Skanda Purana · Chapter 6.246

// gālava uvāca // //
śakrādayastu deveśā duḥkhasaṃtaptamānasāḥ // //
īśvarādarśanabhrāṃtamanaḥ karmeṃdriyā ratim

na prāpurlokanāthaṃ te kṛtvā yaḥ pratimākṛtim //
tapasārādhayāmāsuḥ sarvabhūtahṛdisthitam

kapardaśirasaṃ devaṃ śūlahastaṃ pinākinam //
kapālakhaṭvāṃgadharaṃ daśahastaṃ kirīṭinam

umāsahitamīśānaṃ paṃcavaktraṃ mahābhujam//
karpūragauradehābhaṃ sitabhūtivibhūṣitam//

nāgayajñopavītena gajacarmasamanvitam //
kṛṣṇasāratvacā cāpi kṛtaprāvaraṇaṃ vibhum

kṛtadhyānāḥ surāstatra vṛkṣādhāre samāśritāḥ //
vratacaryāṃ samāśritya pracakrustapa uttamam

ṣaḍakṣareṇa maṃtreṇa śaivena vihitāḥ surāḥ //
// śūdra uvāca // //
vratacaryā tvayā yā sā proktā saṃjā yate katham

brahmanvistarato brūhi na tṛpyete vaco'mṛtaiḥ

// gālava uvāca // //
japanbhasma ca khaṭvāṃgaṃ kapālaṃ sphāṭikaṃ tathā //
ruṃḍamālāṃ paṃcavaktramarddhacaṃdraṃ ca mūrddhani

citrakṛttiparīdhānaṃ kaupīnakuṇḍaladvayam //
ghaṃṭāyugmaṃ triśūlaṃ ca sūtraṃ caryāsvarūpakam

amībhirlakṣaṇairlakṣyaṃ mayoktaṃ tava śūdraja //
anena vidhinā sarve devā vahnipurogamāḥ

sarva ārādhayāmāsuḥ sarvopāyairvarapradam //
cāturmāsye ca saṃpūrṇe sapūrṇe kārtike'male

cīrṇavratānsurāndṛṣṭvā viśuddhāṃśca maheśvaraḥ //
matiṃ teṣāṃ dadau tuṣṭo jīvātmā sarvabhūtadṛk

śatarudrīyajāpyena vidhānasahitena ca //
dhyānena dīpadānena cāturmāsye tutoṣa saḥ

pūjanaiḥ ṣoḍaśavidhairyathā viṣṇostathā hare //
kurvāṇānbhaktibhāvena jñātvā devānsamāgatān

prahṛṣṭo bhagavānrudro dadau teṣāṃ śubhā matim //
tataḥ saṃmaṃtrya te devā vahniṃ stutvā yathārthataḥ

prasannavadanaṃ cakruḥ kāryasādhanatatparam //
karmasākṣī mahātejāḥ kṛtvā pārāvataṃ vapu

praviveśa tato madhye draṣṭuṃ devaṃ maheśvaram //
cakāra gativikṣepaṃ guṃṭhanairavaguṃṭhanaiḥ

luṃṭhanaiḥ sarpaṇaiścaiva cārurūpo'dbhutāṃ gatim //
taṃ dṛṣṭvā bhagavāṃstatra kāraṇaṃ samabuddhyata

ūrdhvaretāstatastasminsasarjādau dadhāra tat //
vīryaṃ vahnimukhe caiva sotpapāta gṛhādbahiḥ

gate tasminpataṃge'tha pārvatī viphalaśramā //
saṃkruddhā sarvadevānāṃ sā śaśāpa maheśvarī

yasmānmamecchā vihatā bhavadbhirduṣṭabuddhibhiḥ //
tasmātpāṣāṇatāmāśu vrajaṃtu tridivaukasaḥ

nirapatyā nirdayāśca sarve devā bhaviṣyatha //
tataḥ prasādayāmāsuḥ praṇatāḥ śāpayaṃtritāḥ

mahadduḥkhaṃ saṃpraviṣṭāḥ punaḥ punarathābruvan

// devā ūcuḥ // //
tvaṃ mātā sarvadevānāṃ sarvasākṣī sanātanī //
utpattisthitisaṃhārakāraṇaṃ jagatāṃ sadā

bhūtaprakṛtirūpā tvaṃ mahābhūtasamāśritā //
aparṇā tapasāṃ dhātrī bhūtadhātrī vasundharā

maṃtrārādhyā mantrabījaṃ viśvabījalayasthitiḥ //
yajñādiphaladātrī ca svāhārūpeṇa sarvadā

mantrayantrasamopetā brahmaviṣṇuśivādiṣu //
nityarūpā mahārūpā sarvarūpā nirañjanā

doṣatrayasamākrānta jananaiḥ śreyasapradā //
mahālakṣmīrmahākālīmahādevī maheśvarī

viśveśvarī mahāmāyā māyābījavarapradā //
vararūpā vareṇyā tvaṃ varadātrī varāsutā

bilvapatraiḥ śubhairye tvāṃ pūjayanti narāḥ sadā //
teṣāṃ rājyapradātrī ca kāmadā siddhidā sadā

cāturmāsye'rcitā yaistvaṃ bilvapatrairviśeṣataḥ //
teṣāṃ vāṃchitasiddhyarthaṃ jātā kāmadughā svayam

ye'rcayaṃti sadā loke maheśvarasamanvitām //
bilvapatrairmahābhaktyā na teṣāṃ duḥkhaduṣkṛtī

cāturmāsye viśeṣeṇa tava pūjā mahāphalā //
adyaprabhṛti yairlokairbilvapatraistu pūjitā

vidhāsyasi maheśāni teṣāṃ jñānamanuttamam//
cāturmāsye'dhikaphalaṃ bilvapatraṃ varānane

umāmaheśvaraprītyai dattaṃ vidhivadakṣayam //
yathā śrīstulasīvṛkṣe tathā bilve ca pārvatī

tvaṃ mūrtyā dṛśyase viśvaṃ sakalābhīṣṭadāyinī //
cāturmāsye viśeṣeṇa sevitau dvau mahāphalau

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsya māhātmye paijavanopākhyāne pārvatyendrādīnāṃ śāpapradānavṛttāntavarṇanaṃnāma ṣaṭcatvāriṃśaduttaraśatatamo'dhyāyaḥ