Skanda Purana · Chapter 6.240

// brahmovāca // //
harerdīpastu maddīpādadhiko'yaṃ prakurvataḥ //
vaikuṇṭhavāsa eva syānmamaiśvaryamavāṃchitam

// nārada uvāca // //
dīpo'yaṃ viṣṇubhavane mantravadvihito naraiḥ //
sadā viśeṣaphaladaścāturmāsye'dhikaḥ katham

//
// brahmovāca // //
viṣṇurnityādhidaivaṃ me viṣṇuḥ pūjyaḥ sadā mama //
viṣṇumenaṃ sadā dhyāye viṣṇurmattaḥ paro hi saḥ

sa viṣṇu vallabho dīpaḥ sarvadā pāpahārakaḥ //
cāturmāsye viśeṣeṇa kāmanāsiddhikārakaḥ

viṣṇurdīpena saṃtuṣṭo yathā bhavati putraka //
tathā yajñasahasraiśca varaṃ naiva prayacchati

svalpa vyayena dīpasya phalamānaṃtakaṃ nṛṇām //
anaṃtaśayane prāpte puṇyasaṃkhyā na vidyate

tasmātsarvātmabhāvena śraddhayā saṃyutena ca //
dīpapradānaṃ kurute hareḥ pāpairna lipyate

upacāraiḥ ṣoḍaśakairyatirūpe harau punaḥ //
dīpapradāne vihite sarvamuddyotitaṃ jagat

dīpādanaṃtaraṃ brahmannannasya ca nivedanam //
trayodaśyā bhaktiyuktaiḥ kāryaṃ mokṣapadasthitaiḥ

amṛtaṃ saṃparityajya yadannaṃ devatā api //
spṛhayaṃti gṛhasthasya gṛhadvāragatāḥ sadā

harau supte viśeṣeṇa pradeyaḥ pratyahaṃ naraiḥ //
phalairarghyo viṣṇutuṣṭyai tatkālasamudā hṛtaiḥ

tāṃbūlavallīpatraiśca tathā pūgaphalaiḥ śubhaiḥ //
drākṣājaṃbvāmrajaphalairakroḍairdāḍimairapi

bījapūraphalaiścaiva dadyādarghyaṃ subhaktitaḥ //
śaṃkhatoyaṃ samādāya tasyopari phalaṃ śubham

maṃtreṇānena viprendra keśavāya nivedayet //
punarācamanaṃ deyamannadānādanaṃtaram

ārtikyaṃ ca tataḥ kuryātsarvapāpavināśanam //
caturdaśyā namaskuryādviṣṇave yatirūpiṇe

paṃcadaśyā bhramaḥ kāryaḥ sarvadikṣu dvijaiḥ saha //
saptasāgarajai stoyairdattairyatphalamāpyate

tattoyadānācca hareḥ prāpyate viṣṇuvallabhaiḥ //
caturvārabhramībhiśca jagatsarvaṃ carācaram

krāṃtaṃ bhavati viprāgrya tattīrthagamanādikam //
ṣoḍaśyā devasāyujyaṃ cintayedyogavittamaḥ

ātmanaśca harernityaṃ na mūrtiṃ bhāvayettadā //
mūrtāmūrtasvarūpa tvāddṛśyo bhavati yogavit

tasmindṛṣṭe nivarteta sadasadrūpajā kriyā //
ātmānaṃ tejasāṃ madhye cintayetsūryavarcasam

ahameva sadā viṣṇurityātmani vicārayan //
labhate vaiṣṇavaṃ dehaṃ jīvanmukto dvijo bhavet

cāturmāsye viśeṣeṇa yogayukto dvijo bhavet //
iyaṃ bhaktiḥ samādiṣṭā mokṣamārgaprade harau

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyu pākhyāne brahmanāradasaṃvāde cāturmāsyamāhātmye dīpadānādisāyujyacintanāntabhaktinirūpaṇaṃ nāma catvāriṃśaduttaradviśatatamo'dhyāyaḥ