સ્કંદ પુરાણ · અધ્યાય 6.248

॥ વાણ્યુવાચ ॥ ॥
પલાશો હરિરૂપેણ સેવ્યતે હિ પુરાવિદૈઃ ॥
બહુભિર્હ્યુપચારૈસ્તુ બ્રહ્મવૃક્ષસ્ય સેવનમ્

સર્વકામપ્રદં પ્રોક્તં મહાપાતકનાશનમ્ ॥
ત્રીણિ પત્રાણિ પાલાશે મધ્યમં વિષ્ણુશાપિતમ્

વામે બ્રહ્મા દક્ષિણે ચ હર એકઃ પ્રકીર્તિતઃ ॥
પલાશપાત્રે યો ભુંક્તે નિત્યમેવ નરોત્તમઃ

અશ્વમેધસહસ્રસ્ય ફલં પ્રાપ્નોત્યસંશયમ્ ॥
ચાતુર્માસ્યે વિશેષેણ ભોક્તુર્મોક્ષપ્રદં ભવેત્

પયસા વાથ દુગ્ધેન રવિવારેઽનિશં યદિ ॥
ચાતુર્માસ્યેઽર્ચિતો યૈસ્તુ તે યાંતિ પરમંપદમ્

દૃશ્યતે યદિ પાલાશઃ પ્રાતરુત્થાય માનવૈઃ ॥
નરકાનાશુ નિર્ધૂય ગમ્યતે પરમં પદમ્

પાલાશઃ સર્વદેવાનામાધારો ધર્મસાધનમ્ ॥
યત્ર લોભસ્તુ તસ્ય સ્યાત્તત્ર પૂજ્યો મહાતરુઃ

યથા સર્વેષુ વર્ણેષુ વિપ્રો મુખ્યતમો ભવેત્ ॥
મધ્યે સર્વતરૂણાં ચ બ્રહ્મવૃક્ષો મહોત્તમઃ

યસ્ય મૂલે હરો નિત્યં સ્કંધે શૂલધરઃસ્વયમ્ ॥
શાખાસુ ભગવાન્રુદ્રઃ પુષ્પેષુ ત્રિપુરાંતકઃ

શિવઃ પત્રેષુ વસતિ ફલે ગણપતિસ્તથા ॥
ગંગાપતિસ્ત્વચાયાં તુ મજ્જાયાં ભગવા ન્ભવઃ

ઈશ્વરસ્તુ પ્રશાખાસુ સર્વોઽયં હરવલ્લભઃ ॥
હરઃ કર્પૂરધવલો યથાવદ્વર્ણિતઃ સદા

તથા હ્યયં બ્રહ્મરૂપઃ સિતવર્ણો મહાભગઃ॥
ચિંતિતો રિપુનાશાય પાપસંશોષણાય ચ

મનોરથપ્રદાનાય જાયતે નાત્ર સંશયઃ ॥
ગુરુવારે સમાયાતે ચાતુર્માસ્યે તથૈવ ચ

પૂજિતશ્ચ સ્તુતો ધ્યાતઃ સર્વદુઃખવિનાશકઃ

દેવસ્તુત્યો દેવબીજં પરં યન્મૂર્તં બ્રહ્મ બ્રહ્મવૃક્ષત્વમાપ્તમ્ ॥
નિત્યં સેવ્યઃ શ્રદ્ધયા સ્થાણુરૂપશ્ચાતુર્માસ્યે સેવિતઃ પાપહા સ્યાત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે શેષશાય્યુપાખ્યાને બ્રહ્મનારદસંવાદે ચાતુર્માસ્યમાહાત્મ્યે પૈજવનોપાખ્યાને પાલાશમહિમવર્ણનંનામાષ્ટચત્વારિંશદુત્તરદ્વિશતતમોઽધ્યાયઃ