Skanda Purana · Chapter 6.258

// gālava uvāca // //
pravṛttāyāṃ śailaputryāṃ mahattapasi dāruṇe //
kandarpeṇa parābhūto vicacāra mahīṃ haraḥ

vṛkṣacchāyāsu tīrtheṣu nadīṣu ca nadeṣu ca //
jalena siṃcatsvavapuḥ sarvatrāpi maheśvaraḥ

tathāpi kāmākulito na lebhe śarma karhicit //
ekadā yamunāṃ dṛṣṭvā jalakallolamālinīm //

vigāhituṃ manaścakre tāpārtiṃ śamayanniva //
kṛṣṇaṃ babhūva tannīraṃ harakāyāgnivahninā

dagdhaṃ vigāhanenāśu maṣīprāyaṃ tadā babhau १/
sā'pi divyavapuḥ pūrvaṃ śyāmā bhūtvā harādyataḥ

stutvā natvā maheśānamuvāca punareva sā //
prasādaṃ kuru deveśa vaśagāsmi sadā tava

// īśvara uvāca // //
asmiṃstīrthavarepuṇye yaḥ snāsyati naro bhuvi //
tasya pāpasahasrāṇi yāsyaṃti vilayaṃ dhruvam १/ ७ //
haratīrthamiti khyātaṃ puṇyaṃ loke bhaviṣyati //
ityuktvā tāṃ praṇamyātha tatraivāṃtaradhīyata

tasyāstīre maheśo'pi kṛtvā rūpaṃ manoharam //
kāmālayaṃ vādyahastaṃ kṛtapuṃḍraṃ jaṭādharam

svecchayā munigeheṣu darśayatyaṃgacāpalam //
kvacidgāyati gītāni kvacinnṛtyati chandataḥ

sa ca kruddhyati hasati strīṇāṃ madhyagataḥ kvacit //
evaṃ vicaratastasya ṛṣipatnyaḥ samaṃtataḥ

patyuḥ śuśrūṣaṇaṃ gehe tyaktvā kāryāṇyapi kṣaṇāt //
tameva manasā cakruḥ patirūpeṇa mohitāḥ

bhramaṃtyaścaiva hāsyāni cakrustā api yoṣitaḥ //
tatastu munayo dṛṣṭvā tāsāṃ duḥśīlabhāvanām

cukrudhurmunayaḥ sarve rūpaṃ tasya manoharam //
gṛhyatāṃ hanyatāmeṣa ko'yaṃ duṣṭa upāgataḥ

iti te gṛhya kāṣṭhāni yadopasthe yayustadā //
palāyitaḥ sa bahudhā bhayātteṣāṃ mahātmanām

yo jīvakalayā viśvaṃ vyāpya tiṣṭhati dehinām //
na jñāyate na ca grāhyo na bhedyaścāpi jāyate

na śekuste yadā sarve grahītuṃ taṃ maheśvaram //
tadā śivaṃ prakupitā śepuritthaṃ dvijātayaḥ

yasmālliṃgārthamāgatya hyāśramāṃścoravatkṛtam //
paradārāpaharaṇaṃ talliṅgaṃ patatāṃ bhuvi

sadya eva hi śāpaṃ tvaṃ duṣṭaṃ prāpnuhi tāpasa //
evamukte sa śāpāgnirvajrarūpadharo mahān

talligaṃ dhūrjaṭeśchittvā pātayāmāsa bhūtale //
rudhiraughaparivyāpto mumoha bhagavānvibhuḥ

vedanārttojjvalavapurmahāśāpābhibhūtadhīḥ //
taṃ tathā patitaṃ dṛṣṭvā ta ājagmurmaharṣayaḥ

ākāśe sarvabhūtāni tresurviśvaṃ cacāla ha //
devāśca vyākulā jātā mahābhayamupāgatāḥ

jñātvā viprā maheśānaṃ pīḍitā hṛdaye'bhavan //
śuśucurbhṛśaduḥkhārtā daivaṃ hi balavattaram

kiṃ kṛtaṃ bhagavāneṣa devairapi sa sevyate //
sākṣī sarvasya jagato'smābhirnaivopalakṣitaḥ

vayaṃ mūḍhadhiyaḥ pāpāḥ paramajñānadurbalāḥ//
kathamasmābhiryasyātmā śrutaśca na niveditaḥ

mayedṛśo gṛhasthāya hyātmā'yaṃ na niveditaḥ //
nirvikāro nirviṣayo nirīho nirupadravaḥ

nirmamo nirahaṃkāro yaḥ śaṃbhurnopalakṣitaḥ //
yasya lokā ime sarve dehe tiṣṭhaṃti madhyagāḥ

sa eṣa jagatāṃ svāmī haro'smābhirna vīkṣitaḥ //
ityuktvā te hyupaviṣṭā yāvattatra samāgatāḥ

tāndṛṣṭvā sahasā trastaḥ punareva maheśvaraḥ //
vipraśāpabhayānnaṣṭastripurārirdivaṃ yayau

surabhiṃ gāṃ ca goloke tāṃ tuṣṭāva susaṃyataḥ १/
sṛṣṭisthiti vināśānāṃ kartryai mātre namonamaḥ

yā tvaṃ rasamayairbhāvairāpyāyasi bhūtalam //
devānāṃ ca tathāsaṃghānpitṝṇāmapi vai gaṇān // ३१ १/
sarvai rjñātā rasābhijñairmadhurāsvādadāyinī //
tvayā viśvamidaṃ sarvaṃ balasnehasamanvitam

tvaṃ mātā sarvarudrāṇāṃ vasūnāṃ duhitā tathā //
ādityānāṃ svasā caiva tuṣṭā vāṃcchitasiddhidā

tvaṃ dhṛtistvaṃ tathā puṣṭistvaṃ svāhā tvaṃ svadhā tathā //
ṛddhiḥ siddhistathā lakṣmīrdhṛtiḥ kīrti stathā matiḥ

kāṃtirlajjā mahāmāyā śraddhā sarvārthasādhinī //
tvayā virahitaṃ kiṃcinnāsti tribhuvaneṣvapi

vahnestṛptipradātrī ca devādīnām ca tṛptidā //
tvayā sarvamidaṃ vyāptaṃ jagatsthāvarajaṃgamam

pādāste vedāścatvāraḥ samudrāḥ stanatāṃ yayuḥ //
caṃdrārkau locane yasyā romāgreṣu ca devatāḥ

śṛṅgayoḥ parvatāḥ sarve karṇayorvāyavastathā //
nābhau caivāmṛtaṃ devi pātālāni khurāstathā

skandhe ca bhagavānbrahmā mastakasthaḥ sadāśivaḥ //
hṛddeśe ca sthito viṣṇuḥ pucchāgre pannagāstathā

śakṛtsthā vasavaḥ sarve sādhyā mūtrasthitāstava //
sarve yajñā hyasthideśe kinnarā guhyasaṃsthitāḥ

pitṝṇāṃ ca gaṇāḥ sarve puraḥsthā bhāṃti sarvadā //
sarve yakṣā bhāladeśe kinnarāśca kapolayoḥ

sarvadevamayī tvaṃ hi sarvabhūtavivṛddhidā //
sarvalokahitā nityaṃ mama dehahitā bhava

praṇatastava deveśi pūjaye tvāṃ sadā'naghe //
staumi viśvārtihantrīṃ tvāṃ prasannā varadā bhava

vipraśāpāgninā dagdhaṃ śarīraṃ mama śobhane //
svatejasā punaḥ karttumarhasyamṛtasaṃbhave

ityuktvā tā parikramya tasyā dehe layaṃ gataḥ //
sā'pi garbhe dadhārātha surabhistadanantaram

kālātikramayogena sarvavyākulatāṃ yayau //
yasminpranaṣṭe deveśe vipraśāpabhayāvṛte

devā mahārtiṃ prayayuścacāla pṛthivī tathā //
caṃdrārkau niṣprabhau caiva vāyuruccaṇḍa eva ca

samudrāḥ kṣobhamaga maṃstasminkāle dvijottama

yasmiñjagatsthāvarajaṃgamādikaṃ kāle layaṃ prāpya punaḥ prarohati //
tasminpranaṣṭe dvijaśāpapīḍite jayaddhataprāya mavartata kṣaṇāt

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye haraśāpo nāmāṣṭapaṃcāśaduttaradviśatatamo'dhyāyaḥ