સ્કંદ પુરાણ · અધ્યાય 6.250

॥ વાણ્યુવાચ ॥ ॥
બિલ્વપત્રસ્ય માહાત્મ્યં કથિતું નૈવ શક્યતે॥
તવોદ્દેશેન વક્ષ્યામિ મહેન્દ્ર શૃણુ તત્ત્વતઃ

વિહારશ્રમમાપન્ના દેવી ગિરિસુતા શુભા ॥
લલાટફલકે તસ્યાઃ સ્વેદબિન્દુરજાયત

સ ભવાન્યા વિનિક્ષિપ્તો ભૂતલે નિપપાત ચ ॥
મહાતરુરયં જાતો મન્દરે પર્વતોત્તમે

તતઃ શૈલસુતા તત્ર રમમાણા યયૌ પુનઃ ॥
દૃષ્ટ્વા વનગતં વૃક્ષં વિસ્મયોત્ફુલ્લલોચના

જયાં ચ વિજયાં ચૈવ પપ્રચ્છ ચ સખીદ્વયમ્ ॥
કોઽયં મહાતરુર્દિવ્યો વિભાતિ વનમધ્યગઃ ॥
દૃશ્યતે રુચિરાકારો મહાહર્ષકરો હ્યયમ્

॥ જયોવાચ ॥ ॥
દેવિ ત્વદ્દેહસંભૂતો વૃક્ષોઽયં સ્વેદબિન્દુજઃ ॥
નામાઽસ્ય કુરુ વૈ ક્ષિપ્રં પૂજિતઃ પાપનાશનઃ

॥ પાર્વત્યુવાચ ॥ ॥
યસ્માત્ક્ષોણીતલં ભિત્ત્વા વિશિષ્ટોઽયં મહાતરુઃ

ઉદતિષ્ઠત્સમીપે મે તસ્માદ્બિલ્વો ભવત્વયમ્ ॥
ઇમં વૃક્ષં સમાસાદ્ય ભક્તિતઃ પત્રસંચયમ્

આહરિષ્યત્યસૌ રાજા ભવિષ્યત્યેવ ભૂતલે ॥
યઃ કરિષ્યતિ મે પૂજાં પત્રૈઃ શ્રદ્ધાસમન્વિતઃ

યંયં કામમભિધ્યાયેત્તસ્ય સિદ્ધિઃ પ્રજાયતે ॥
યો દૃષ્ટ્વા બિલ્વપત્રાણિ શ્રદ્ધામપિ કરિષ્યતિ

પૂજનાર્થાય વિધયે ધનદાઽહં ન સંશયઃ ॥
પત્રાગ્રપ્રાશને યસ્તુ કરિષ્યતિ મનો યદિ ॥
તસ્ય પાપસહસ્રાણિ યાસ્યંતિ વિલયં સ્વયમ

શિરઃ પત્રાગ્રસંયુક્તં કરોતિ યદિ માનવઃ ॥
ન યામ્યા યાતના હ્યસ્ય દુઃખદાત્રી ભવિષ્યતિ

ઇત્યુક્ત્વા પાર્વતી હૃષ્ટા જગામ ભવનં સ્વકમ્ ॥
સખીભિઃ સહિતા દેવી ગણૈરપિ સમન્વિતા

॥ વાણ્યુવાચ ॥ ॥
અયં બિલ્વતરુઃ શ્રેષ્ઠઃ પવિત્રઃ પાપનાશનઃ ॥
તસ્ય મૂલે સ્થિતા દેવી ગિરિજા નાત્ર સંશયઃ

સ્કન્ધે દાક્ષાયણી દેવી શાખાસુ ચ મહેશ્વરી ॥
પત્રેષુ પાર્વતી દેવી ફલે કાત્યા યની સ્મૃતા

ત્વચિ ગૌરી સમાખ્યાતા અપર્ણા મધ્યવલ્કલે ॥
પુષ્પે દુર્ગા સમાખ્યાતા ઉમા શાખાંગકેષુ ચ

કણ્ટકેષુ ચ સર્વેષુ કોટયો નવસંખ્યયા ।
શક્તયઃ પ્રાણિરક્ષાર્થં સંસ્થિતા ગિરિજાઽઽજ્ઞયા

તાં ભજંતિ સુપત્રૈશ્ચ પૂજયંતિ સનાતનીમ્ ॥
યંયં કામયતે કામં તસ્ય સિદ્ધિર્ભવેદ્ધ્રુવમ્

મહેશ્વરી સા ગિરિજા મહેશ્વરી વિશુદ્ધરૂપા જનમોક્ષદાત્રી॥
હરં ચ દૃષ્ટ્વાથ પલાશમાશ્રિતં સ્વલીલયા બિલ્વવપુશ્ચકાર સા

ઇતિ શ્રીસ્કાંદેમહાપુરાણ એકાશીતિસાહસ્ર્યાં સહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે શેષશાય્યુપાખ્યાને બ્રહ્મનારદસંવાદે ચાતુ ર્માસ્યમાહાત્મ્યે પૈજવનોપાખ્યાને બિલ્વોત્પત્તિવર્ણનંનામ પઞ્ચાશદુત્તરદ્વિશતતમોઽધ્યાયઃ