Skanda Purana · Chapter 6.245

// paijavana uvāca // //
śāligrāmaśilāyāṃ ca jagadādiḥ sanātanaḥ //
kathaṃ pāṣāṇatāṃ prāpto gaṇḍakyāṃ tacca me vada //
tvatprasādena viprarṣe harau bhaktirdṛḍhā bhavet //
bhavaṃtastīrtharūpā hi darśanātpāpahāriṇaḥ

tīrthāmṛtāvagāhena yathā pavitratā nṛṇām //
bhavadvākyāmṛtājjātā tathā mama na saṃśayaḥ

// gālava uvāca // //
itihāsastvayaṃ puṇyaḥ purāṇeṣu ca paṭhyate //
yathā sa eva bhagavāñchāligrāmatvamāgataḥ

maheśvaraśca liṃgatvaṃ kathaye'haṃ tavā'nagha //
pūrvaṃ prajāpatirdakṣo brahmaṇoṃ'guṣṭha saṃbhavaḥ

'
tasyāsīdduhitā sādhvī satīnāmnī sulakṣaṇā //
hareṇoḍhā vidhijñena vedoktavidhinā tataḥ

sa cakāra mahāyajñe haradveṣaṃ vimūḍhadhīḥ //
tena dveṣeṇa mahatā satī prakupitā bhṛśam

yajñavedyāṃ samāgamya vahnidhāraṇayā tadā //
prāṇāyāmaparā bhūtvā dehotsargaṃ cakāra sā

pitṛbhāgaṃ parityajya svabhāgena yutā satī //
manasā dhyānamagamacchītalaṃ ca himālayam

yatrayatra mano yāti svakarmavaśagaṃ mṛtau //
avatārastatratatra jāyate nātra saṃśayaḥ

dahyamānā hi sā devī himālayasutā'bhavat //
tatra sā pārvatī bhūtvā tapa ugraṃ samāśritā

śivabhaktiratā nityaṃ haravrataparāyaṇā //
śṛṃge himavataḥ putrī mano nyasya maheśvare //

tato varṣasahasrāṃte bhagavānbhūtabhāvanaḥ //
athājagāma taṃ deśaṃ viprarūpo maheśvaraḥ

tāṃ jñātvā tapasā śuddhāṃ karmabhāvaiḥ parīkṣitaiḥ //
tato divyavapurbhūtvā kare jagrāha pārvatīm

tapasā nirjitaścāsmi karavāṇi ca kiṃ priyam //
tataḥ prāha maheśānaṃ pramāṇaṃ me pitā guruḥ /

saptarṣīnsa tathoktastu preṣayāmāsa śaṃkaraḥ //
te tatra gatvā samayaṃ vaktuṃ himavatā saha

nivedya ca maheśānaṃ preṣitā munayo yayuḥ /
tato lagnadine devā mahendrādaya īśvaram

brahmaviṣṇupurogāśca purodhāyāgnimāyayuḥ //
yogasiddhā samāyāṃtaṃ varaveṣaṃ vṛṣadhvajam / १८ /
himavānpūjayāmāsa madhuparkādikaiḥ śubhaiḥ //
upacārairmudā yukto mānayankṛtakṛtyatām

vedoktena vidhānena tāṃ kanyāṃ samayojayat //
pāṇigraheṇa vidhinā dvijātigaṇasaṃvṛtaḥ

vahniṃ pradakṣiṇīkṛtya girīśastadanantaram //
dānakāle ca gotrādi pṛṣṭo lajjāparo hara

brahmaṇo vacanāttena vidhiśeṣo'vaśeṣitaḥ//
caruprāśanakāle tu paṃcavaktraprakāśakṛt

sahitaḥ sakalairdevaiḥ kutūhalaparāyaṇaḥ//
girijārthaṃ samāyukto varaḥ so'pi maheśvaraḥ

navakoṭimukhāṃ dṛṣṭvā sāṭṭahāso jano'bhavat//
vaidikī śrutirityuktā śiva tvaṃ sthiratāṃ vraja

lajjitā sā parityāgaṃ nākarotpaṃcajanmasu //
bharttāramasitāpāṃgī haramevābhyagacchata

devānāṃ parvatānāṃ ca prahṛṣṭaṃ sakalaṃ kulam //
tato vivāhe saṃpūrṇe haro'gātkautukaukasi

gaṇānāṃ cāpi sānnidhye sā nāmarṣayadaṃbikā //
pāribarhaṃ tato dattvā śailena sa visarjitaḥ

mānitaḥ satkṛtaścāpi mandarācalamabhyagāt//
viśvakarmā tatastasya kṣaṇena maṇimadgṛham

nirmame devadevasya svecchāvarddhiṣṇumaṃdiram //
sarvarddhimatpraśastābhaṃ maṇividrumabhūṣitam

sthūṇāsahasrasaṃyuktaṃ maṇivedimanoharam //
gaṇā naṃdiprabhṛtayo yasya dvāri samāśritāḥ

trinetrāḥ śūlahastāśca babhuḥ śaṃkararūpiṇaḥ //
vāṭikā asya paritaḥ pārijātāḥ sahasraśaḥ

kāmadhenurmaṇirdivyo yasya dvāri samāśritau //
tasminmanoharatare kāmavṛddhikare gṛhe

pārvatyā vasataḥ sārddhaṃ kāmo dṛṣṭipathaṃ yayau //
vāyurūpaḥ śivaṃ dṛṣṭvā kāmaḥ provāca śaṃkaram

namaste sarvarūpāya namaste vṛṣabhadhvaja //
namaste gaṇanāthāya pāhi nātha namo'stu te

tvayā virahitaṃ lokaṃ śavavatspṛśate mahī //
na tvayā rahitaṃ kiñci ddṛśyate sacarācare

tvaṃ goptā tvaṃ vidhātā ca lokasaṃhārakārakaḥ //
kṛpāṃ kuru mahādeva dehadānaṃ prayaccha me

// īśvara uvāca // // //
yanmayā tvaṃ purā dagdhaḥ parvate purato'nagha //
tasyā eva samīpe tvaṃ punarbhava svadehavān

evamuktastataḥ kāmaḥ svaśarīramupāgataḥ //
vavaṃde caraṇau śūdra vinayāvanato'bhavat

tato nanāma caraṇau pārvatyāḥ saṃprahṛṣṭavān //
labdhaprasādastu tayoḥ samīpādbhuvanatraye

cacāra sumahātejā mahāmohabalānvitaḥ //
puṣpadhanvā puṣpabāṇastvākuñcitaśiroruhaḥ

sadā ghūrṇitanetraśca tayordehamupāviśat //
divyāsavairdivyagaṃdhairvastramālyādibhistathā

sakhyaḥ saṃbhogasamaye paricakruḥ samaṃtataḥ //
evaṃ prakrīḍatastasya vatsarāṇāṃ śataṃ yayau

sāgramekā niśā yadvanmaithune saktacetasaḥ //
etasminnaṃtare devāstārakapradrutā bhayāt //
brahmāṇaṃ śaraṇaṃ jagmuḥ stutvā taṃ śaraṇaṃ gatāḥ

// devā ucuḥ // //
tārako'sau mahāraudrastvayā dattavaraḥ purā

vijitya tarasā śakraṃ bhuṃkte trailokyapūjitaḥ //
vadhopāyo yathā tasya jāyate tvaṃ kuru svayam //

// brahmovāca // //
mayā dattavaraścāsau mayaivocchidyate nahi //
svayaṃ saṃvardhya kaṭukaṃ chettuṃ ko'pi na cārhati

tasmāttasya vadhopāyaṃ kathayāmi mahātmanaḥ //
pārvatyāṃ yo maheśānātsūnurutpatsyate hi saḥ

dinasaptakavānbhūtvā tārakaṃ sa haniṣyati //
iti vākyaṃ tu te śrutvā maṃdaraṃ lokasuṃdaram

brahmalokātsamājagmuḥ pīḍitā daityadānavaiḥ

tatra naṃdiprabhṛtayo gaṇāḥ śūlabhṛtaḥ puraḥ //
gṛhadvāre hyupā vṛtya tasthuḥ saṃyatacetasaḥ

// devā ūcuḥ // //
devāśca duḥkhāturacetaso bhṛśaṃ hataprabhāstyaktagṛhāśrayākhilāḥ //
saṃprāpya māsāṃścaturaḥ stapaḥ sthitā deve prasupte haratoṣaṇaṃ param

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye paijavanopākhyāne tārakopadrutānāṃ devānāṃ śivadarśanārthaṃ maṃdarācalaṃpratigamanavarṇanaṃnāma pañcacatvāriṃśaduttaradviśatatamo'dhyāyaḥ