Skanda Purana · Chapter 6.24

// sūta uvāca // //
tatra viṣṇupadaṃ nāma tīrthaṃ tīrthe śubhe sthitam //
aparaṃ brāhmaṇaśreṣṭhāḥ sarvapātakanāśanam

ayane dakṣiṇe prāpte yastatpūjya samāhitaḥ //
nivedayettathātmānaṃ samyakchraddhāsamanvitaḥ

sa mṛto'pyayane yāmye tadviṣṇoḥ paramaṃ padam //
prāpnoti nātra saṃdehastatprabhāvāddvijottamāḥ

tathā caivottare prāpte pūjayitvā yathāvidhi //
samyaṅnivedayedbhaktyā ātmānaṃ yaḥ samāhitaḥ //
so'pi viṣṇoḥ padaṃ puṇyaṃ prāpya saṃjāyate sukhī

// ṛṣaya ūcuḥ // //
kathaṃ tatra padaṃ jātaṃ viṣṇoravyaktajanmanaḥ //
kathaṃ nivedyate tatra samyagātmā' yanadvaye

tasmindṛṣṭe'thavā spṛṣṭe yatphalaṃ labhyate naraiḥ //
tatsarvaṃ sūtaja brūhi paraṃ kautṛhalaṃ hi naḥ

// sūta uvāca // //
balirbaddho yadā tena viṣṇunā prabhaviṣṇunā //
tadā kramaistribhirvyāptaṃ trailokyaṃ sacarācaram

hāṭakeśvaraje kṣetre saṃnyastaḥ prathamaḥ kramaḥ //
maharloke dvitī yastu tadā tena mahātmanā

tṛtīyasya samudyogaṃ yadā cakre sa cakradhṛk //
tadā bhinnaṃ dvijaśreṣṭhā brahmāṃḍaṃ laghutāṃ gatam

pādāgreṇātha saṃbhinne brahmāṃḍe nirmalaṃ jalam //
aṃguṣṭhāgreṇa saṃprāptaṃ krameṇa dharaṇītale

brahmalokaṃ tadā kṛtsnaṃ plāvayitvā jalaṃ hi tat //
śuddhasphaṭikasaṃkāśaṃ kundendusadṛśadyuti //
matsyakacchapasaṃkīrṇaṃ grāhayūthaiḥ samākulam

tataḥ prabhṛti sā loke gaṃgā viṣṇupadī smṛtā //
pavitramapi tatkṣetraṃ nayantī sā pavitratām

evaṃ viṣṇoḥ padaṃ tatra saṃjātaṃ munisattamāḥ //
sarvapāpaharaṃ puṃsāṃ tadā viṣṇupadī smṛtā

yastasyāṃ śraddhayā yuktaḥ snānaṃ kṛtvā yathoditam //
sparśayettatpadaṃ viṣṇoḥ sa yāti paramaṃ padam

yastatrakurute śrāddhaṃ samyakchraddhāsamanvitaḥ //
snātvā viṣṇupadītoye gayāśrāddhaphalaṃ labhet

māghamāse naraḥ snānaṃ prātarutthāya tatra yaḥ //
karoti satataṃ martyaḥ sa prayāgaphalaṃ labhet

athavā vatsaraṃ yāvatkṣaṇaṃ kṛtvātra bhaktitaḥ //
tatra snānaṃ ca yaḥ kuryātsa muktiṃ labhate naraḥ

yasyāsthīni jale tatra kṣipyaṃte manujasya ca //
api pāpa samācāraḥ sa prāpnoti parāṃ gatim

api pakṣipataṃgā ye paśavaḥ kṛmayo mṛgāḥ //
praviṣṭāḥ salile tasmiṃstṛṣārtā bhaktivarjitāḥ

te'pi pāpavinirmuktā dehāṃte cātidurlabham //
cakriṇastatpadaṃ yāṃti jarāmaraṇavarjitam

kiṃ punaḥ śraddhayopetāḥ parvakāla upasthite //
dattvā dānaṃ dvijendrāṇāṃ narā vedavidāṃ dvijāḥ

tatra gāthā purā gītā nāradena maharṣiṇā //
viṣṇupadyāḥ samālokya prabhāvaṃ pāpanāśanam

kiṃ vratairniyamairvāpi tapobhirvividhairmakhaiḥ //
kṛtairviṣṇupadītoye saṃsthite dharaṇītale

ekaḥ sarveṣu tīrtheṣu snānaṃ martyaḥ samācaret //
eko viṣṇupadītoye snāti dvābhyāṃ samaṃ phalam

eko dānāni sarvāṇi brāhmaṇebhyaḥ prayacchati //
eko viṣṇupadītoye snāti dvābhyāṃ samaṃ hi tat

pañcāgnisādhako grīṣme varṣāsvākāśamāśritaḥ //
jalāśrayaśca hemaṃta ekaḥ syātpuruṣaḥ kṣitau

anyo viṣṇupadītoye snātvā viṣṇupadaṃ spṛśet //
tāvubhāvapi nirdiṣṭau samau puruṣasattamau

ekāṃtaropavāsī ya ekaḥ syājjīvitāvadhi //
ekoviṣṇupadītoye snāti dvābhyāṃ samaṃ phalam

trirātropoṣitastveko yāvadvarṣaśataṃ naraḥ //
eko viṣṇupadītoye snāti dvābhyāṃ samaṃ phalam

// sūta uvāca // //
evamuktvā muniśreṣṭho nārado dvijasattamāḥ //
virarāma munīnāṃ sa bahūnāṃ purato'sakṛt

tasmātsarva prayatnena snānaṃ tatra samācareta //
saṃspṛśecca padaṃ viṣṇorya icchecchreya ātmanaḥ

// ṛṣaya ūcuḥ // //
yadetadbhavatā proktamātmānaṃ vinivedayet //
viṣṇoḥ padasya saṃprāpte ayane dakṣiṇottare

tatkena vidhinā sūta mantraiśca vada satvaram //
vayaṃ yena ca tatkurmaḥ sarvaṃ bhaktisamanvitāḥ

// sūta uvāca //
dakṣiṇe cottare cāpi saṃprāpte cāyanadvaye //
pūjayitvā padaṃ viṣṇorimaṃ mantramudīrayet

ṣaṇmāsābhyaṃtare mṛtyuryadyakasmādbhavenmama //
tatte padaṃ gatirme syādahaṃ te bhṛtyatāṃ gataḥ

evaṃ procya hariṃ paścātpūjayedbrāhmaṇāṃstataḥ //
atha taiḥ samamaśnīyāttataḥ prāpnoti sadgatim

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye viṣṇupadītīrthotpattivarṇanaṃnāma caturviṃśo'dhyāyaḥ