Skanda Purana · Chapter 6.257

// pārvatyuvāca // //
dvādaśākṣaramāhātmyaṃ mama vistarato vada //
yathāvarṇaṃ yatphalaṃ ca yathā ca kriyate mayā

// śrīmahādeva uvāca // //
dvijātīnāṃ sahoṃkārasahito dvādaśākṣaraḥ //
strīśūdrāṇāṃ namaskārapūrvakaḥ samudāhṛtaḥ

prakṛtīnāṃ rāmanāma saṃmato vā ṣaḍakṣaraḥ //
so'pi praṇavahīnaḥ syātpurāṇasmṛtinirṇayaḥ

kramo'yaṃ sarvavarṇānāṃ prakṛtīnāṃ sadaiva hi //
krameṇa rahito yastu karoti manujo japam //
tasya prakupyati vibhurnarakādipradāyakaḥ

// pārvatyuvāca // //
mayā trimātrayā svāminsevyate jagadīśvaraḥ //
rūpamasya kathaṃ jāne vacasāmapyagocaram

// īśvara uvāca / //
praṇavasyādhikāro na tavāsti varavarṇini //
namo bhagavate vāsudevāyeti japaḥ sadā

// pārvatyuvāca // //
yadi sapraṇavaṃ dadyāddvādaśākṣaraciṃtanama //
praṇave nādhikāro me kathaṃ bhavati dhūrjaṭe / ७ // //
// īśvara uvāca // //
praṇavaḥ sarvadevānāmādireṣa prakīrtitaḥ //
brahmā viṣṇuḥ śivaścaiva vasaṃti dayitāyutāḥ

tatra sarvāṇi bhūtāni sarva tīrthāni bhāgaśaḥ //
tiṣṭhaṃti sarvatīrthāni kaivalyaṃ brahma eva yaḥ

tasya yogyā tadā devi bhaviṣyasi yadā tapaḥ //
cāturmāsye hariprītyai kariṣyasi śubhānane

tapasā prāpyate kāmastapasā ca mahatphalam //
tapasā jāyate sarvaṃ tattapaḥ sulabhaṃ naraiḥ

yaśaḥ saubhāgyamatulaṃ kṣamāsatyādayo guṇāḥ //
sulabhaṃ tapasā nityaṃ tapaścarttuṃ na śakyate

yadā hi tapaso vṛddhistadā bhaktirharau bhavet //
tadā hi tapaso hāniryadā bhaktiṃ vinā kṛtam

tāvattapāṃsi garjaṃti dehe'sminsatataṃ nṛṇām //
yadā viṣṇuṃ smarennityaṃ jihvāgraṃ pāvanaṃ bhavet

yathā pradīpe jvalite praṇaśyati mahattamaḥ //
tathā hareḥ kathāyāṃ ca yāti pāpamanekadhā

tasmātpārvati yatnena harau supte tapaḥ kuru //
cāturmāsye'tha saṃprāpte praṇavena samanvitam

viśuddhahṛdayā bhūtvā mantrarājamimaṃ japa/ //
sa eva bhagavāṃstuṣṭo dvādaśākṣarasaṃyutam

pradāsyati paraṃ jñānaṃ brahmarūpamakhaṇḍitam /
brahmakalpāṃtakoṭīṣu japa tvaṃ dvādaśākṣaram

mantrarājaṃ sapraṇavaṃ dhyāyetso'pi na paśyati //
ityuktā sā taponiṣṭhā tapaścaritumāgatā

himācalasya śikhare cāturmāsye samāgate //
brahmacaryavrataparā vasanatrayasaṃyutā

prātarmadhye'parāhne ca dhyāyantī hariśaṃkaram //
vapuryathā purā kṛṣṭaṃ pūjane śaṃkarasya ca

sakhījana samāyuktā pituḥ śṛṃge manohare //
atapatsā viśālākṣī kṣamādiguṇasaṃyutā

// gālava uvāca // //
yā hi yogīśvaradhyeyā yā vandyā viśvavanditā //
jananī yā ca viśvasya sā'pi kāmāttapogatā

yā hi prakṛtisadrūpā taḍitkoṭisamaprabhā //
virajā yā svayaṃ vandyā guṇātītācarattapaḥ

pṛthvyaṃbu tejo vāyuśca gaganaṃ yanmayaṃ viduḥ //
mūlaprakṛtirūpā yā sā cakārottama tapaḥ

yā sthāvaraṃ jaṃgamamāśu viśvaṃ vyāpya sthitā yā prakṛteḥ purāpi //
spṛhādirūpeṇa ca tṛptidātrī deve prasupte tapasā''pa śuddhim

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye dvādaśākṣaranāmamahimapūrvakapārvatītapovarṇanaṃ nāma saptapaṃcāśaduttaraśatatamo'dhyāyaḥ