Skanda Purana · Chapter 6.251

// gālava uvāca // //
ityuktvā''kāśajāvāṇī virarāma śubhapradā //
te'pi devāstadāścaryaṃ mahaddṛṣṭvā mahāvratāḥ

catuṣṭayaṃ ca vṛkṣāṇāṃ cāturmāsye samāgate //
apūjayaṃśca vidhivadaikyabhāvena śūdraja

cāturmāsye'tha saṃpūrṇe devo hariharātmakaḥ //
prasannastānuvācātha bhaktyā pratyakṣarūpadhṛk

yūyaṃ gacchata deveśa mahā vrataparāyaṇāḥ //
bhuṃkta svānsvāṃścādhikārānmayā te dānavā hatāḥ

ityuktvā devadeveśāvaikyarūpadharau yadā //
gaṇānāṃ devatānāṃ ca buddhiṃ nirbhedatāṃ tadā

nayantau tau tadā ceśā babhūvaturarindamau//
te'pi devā nirābādhā hṛṣṭacittā hyabhedataḥ

prayayuḥ svāṃścādhikārānvimānagaṇa koṭibhiḥ //
// gālava uvāca // //
tathā tatrāpi te devāḥ pārvatyāḥ śāpamohitāḥ

stutvā tāṃ bilvapatraiśca pūjayitvā maheśvarīm //
prasannavadanāṃ stutvā praṇipatya punaḥpunaḥ

sā provāca tato devānviśvamātā tu saṃstutā //
mama śāpo vṛthā naiva bhaviṣyati surottamāḥ

tathāpi kṛtapāpānāṃ karavāṇi kṛpāṃ ca vaḥ //
svarge dṛṣanmayā naiva bhaviṣyatha surottamāḥ

martyalokaṃ ca saṃprāpya pratimāsu ca sarvaśaḥ //
sarve devāśca varadā lokānāṃ prabhaviṣyatha

pāṇigraheṇa vihitā ye kumārāḥ kumārikāḥ //
teṣāṃteṣāṃ prajāścaiva bhaviṣyatha na saṃśayaḥ

ityuktvā sā bhagavatī devatānāṃ varapradā //
viṣṇuṃ maheśvaraṃ caiva provāca kupitā bhṛśam

devāstasyā bhayānnaṣṭā martyeṣu pratimāṃ gatāḥ //
bhaktānāṃ mānasaṃ bhāvaṃ pūrayantaḥ susaṃsthitāḥ

yasmādviṣṇo maheśānastvayā'pi na niṣedhitaḥ //
tasmāttvamapi pāṣāṇo bhaviṣyasi na saṃśayaḥ

haro'pyaśmamayaṃ rūpaṃ prāpya lokavigarhitam //
liṃgākāraṃ vipraśāpānmahadduḥkhamavāpsyati

tacchrutvā bhagavānviṣṇuḥ pārvatīmanukūlayan //
uvāca praṇato bhūtvā harabhāryāṃ maheśvarīm

// śrīviṣṇuruvāca // //
mahāvrate mahādevi mahādevapriyā sadā //
tvaṃ hi sattvarajaḥsthā ca tāmasī śaktiruttamā

mātrātrayasamopetā guṇatrayavibhāvinī //
māyādīnāṃ janitrī tvaṃ viśvavyāpakarūpiṇī

vedatrayastutā tvaṃ ca sādhyārūpeṇa rāgiṇī //
arūpā sarvarūpā tvaṃ janasantānadāyinī

phalavelā mahākālī mahālakṣmīḥ sarasvatī //
oṃkāraśca vaṣaṭkārastvameva hi sureśvari

bhūtadhātri namaste'stu śivāyai ca namo'stu te //
rāgiṇyai ca virāgiṇyai vikarāle namaḥ śubhe

evaṃ stutā prasannākṣī prasannenāṃtarātmanā //
uvāca paramodāraṃ mithyāroṣayutaṃ vacaḥ

macchāpo nā'nyathā bhāvī janārdana tavāpyayam //
tatrā'pi saṃsthitastvaṃ hi yogīśvaravimuktidaḥ

kāmapradaśca bhaktānāṃ cāturmāsye viśeṣataḥ //
nimnagā gaṃḍakīnāma brahmaṇo dayitā sutā

pāṣāṇasārasaṃbhūtā puṇyadātrī mahājalā //
tasyāḥ suvimale nīre tava vāso bhaviṣyati

caturviṃśatibhedena purāṇajñairnirīkṣitaḥ /
mukhe jāṃbūnadaṃ caiva śālagrāmaḥ prakīrtitaḥ

varttulastejasaḥ piṃḍaḥ śriyā yukto bhaviṣyasi //
sarvasāmarthyasaṃyukto yogināmapi mokṣadaḥ

ye tvāṃ śilāgataṃ viṣṇuṃ pūjayiṣyaṃti mānavāḥ //
teṣāṃ sucintitāṃ siddhiṃ bhaktānāṃ saṃprayacchasi

śilāgataṃ ca deveśaṃ tulasyā bhakti tatparāḥ //
pūjayiṣyaṃti manujāsteṣāṃ muktirna dūrataḥ

śilāsthitaṃ ca yaḥ paśyettvāṃ viṣṇuṃ pratimāgatam //
sucakrāṃkitasarvāṃgaṃ na sa gacchedyamālayam

// gālava uvāca // //
iti te kathitaṃ sarvaṃ śālagrāmasya kāraṇam //
yathā sa bhagavānviṣṇuḥ pāṣāṇatvamupā gataḥ

govindo'pi mahāśāpaṃ labdhvā svabhavanaṃ gataḥ //
pārvatī ca maheśānaṃ kupitā praṇamayya ca // ३३ /
evaṃ sa eva bhagavānbhavabhūta bhavyabhūtādikṛtsakalasaṃsthitināśanāṃkaḥ //
so'pi śriyā saha bhavo'pi girīśaputryā sārddhaṃ caturṣu ca drumeṣu nivāsamāpa

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye paija vanopākhyāne viṣṇuśāponāmaikapañcāśaduttaradviśatatamo'dhyāyaḥ