Skanda Purana · Chapter 6.264

brahmovāca//
kārtikeyaśca pārvatyāḥ prāṇebhyaścātivallabhaḥ//
saṃkrīḍati samīpastho nānāceṣṭābhirudyataḥ

raktakāṃtirmahātejāḥ ṣaṇmukho'dbhuta vikramaḥ//
kvacidgāyati cātyarthaṃ kvacinnṛtyati svecchayā

mātaraṃ pitaraṃ dṛṣṭvā vinayāvanataḥ kvacit//
kvacicca gaṃgāpuline sikatālepanākṛtiḥ

gaṇaiḥ saha vicinvāno vividhānvanabhūruhān//
evaṃ prakrīḍitastasya divasāḥ paṃca jajñire

tato devā mahendrādyāstārakatrāsavidrutāḥ//
stuvantaḥ śaṃkaraṃ sarve tārakasya jighṛkṣayā

cakruḥ kumāraṃ senānyaṃ jāhnavyāṃ svagaṇaiḥ surāḥ//
sasvanurdevavādyāni puṣpavarṣaṃ papāta ha

vahnistu svāṃ dadau śaktiṃ himavānvāhanaṃ dadau//
sarvadevasamudbhūtagaṇakoṭisamāvṛtaḥ

praṇamya munisaṃghebhyaḥ prayayau ripuvigrahe//
tāmravatyāṃ nagaryāṃ ca śaṃkhaṃ dadhmau pratāpavān

tatastārakasainyasya daityadānavakoṭayaḥ//
samājagmustasya purācchaṃkhanādabhayāturāḥ

svavāhanasamārūḍhāḥ saṃyatā baladarpitāḥ//
devāḥ sarve'pi yuyudhuḥ skandatejopabṛṃhitāḥ

tadā dānavasainyāni nijaghāna ca sarvaśaḥ//
viṣṇucakreṇa te chinnāḥ petururvyāṃ sahasraśaḥ

tato bhagnāśca śataśo dānavā nihatāstadā//
nadyaḥ śoṇitasaṃbhūtā jātā bahuvidhāmune

tadbhagnaṃ dānavabalaṃ dṛṣṭvā sa yuyudhe raṇe//
babhaṃja sadyo deveśo bāṇajālairanekadhā

śaktināyudhya gaṃginyāścikṣepa kṛṣṇapreritāḥ//
sarathaṃ ca sayaṃtāraṃ cakre taṃ bhasmasātkṣaṇāt

śeṣāḥ pātālamagamanhataṃ dṛṣṭvā'tha tārakam//
tato devagaṇāḥ sarve śasaṃsustasya vikramam

devadundubhayo neduḥ puṣpavṛṣṭistathā'bhavat//
te labdhavijayāḥ sarve maheśvarapurogamāḥ

siṣicuḥ sarvadevānāṃ senāpatye ṣaḍānanam//
tataḥ skaṃdaṃ samāliṃgya pārvatī harṣagadgadā

māṃgalyāni tadā cakre svasakhībhiḥ samāvṛtā//
evaṃ ca tārakaṃ hatvā saptame'hani bālakaḥ

maṃdarācalamāsādya pitarau saṃpraharṣayan//
uvāca sakalaṃ skandaḥ paramānaṃdanirbharaḥ

kāle dārakriyāṃ tasya cintayāmāsa śaṃkaraḥ//
sa uvāca prasannātmā gāṃgeyamamitadyutim

prāptaḥ kālastava vibho pāṇigrahaṇasaṃmataḥ//
kuru dārānsamāsādya dharmaste puṃsasaṃmataḥ//२१/
krīḍasva vividhairbhogairvimānaiḥ saha kāmikaiḥ//
tacchrutvā bhagavānskandaḥ pitaraṃ vākyamabravīt//
ahameva hi sarvatra dṛśyaḥ sarvagaṇeṣu ca//
dṛśyādṛśyapadārtheṣu kiṃ gṛhṇāmi tyajāmi kim

yāḥ striyaḥ sakalā viśve pārvatyā tāḥ samā hi me//
narāḥ sarve'pi deveśa bhavadvattānvilokaye

tvaṃ gururmāṃ ca rakṣasva punarnarakamajjanāt//
yena jñātamidaṃ jñānaṃ tvatprasādādakhaṃḍitam

punareva mahāghorasaṃsārābdhau nimajjaye//
dīpahasto yathā vastu dṛṣṭvā tatkaraṇaṃ tyajet

tathā jñānamadhiprāpya yogī tyajati saṃsṛtim//
jñātvā sarvagataṃ brahma sarvajña parameśvara

nivarttaṃte kriyāḥ sarvā yasya taṃ yoginaṃ viduḥ//
viṣaye lubdhacittānāṃ vane'pi jāyate ratiḥ

sarvatra samadṛṣṭīnāṃ gehe muktirhi śāśvatī//
jñānameva maheśāna manuṣyāṇāṃ sudurlabham

labdhaṃ jñānaṃ kathamapi paṃḍito naiva pātayet//
nāhamasmi na mātā me na pitā na ca bāṃdhavaḥ

jñānaṃ prāpya pṛthakbhāvamāpanno bhuvaneṣvaham//
prāpyaṃ bhāgamidaṃ daivātprabhāvāttava nārhasi

vaktumevaṃvidhaṃ vākyaṃ mumukṣorme na saṃśayaḥ//
yadāgrahaparā devī punaḥpunarabhāṣata

tadā tau pitarau natvā gato'sau krauñcaparvatam//
tatrāśrame mahāpuṇye cacāra paramaṃ tapaḥ

jajāpa paramaṃ brahma dvādaśākṣarabījakam//
pūrvaṃ dhyānena sarvāṇi vaśīkṛtyendriyāṇi ca

mamatāṃ saṃviyujyātha jñānayogamavāptavān//
siddhayastasya nirvighnā aṇimādyā yadā''gatāḥ

tadā tāsāṃ gaṇā kruddho vākyametaduvāca ha//
mamāpi duṣṭabhāvena yadi yūyamupāgatāḥ

tadāsmatsamaśāṃtānāṃ nābhibhūtiṃ kariṣyatha//
evaṃ jñātvā maheśo'pi yato jñānamahodayam

matto'pi jñānayogenaskando'pyadhikabhāvabhṛt//
vismayāviṣṭahṛdayaḥ pārvatīmanuśiṣṭavān

putraśokaparāṃ comāṃ śubhairvākyāmṛtairharaḥ//
cāturmāsasya māhātmyaṃ sarvapāpapraṇāśanam

maheśvaro vā madhukaiṭabhārirhṛdyāśrito dhyānamayo'dvitīyaḥ//
abhedabuddhyā paramārtihaṃtā ripuḥ sa evātipriyo bhavettataḥ

sūta uvāca//
etadvaḥ kathitaṃ viprāścāturmāsyasamudbhavam//
māhātmyaṃ vistareṇaiva kimanyacchrotumicchatha

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye tārakāsuravadho nāma catuḥṣaṣṭyuttaradviśatatamo'dhyāyaḥ