Skanda Purana · Chapter 6.253

// śūdra uvāca // //
pārvatīkupitā devī kathaṃ devena śūlinā //
prasādaṃ ca gatā śaptvā yatkopātkṣubhyate jagat

kathaṃ sa bhagavānrudro bhāryāśāpamavāpa ha //
vaikṛtaṃ rūpamāsādya punardivyaṃ vapuḥ śritaḥ

// gālava uvāca // //
devā rūpāṇyadṛśyāni kṛtvā devyā mahābhayāt//
manuṣyaloke sakale pratimāsu ca saṃsthitāḥ

teṣāmapi prasannā sā'nugrahaṃ samupākarot //
viṣṇustutā mahābhāgā viśvamātā'ghanāśinī // ४ [/
teṣāṃ balācca pārvatyāḥ śāpabhāreṇa yantritaḥ //
tāṃ nityamevānunayannṛce sovāca śaṃkaram

ete devā viśva pūjyā viśvasya ca varapradāḥ //
matprasādādbhaviṣyaṃti bhaktitastoṣitā naraiḥ

tvāmṛte mama karmedaṃ kṛtaṃ sādhuvininditam //
vedyāṃ vivāha kāle ca pratyakṣaṃ sarvasākṣikam

yatsaptamaṃḍalānāṃ ca gamanaṃ ca karārpaṇam //
vahniśca varuṇaḥ kṛṣṇo devatāśca savallabhāḥ

caturdikṣvaṃga saṃyuktā devabrāhmaṇasaṃyutāḥ //
eteṣāmagrato dibyaṃ kṛtvā tvaṃ janasaṃsadi

pramādātsattvamāpanno vyabhicāraṃ kathaṃ kṛthāḥ //
guruvo'pi na sanmārge pravarttaṃte janaughavat

nigrāhyāḥ sarvalokeṣu prabuddhaiḥ śrūyate śrutau //
putreṇāpi pitā śāsyaḥ śiṣyeṇāpi guruḥ svayam

kṣatriyairbrāhmaṇaḥ śāsyo bhāryayā ca patistathā //
unmārgagāminaṃ śreṣṭhamapi vedāntapāragam

nīcairapi praśāsyeta śrutirāha sanātanī //
sanmārga eva sarvatra pūjyate nāpathaḥ kvacit

yena svakulajo dharmastyaktaḥ sa patito bhavet //
mṛtaśca narakaṃ prāpya duḥkhabhāreṇa yujyate //

dharmaṃ tyajati nāstikyājjñātibhedamupāgataḥ //
sa nigrāhyaḥ sarvalokairmanudharmaparāyaṇaiḥ

kuladharmāñjñātidharmāndeśadharmānmaheśvara //
ye tyajaṃti ca te'vaśyaṃ kulācca patitā janāḥ

agnityāgo vratatyāgo vacanatyāga eva ca //
dharmatyāgo naiva kāryaḥ kurvanpatita eva hi //

na pitā na ca te mātā na bhrātā svajano'pi ca //
paśyate tava vārtāṃ ca aspṛśyastvamadanviṣam

asthimālācitābhasma jaṭādhārī kucailavān //
capalo muktamaryādastasthuṃ nārhasi me'grataḥ

abrahmaṇyo'vratī bhikṣurduṣṭātmā kapaṭī sadā //
nārhasi tvaṃ mama puraḥ saṃbhāṣayitumīśvara

evaṃ sā rudatī devī bāṣpavyākulalocanā //
mahāduḥkhayutaivāsīddeveśe'nunayatyapi

punareva prakupitā haraṃ provāca bhāminī //
tavārjavaṃ na hṛdaye kāṭhinyaṃ vedmi nityadā

brāhmaṇaistvāsurairuktaṃ tanmṛṣā pratibhāti me //
yasmānmayi mahāduṣṭabhāva eva kṛtastvayā

brāhmaṇā vaṃcitā yasmādbrāhmaṇaistvaṃ haniṣyase //
evamuktvā bhagavatī punarāha na kiñcana

īśaḥ prasannavadanāmupacārairathākarot //
śanairnītimayairvākyairhetumadbhirmaheśvaraḥ

prasannalocanāṃ jñātvā kiṃcitprāha harastataḥ //
kopena kaluṣaṃ vaktraṃ pūrṇacandra samaprabham

kasmāttvaṃ kuruṣe bhadre yuktameva vaco na te //
sarvabhūtadayā kāryā prāṇināṃ hi hitecchayā

yadyapīṣṭo hi yasyārtho na kāryaṃ parapīḍanam //
jagatsarvaṃ sutaprāyaṃ tavāsti varavarṇini

jagatpūjyā tvamevaikā sarvarūpadharānaghe //
mayā yadi kṛtaṃ karmāvadyaṃ deva hitāya vai

tathāpyevaṃ tava suto bhaviṣyati na saṃśayaḥ //
athavā mama sarvebhyaḥ prāṇebhyo'pi garīyasī

yadicchasi tathā kuryāṃ tathā tava manorathān//
prasannavadanā bhūtvā kathayasva varānane

ityuktā sā bhagavatī punarāha maheśvaram //
cāturmāsye ca saṃprāpte mahāvrata dharo yadi

devatānāṃ ca pratyakṣaṃ tāṃḍavaṃ nartase yadi //
pārayitvā vrataṃ samyagbrahmacaryaṃ maheśvara // ३३ [/
matprītyai yadi dehārthaṃ vaiṣṇavaṃ ca prayacchasi //
śāpasyānugrahaṃ kuryāṃ prasavavadanā satī

nānyathā mama cittaṃ tvāṃ viśvāsamanugacchati //
tacchrutvā bhagavāṃstuṣṭastatheti pratyuvāca tām

sāpi hṛṣṭā bhagavatī śāpasyānugrahe vṛtā

idaṃ purāṇaṃ manujaḥ śṛṇoti śraddhāyukto bhedabuddhyā dṛḍhatvam //
tasyā vaśyaṃ jīvitaṃ sarvasiddhaṃ martyāḥ satyāttacchrayatvaṃ prayāṃti

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye śaṃkarakṛtapārvatyanunayo nāma tripaṃcāśaduttaradviśatatamo'dhyāyaḥ //