Skanda Purana · Chapter 6.265

ṛṣaya ūcuḥ//
prabhūtāni tvayoktāni vratāni niyamāstathā//
prasupte puṃḍarīkākṣe yeṣāṃ saṃkhyā na vidyate

aśaktyā hi śarīrasya niyamānāṃ kathaṃ caret//
vrataṃ hi sukumārāṃgo dānairvāpi vadasva naḥ

sūta uvāca//
aśakto niyamaṃ kartuṃ sukumāro bhavettu yaḥ//
tena tatra prakartavyaṃ vikhyātaṃ bhīṣmapaṃcakam

kārttikasya site pakṣa ekādaśyāṃ samāhitaḥ//
prātarutthāya vipreṃdra kartavyaṃ daṃtadhāvanam

tatastu niyamaṃ kuryādvāsudevaparāyaṇaḥ//
pūrvoktānāṃ ca sarveṣāṃ niyamānāṃ dvijottamāḥ

upavāsaḥ prakartavyastasminnahani bhaktitaḥ//
aśaktyā vā śarīrasya hemaṃ dadyātsvaśaktitaḥ

brāhmaṇāya haviṣyānnaṃ dātavyaṃ vaiṣṇavairnaraiḥ/
evaṃ pañcadinaṃ yāvatkartavyaṃ vratamuttamam

pūjanīyo hṛṣīkeśo jalaśāyisvarūpadhṛk//
gaṃdhairdhūpaiśca naivedyai rātrijāgaraṇairapi

ṣaṣṭhe'hani tato jāte pūjayedbrāhmaṇottamān//
tāṃśca vastrairhiraṇyena miṣṭānnena prabhaktitaḥ

tataḥ kṛtāṃjalirbhūtvā yācayedbrāhmaṇottamān//
sarve me niyamāḥ prāptā yuṣmākaṃ ca prasādataḥ

tatastairapi vaktavyaṃ caturmāsīsamudbhavam//
vratānāṃ niyamānāṃ ca vrataṃ bhūyāttavākhilam

tato visarjya tānviprānbhojanaṃ svayamācaret//
sarvāhāreṇa rājeṃdra paṃcagavyaprapūrvakam

yaḥ karoti vrataṃ tasya phalaṃ syādbahupuṇyadam//
yaḥ punarvratametaddhi kurute dinapaṃcakam//
upavāsaparastasya phalaṃ śataguṇaṃ bhavet

ekādaśyāṃ hareḥ pūjāṃ jātipuṣpaiḥ samācaret//
dvādaśyāṃ bilvapatreṇa śatapatryā tataḥ param//
trayodaśyāṃ caturdaśyāṃ surabhyā bhaktipūrvakam

bhṛṃgarājena puṇyena paurṇamāsyāṃ prapūjayet//
pratipaddivase sarvaiḥ pūjanīyo janārdanaḥ//
gomūtraṃ gomayaṃ kṣīraṃ dadhi sarpiḥ kuśodakam

pratipaddivase sarvānprāśayetkāyaśuddhaye//
agaraṃ guggulaṃ caiva karpūraṃ tagaraṃ tvacā

ekaikaṃ nirvapeddhūpaṃ pratipaddivase'khilam//
jalaśāyī jagadyoniḥ śeṣaparyaṃkamāśritaḥ

arghaṃ gṛhṇātu me devo bhīṣmapaṃcakasiddhaye//
maṃtreṇānena dātavyo hyargho devasya bhaktitaḥ

śaṃkhatoyaṃ samādāya sapuṣpaphalacaṃdanaiḥ//
naivedyaṃ paramānnaṃ ca svaśaktyā nirvapeddvijāḥ

etadvaḥ sarvamākhyātaṃ vrataṃ vai bhīṣmapaṃcakam//
saṃprāpyate phalaṃ caiva vratānāṃ niyamaiḥ saha

ṛṣaya ūcuḥ// yadetadbhavatā proktamaśūnyaśāyinīvratam//
indreṇa yatkṛtaṃ pūrvaṃ tuṣṭyarthaṃ cakrapāṇinaḥ//
prasuptasya mahābhāga phalaṃ caiva prakīrtitam

kasminkāle prakartavyaṃ kenaiva vidhinā tathā//
tasmātsūta mahābhāga vidhānaṃ vistarādvada

sūta uvāca//
śrāvaṇyāṃ samatītāyāṃ dvitīyādivase sthite//
prātarutthāya viprendrā nakṣatre viṣṇudaivate//
pāpiṣṭhaiḥ patitairmlecchaiḥ saṃbhāṣaṃ naiva kārayet

tato madhyāhnasamaye snātvā dhautāṃbaraḥ śuciḥ//
jalaśāyinamāsādya maṃtreṇānena pūjayet

śrīvatsadhāriñchrīkāṃta śrīdhāmañchrīpate'vyaya//
gārhasthyaṃ mā praṇāśaṃ me yātu dharmārthakāmadam

pitaro mā praṇaśyaṃtu mā praṇaśyaṃtu cāgnayaḥ//
devatā mā praṇaśyaṃtu matto dāṃpatyabhedataḥ

lakṣmyā viyujyase kṛṣṇa na kadācidyathā bhavān//
tathā kalatrasambandho deva mā me praṇaśyatu

lakṣmyā hyaśūnyaṃ śayanaṃ yathā te deva sarvadā//
śayyā mamāpyaśūnyāstu tathā janmani janmani

evamarthaṃ nivedyātha tato vipraṃ prapūjayet//
yathāśaktyā dvijaśreṣṭhā vittaśāṭhyaṃ vivarjayet

evaṃ bhādrapade māsi āśvine kārtike tathā//
pūjayecca jagannāthaṃ jalaśāyinamacyutam

akṣārabhojanaṃ kāryaṃ viśeṣāttailavarjitam//
samāptau ca tato dadyādbrāhmaṇeṃdrāya bhaktitaḥ

phalavrīhisamopetāṃ śayyāṃ vastrasamanvitām//
suvarṇaṃ dakṣiṇāyāṃ ca tathaiva ca phalaṃ labhet

evaṃ yaḥ kurute samyagvratametatsamāhitaḥ//
tasya tuṣṭipathaṃ yāti jalaśāyī jagadguruḥ

yathā śakrasya saṃtuṣṭaḥ pūrvameva dvijottamāḥ//
aśūnyaṃ śayanaṃ tasya bhavejjanmani janmani

aṣṭamāsakṛtaṃ pāpamajñānājjñānato'pi vā//
aśūnyaśayanātsarvaṃ vratānnāśaṃ nayetpumān

putrahīnā ca yā nārī kākavandhyā ca yā bhavet//
vidhavā yā karotyetadvratamevaṃ samāhitā//
tasyāstuṣṭo jagannāthaḥ kāyaśuddhiṃ prayacchati

na tasyā jāyate buddhiḥ kadācitpāpasaṃbhavā//
na kāmopahatā buddhiḥ kathaṃcidapi jāyate

kumārikāpi yā samyagvratametatsamācaret//
sā patiṃ labhate viprāḥ kulīnaṃ rūpasaṃyutam

niṣkāmaḥ kurute yastu vratametatsamāhitaḥ//
cāturmāsyudbhavānāṃ ca niyamānāṃ phalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye jalaśāyyupākhyāne aśūnyaśayanavratamāhātmyavarṇanaṃ nāma pañcaṣaṣṭyuttaradviśatatamo'dhyāyaḥ