ ca tatra rājanpraśaśyate//
ya iccheccakravartitvaṃ samaste dharaṇītale

ānarta uvāca//
tulāpuruṣadānasya yo vidhiḥ parikīrtitaḥ//
taṃ me sarvaṃ samācakṣva vistareṇa mahāmune

bhartṛyajña uvāca//
caṃdrasūryoparāge vā ayane viṣuve tathā//
tīrthe vā puruṣaśreṣṭha tulāpuruṣasaṃbhavam

praśaṃsaṃti vidhiṃ samyakprāpte vā ceṃdusaṃkṣaye//
brāhmaṇānāṃ sudāṃtānāmanuṣṭhānavatāṃ satām

vedādhyayanayuktānāṃ nirdoṣāṇāṃ ca pārthiva//
vibhajya sa bhaveddeyo naikasya ca kathaṃcana

śucau deśe same puṇye pūrvottaraplave śubhe//
maṃḍapaṃ kārayedvidvān ramyaṃ ṣaष़ośahastakam//
tanmadhye kārayedvediṃ caturhasta pramāṇataḥ/
yajamānasya hastena hastaikena samucchritām

caturhastāni kuṇḍāni caturdikṣu prakalpayeta //
ekahastapramāṇāni āyāmavyāsavistarāt//
aiśānyāmaparāṃ vediṃ hastamātrāṃ nyasecchubhām//
ratnimātrotthitāṃ caiva grahāṃstatra prakalpayet

yugmāṃśca ṛtvijaḥ kāryāścaturdikṣu yathākramam//
bahvṛco'dhvaryaścaiva cchaṃdogātharvaṇāvapi

tūṣṇīṃ tu devatāhomastaiḥ kāryaḥ susamāhitaiḥ//
talliṃgairnṛpatemaṃtraiḥ svaśaktyā japa eva ca

ekahastapraviṣṭaṃ tu caturhastocchritaṃ tathā//
staṃbhadvayaṃ tu kartavyaṃ vediyāmyottare sthitam

tanmadhye suśubhaṃ kāṣṭhaṃ staṃbhajātyaṃ dṛḍhaṃ nyaset//
candanaḥ khadiro vātha bilvovā'śvattha eva vā

tiṃduko devadārurvā śrīparṇī vā vaṭo'thavā//
aṣṭau vṛkṣāḥ śubhāḥ śastāḥ staṃbhārthaṃ nṛpasattam

śikyadvaya samopetāṃ tanmadhye vinyasettulām//
snātaḥ śuklāṃbaradharaḥ śuklamālyānulepanaḥ//६.२६७.२०/
pūrayitvā samaṃtācca lokapālānyathākramam//
staṃbhānsaṃpūjayatpaścādgandhamālyānulepanaiḥ

tulāṃ ca pārthivaśreṣṭha puṇyāhaṃ ca prakīrtayet//
yajamāno nijaiḥ sarvairāyudhaiḥ kāyasaṃsthitaiḥ

paścimāṃ diśamāsthāya prāṅmukhaḥ śraddhayā'nvitaḥ//
kṛtāṃjalipuṭo bhūtvā imaṃ maṃtramudīrayet

brahmaṇo duhitā nityaṃ satyaṃ paramamāśritā//
kāśyapī gotrataścaiva nāmato viśrutā tulā

tvaṃ tule satyanāmāsi svabhīṣṭaṃ cātmanaḥ śubham//
kariṣyāmi prasādaṃ me sāṃnidhyaṃ kuru sāṃpratam

tatastasyāṃ samāruhya svaśaktyā yatsamāhṛtam//
dānārthaṃ pūrvamāyojyaṃ śikyenyasminnarottama

suvarṇaṃ rajataṃ vā'tha vastraṃ cānyadabhīpsitam//
yāvatsāmyaṃ bhavedrājannātmano'bhyadhikaṃ ca vā

tato'bhīṣṭāṃ samāsādya devatāṃ śikyamāśritaḥ//
udakaṃ jalamadhye ca tadarthaṃ prakṣipeddrutam

satilaṃ sahiraṇyaṃ ca sākṣataṃ vidhipūrvakam//
avatīrya tataḥ sarvaṃ brāhmaṇebhyo nivedayet

yatphalaṃ prāpyate paścāttadihaikamanāḥ śṛṇu

ajānatā jānatā vā yatpāpaṃ tu bhavetkṛtam//
tatsarvaṃ nāśayenmartyo dānasyāsya prabhāvataḥ

yāvanmātraṃ kṛtaṃ pāpamatītaṃ nṛpasattama//
tāvanmātraṃ kṣayaṃ yāti tulāpuruṣadānataḥ

īśvarāṇāṃ samādiṣṭaṃ kāyakleśabhayātmanām//
puraścaraṇametaddhi dānaṃ taulyasamudbhavam

etaddattaṃ dilīpena kārtavīryeṇa bhūpate//
pṛthunā purukutsena tathānyairapi pārthivaiḥ

etatpuṇyaṃ praśasyaṃ ca sarvakāmapradaṃ nṛṇām/
tulāpuruṣadānaṃ ca sarvopadravanāśanam

ādhayo vyādhayo na syurna vaidhavyaṃ gadodbhavam//
saṃjāyate nṛpaśreṣṭha na viyogaḥ svabandhubhiḥ//
tulāpuruṣadānasya phalametadudāhṛtam

tulāpuruṣadānasya pradattasya nṛpottama//
na śakyate kathayituṃ phalaṃ yatsyātkalau yuge

dakṣiṇāmūrtimāsādya siddheśvaravibhoḥ puraḥ//
yaḥ prayacchati bhūpāla sahasraguṇitaṃ phalam

tasmātsarvaprayatnena prāpya siddheśvaraṃ vibhum//
tulāpuruṣadānaṃ ca kartavyaṃ suvivekinā/३९//
ekatra sarvatīrthāni sarvāṇyāyatanāni ca//
hāṭakeśvaraje kṣetre kathitāni svayaṃbhuvā

siddheśvaraḥ suraśreṣṭha ekatra samudāhṛtaḥ//
tasmindṛṣṭe tathā spṛṣṭe pūjite nṛpasattama//
sarveṣāṃ labhate martyaḥ phalaṃ yatparikīrtitam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrīsiddheśvaramāhātmye tulāpuruṣadānamāhātmyavarṇanaṃ nāma saptaṣaṣṭyuttaradviśatatamo'dhyāyaḥ