Skanda Purana · Chapter 6.23

sūta uvāca//
tasyaiva paścime bhāge mṛgatīrthamanuttamam//
asti puṇyatamaṃ khyātaṃ samaste dharaṇītale/////
tatra ye mānavāstīrthe samyakchraddhāsamanvitāḥ //
caitraśuklacaturdaśyāṃ snānaṃ kurvaṃtibhāskare

madhye sthite na te yāṃti tiryagyonau kathaṃcana //
api pāpasamopetā doṣaiḥ sarvaiḥ samanvitāḥ

kṛtaghnā nāstikāścaurā maryādābhedakāstathā //
snātā ye tatra sattīrthe te yāṃti paramāṃ gatim //
vimānavaramārūḍhāḥ stūyamānāśca kiṃnaraiḥ

// ṛṣaya ūcuḥ // //
mṛgatīrthaṃ kathaṃ tatra saṃjātaṃ sūtanaṃdana //
kiṃ prabhāvaṃ samācakṣva paraṃ kautūhalaṃ hi naḥ //

// sūta uvāca // //
pūrvaṃ tatra mahāraṇye nānāmṛgagaṇāvṛte //
nānāvihaṃgasaṃghuṣṭe nānāvṛkṣasamākule

samāyātā mahāraudrā lubdha kāścāpapāṇayaḥ //
kṛṣṇāṃgā bhramamāṇāste yamadūtā ivā'pare

etasminnaṃtare dṛṣṭaṃ mṛgayūthaṃ taroradhaḥ //
upaviṣṭaṃ suviśrabdhaṃ taistadā dvija sattamāḥ

atha tām̐llubdhakāndṛṣṭvā dūrato'pi bhayāturāḥ //
palāyanaparāḥ sarve mṛgā jagmurdrutaṃ tataḥ

atha te sannidhau dṛṣṭvā gaṃbhīraṃ salilāśayam //
praviṣṭā hariṇāḥ sarve bhayārtāḥ śarapīḍitāḥ

tatastatsalilasyāṃtaste mṛgāḥ sarva eva hi //
mānuṣatvamanuprāptāstatprabhāvā ddvijottamāḥ

atha tānmānuṣībhūtānpapracchurlubdhakā mṛgān//
mṛgayūthaṃ samāyātaṃ mārgeṇānena sāṃpratam //
kena mārgeṇa niryātaṃ tasmādvadata mā ciram

// mānuṣā ūcuḥ // //
vayaṃ te hariṇāḥ sarve mānuṣatvaṃ sudurlabham //
tīrthasyā'sya prabhāvena prāptāḥ satyaṃ na saṃśayaḥ

tacchrutvā vismayāviṣṭāstataste lubdhakā drutam //
tyaktvā dhanūṃṣi bāṇāṃśca snānaṃ tatra pracakrire ///४//
snānamātrāttataḥ sarve divyamālyānulepanāḥ //
divyagātradharā sarve saṃjātāḥ pārthivottamāḥ

// ṛṣaya ūcuḥ // //
atyāścaryamidaṃ sūta yattvayā parikīrtitam //
snānamātreṇa te prāptā lubdhakāstādṛśaṃ vapuḥ

tathā mānuṣyamāpannā mṛgāstoyāvagāhanāt //
tatkathaṃ medinīpṛṣṭhe tattīrthaṃ saṃbabhūva ha

// sūta uvāca // //
liṃgabhedodbhavaṃ toyaṃ yatpurā vaḥ prakīrtitam //
ācchannaṃ pāṃsubhiḥ kṛtsnaṃ vāyunā śakraśāsanāt

valmīkaraṃdhramāsādya tanniṣkrāṃtaṃ punardvijāḥ //
kālena mahatā tatra pradeśe svalpameva hi

yatra snātaḥ purā sadyastriśaṃkuḥ pṛthivīpatiḥ //
divyaṃ vapuḥ punaḥ prāpta ścaṃḍālatvena saṃsthitaḥ

etasmātkāraṇāttatra snātāḥ sāraṃgalubdhakāḥ //
sarve pāpavinirmuktāḥ saṃprāptāḥ paramaṃ vapuḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye mṛgatīrthamāhātmyavarṇanaṃnāmatrayoviṃśo'dhyāyaḥ