Skanda Purana · Chapter 6.256

// gālava uvāca // //
ekadā bhagavānrudraḥ kailāsaśikhare sthitaḥ //
dadhāra paramāṃ lakṣmīmumayā sahitaḥ kila

gaṇānāṃ koṭayastisrastaṃ yadā paryavārayan //
vīrabāhurvīrabhadro vīrasenaśca bhṛṅgirāṭ

rucistuṭistathā nandī puṣpadantastathotkaṭaḥ //
vikaṭaḥ kaṇṭakaścaiva haraḥ keśo vighaṃṭakaḥ

mālādharaḥ pāśadharaḥ śṛṅgī ca naranastathā //
puṇyotkaṭaḥ śālibhadro mahābhadro vibhadrakaḥ

kaṇapaḥ kālapaḥ kālo dhanapo raktalocanaḥ //
vikaṭāsyo bhadrakaśca dīrghajihvo virocanaḥ

pārado ghanado dhvāṃkṣī haṃsakrī narakastathā //
paṃcaśīrṣastriśīrṣaśca kroḍadaṃṣṭro mahādbhuta

siṃhavaktro vṛṣahanuḥ pracaṇḍastuṃḍireva ca //
ete cānye ca bahavastadā bhavasamīpagāḥ

mahādeva jayetyuccairbhadrakālīsamanvitāḥ //
bhūtapretapiśācānāṃ samūhā yasya vallabhāḥ

astuvaṃstaṃ samīpasthā vasante samupāgate //
vanarājirvibhāti sma navakorakaśobhitā

dakṣiṇānilasaṃsparśaḥ kavīnāṃ sukhakṛdbabhau //
viyogihṛdayākarṣī kiṃśukaḥ puṣpaśobhitaḥ //

dvandvādivikriyābhāvaṃ cikrīḍuśca samaṃtataḥ //
tasminvigāḍhe samaye manasyunmādake tathā

naṃdī daṃḍadharaḥ saṃjñāṃ dṛṣṭvā cakre haro paraḥ//
alaṃ cāpaladoṣeṇa tapaḥ kurvaṃtu bho gaṇāḥ

tadā sarve vanamapi bhūkāṃḍajamabhūtpunaḥ //
gaṇāste tapa ātasthurdṛṣṭvā kāntiṃvasantajām

tataḥ sā viśvajananī pārvatī prāha śaṃkaram //
iyaṃ te karagā nityamakṣamālā maheśvara

tvayā kiṃ japyate deva saṃdehayati me manaḥ //
tvamekaḥ sarva bhūtānāmādikṛtsakaleśvaraḥ

na mātā na pitā baṃdhustava jātirna kaścana //
ahaṃ tava paraṃ kiṃcidvedmi nāstīti kiṃcana

śrameṇa tvaṃ samāyukto śvāsocchvāsaparāyaṇaḥ//
japannapi mahābhaktyā dṛśyase tvaṃ mayā sadā

tvattaḥparataraṃ kicidyattvaṃ dhyāyasi cetasā //
tanme kathaya deveśa yadyahaṃ dayitā tava

iti spṛṣṭastadā śaṃbhuruvāca harisevakaḥ //
harernāmasahasrāṇāṃ sāraṃ dhyāyāmi nityaśaḥ

japāmi rāmanāmāṃkamavātaraṃ(?) sasaptamam//
caturviśatisaṃkhyākānprādurbhāvānharerguṇān

eteṣāmapi yatsāraṃ praṇavākhyaṃ mahatphalam //
dvādaśākṣarasaṃyuktaṃ brahmarūpaṃ sanā tanam

akṣaratrayasaṃbaddhaṃ grāmatrayasamanvitam //
sabiṃduṃ praṇavaṃ śaśvajjapāmi japamālayā

vedasāramidaṃ nityaṃ dvyakṣaraṃ satatodyatam //
nirmalaṃ hyamṛtaṃ śāṃtaṃ sadūpamamṛtopamam

kalātītaṃ nirvaśagaṃ nirvyāpāraṃ mahatparam //
viśvādhāraṃ jaganmadhyaṃ koṭibrahmāṃḍabījakam

jaḍaṃ śuddhakriyaṃ vāpi niraṃjanaṃ niyāmakam //
yajjñātvā mucyate kṣipraṃ ghorasaṃsārabaṃdhanāt

oṃkārasahitaṃ yacca dvādaśākṣarabījakam //
japataḥ pāpakoṭīnāṃ dāvāgnitvaṃ prajāyate

etadeva paraṃ guhyametadeva paraṃ mahaḥ //
etaddhi durlabhaṃ loke lokatrayavibhūṣaṇam

prāpyate janmakoṭībhiḥ śubhāśubhavināśakam //
etadeva paraṃ jñānaṃ dvādaśākṣaracintanam

cāturmāsye viśeṣeṇa brahmadaṃ ciṃtitapradam //
etadakṣarajaṃ stotraṃ yaḥ samāśrayate sadā

manasā karmaṇā vācā tasya nāsti punarbhavaḥ //
dvādaśākṣarasaṃyuktaṃ cakradvādaśabhūṣitam

māsadvādaśanāmāni viṣṇoryo bhaktitatparaḥ //
śālagrāmeṣu tānyuktvā nyasedaghaharāṇi ca

divasedivase tasya dvādaśāhaphalaṃ labhet //
dvādaśākṣara māhātmyaṃ varṇituṃ naiva śakyate

jihvāsahasrairapi ca brahmaṇāpi na vāryate //
mahāmantro hyayaṃ loke japyo dhyātaḥ stutastathā

pāpahā sarvamāseṣu cāturmāsye viśeṣataḥ //
idaṃ rahasyaṃ vedānāṃ purāṇānāmanekaśaḥ

smṛtīnāmapi sarvāsāṃ dvādaśākṣaracintanam//
ciṃtanādeva martyānāṃ siddhirbhavati hīpsitā

puṇyadānena yāmyena muktirbhavati śāśvatī //
varṇaistathāśramaireva praṇavena samanvitaiḥ

japairdhyānaiḥ śamaparairmokṣaṃ yāsyeta niścitama //
śūdrāṇāṃ cāpi nārīṇāṃ praṇavena vivarjitaḥ

prakṛtīnāṃ ca sarvāsāṃ na mantro dvādaśākṣaraḥ //
na japo na tapaḥ kāryaṃ kāyakleśādviśuddhitā

viprabhaktyā ca dānena viṣṇudhyānena siddhyati //
tāsāṃ mantro rāmanāma dhyeyaḥ koṭyadhiko bhavet

rāmeti dvyakṣarajapaḥ sarvapāpāpanodakaḥ //
gacchaṃstiṣṭhañchayāno vā manujo rāmakīrtanāt

iha nirvartato yāti prānte harigaṇo bhavet //
rāmeti dvyakṣaro mantro maṃtrakoṭiśatādhikaḥ

sarvāsāṃ prakṛtīnāṃ ca kathitaḥ pāpanāśakaḥ //
cāturmāsye'tha saṃprāpte so'pyanaṃtaphalapradaḥ

cāturmāsye mahāpuṇye labhyate bhaktitatparaiḥ //
devavanniṣphalaṃ teṣāṃ yamalokasyasevanam

na rāmādadhikaṃ kiṃcitpaṭhanaṃ jagatītale //
rāmanāmāśrayā ye vai na teṣāṃ yamayātanā

ye ca doṣā vighnakarā mṛtakā vigrahāśca ye //
rāma nāmaiva vilayaṃ yāṃti nātra vicāraṇā

ramate sarvabhūteṣu sthāvareṣu careṣu ca //
antarātmasvarūpeṇa yacca rāmeti kathyate // ४६ /
rāmeti matrarājo'yaṃ bhayavyādhiniṣūdakaḥ //
raṇe vijayadaścāpi sarvakāryārthasādhakaḥ

sarvatīrthaphalaḥ prokto viprāṇāmapi kāmadaḥ //
rāmacandreti rāmeti rāmeti samudāhṛtaḥ

dvyakṣaro mantrarājo'yaṃ sarvakāryakaro bhuvi //
devā api pragāyaṃti rāmanāmaguṇākaram

tasmāttvamapi deveśi rāmanāma sadā vada //
rāmanāma japedyo vai mucyate sarvakilbiṣaiḥ

sahasranāmajaṃ puṇyaṃ rāmanāmnaiva jāyate //
cāturmāsye viśeṣeṇa tatpuṇyaṃ daśadhottaram

hīnajātiprajātānāṃ mahadahyati pātakam

rāmo hyayaṃ viśvamidaṃ samayaṃ svatejasā vyāpya janāṃtarātmanā //
punāti janmāṃtarapātakāni sthūlāni sūkṣmāṇi kṣaṇācca dagdhvā

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye rāmanāmamahimavarṇanaṃ nāma ṣaṭpaṃcāśaduttaradviśatatamo'dhyāyaḥ