Skanda Purana · Chapter 6.255

gālava uvāca // //
evaṃ te labdhaśāpāśca pārvatīśāpa pīḍitāḥ //
anapatyā babhūvuśca tathā ca pratimānavāḥ

śālagrāmastu gaṃḍakyāṃ narmadāyāṃ maheśvaraḥ //
utpadyate svayaṃbhūśca tāvetau naiva kṛtrimau

caturviṃśatibhedena śālagrāmagato hariḥ //
parīkṣyaḥ puruṣairnityamekarūpaḥ sadāśivaḥ

śālagrāmaśilā yatra gaṃḍakīvimale jale //
tatra snātvā ca pītvā ca brahmaṇaḥ padamāpnuyāt

tāṃ pūjayitvā vidhivadgaṃḍakīsaṃbhavāṃ śilām //
yogīśvaro viśuddhātmā jāyate nātra saṃśayaḥ

etatte kathitaṃ sarvaṃ yatpṛṣṭo'hamiha tvayā //
yathā haro vipraśāpaṃ prāptavāṃstanniśāmaya

yaḥ śṛṇoti naro bhaktyā vācyamānāmimāṃ kathām //
girīśanṛtyasaṃbandhāmumādehārddhavarṇitām

brahmaṇaḥ stutisaṃyuktāṃ sa gacchetparamāṃ gatim //
ślokārddhaṃ ślokapādaṃ vā samastaṃ ślokameva vā

yaḥ paṭhedavirodhena māyāmānavivarjitaḥ //
sa yāti paramaṃ sthānaṃ yatra gatvā na śocati

cāturmāsye viśeṣeṇa paṭhañchṛṇvannarottamaḥ //
labhate ciṃtitāṃ siddhiṃ dhanaputrādisaṃvṛtaḥ

/
yathā brahmādayo devā gītavādyābhiyogataḥ //
parāṃ siddhi mavāpuste durgāśivasamīpataḥ

varṣākāle ca saṃprāpte bhaktiyoge janārdane //
maheśvare'tha durgāyāṃ na bhūyaḥ stanapo bhavet

gaṇeśasya sadā kuryāccāturmāsye viśeṣataḥ //
pūjāṃ manuṣyo lābhārthaṃ yatno lābhaprado hi saḥ

sūryo nīrogatāṃ dadyādbhaktyā yaiḥ pūjyate hi saḥ//
cāturmāsye samāyāte viśeṣaphalado nṛṇām

idaṃ hi paṃcāyatanaṃ sevyate gṛhamedhibhiḥ //
cāturmāsye viśeṣeṇa sevitaṃ ciṃtitapradam

śālagrāmagataṃ viṣṇuṃ yaḥ pūjayati nityadā //
dvāravatīcakraśilāsahitaṃ mokṣadāyakam

cāturmāsye viśeṣeṇa darśanādapi muktidam //
yasminstute stutaṃ sarvaṃ pūjite pūjitaṃ jagat

pūjitaḥ paṭhito dhyātaḥ smṛto vai kaluṣāpahaḥ //
śālagrāme kiṃ punaryacchālagrāmagato hariḥ

punarhi harinaivedyaṃ phalaṃ cāpi dhṛtaṃ jalam //
cāturmāsye viśeṣeṇa śālagrāmagataṃ śubham

tilāḥ punaṃtyarpitāśca śālagrāmasya śūdraja //
cātumāsye viśeṣeṇa naraṃ bhaktyā samanvitam

sa lakṣmīsahito nityaṃ dhanadhānyasamanvitaḥ //
mahābhāgyavatāṃ gehe jāyate nātra saṃśayaḥ

sa lakṣmīsahito viṣṇurvijñeyo nātra saṃśayaḥ //
taṃ pūjayenmahābhaktyā sthirā lakṣmīrgṛhe bhavet

tāvaddaridratā loke tāvadgarjati pātakam //
tāvatkleśāḥ śarīre'sminna yāvatpūjayeddharim

sa eva pūjyate yatra paṃcakrośaṃ pavitrakam //
karoti sakalaṃ kṣetraṃ na tavā'śubhasaṃbhavaḥ

etadeva mahābhāgyametadevamahātapaḥ //
eṣa eva paro mokṣo yatra lakṣmīśapūjanam

śaṃkhaśca dakṣiṇāvartto lakṣmīnārāyaṇātmakaḥ //
tulasī kṛṣṇasāro'tra yatra dvāravatī śilā //
tatra śrīrvijayo viṣṇurmuktirevaṃ catuṣṭayam

lakṣmīnārāyaṇe pūjāṃ vidhāturmanujasya tu //
dadāti puṇyamatulaṃ mukto bhavati tatkṣaṇāt

cāturmāsye viśeṣeṇa pūjyo lakṣmīyuto hariḥ

kurvatastasya devasya dhyānaṃ kalmaṣanāśanam //
tulasīmañjarībhiśca pūjito janmanāśanaḥ

pūjito bilvapatreṇa cāturmāsye'ghahṛttamaḥ

sarvaprayatnena sa eva sevyo yo vyāpya viśvaṃ jagatāmadhīśaḥ //
kāle sṛjatyatti ca helayā vā taṃ prāpya bhakto na hi sīdatīti

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye lakṣmīnārāyaṇamahimavarṇanaṃnāma pañcapañcāśaduttaradviśatatamoadhyāyaḥ