Skanda Purana · Chapter 6.237

// nārada uvāca // //
kadā vidhiniṣedhau ca kartavyau viṣṇusannidhau //
yuṣmadvākyāmṛtaṃ pītvā tṛptirmama na vidyate

// brahmovāca // //
karkasaṃkrāṃtidivase viṣṇuṃ saṃpūjya bhaktitaḥ //
phalairarghyaḥ pradātavyaḥ śastajaṃbūphalaiḥ śubhaiḥ

jaṃbūdvīpasya saṃjñeyaṃ phalena ca vijāyate //
mantreṇānena vipreṃdra śraddhādharmasusaṃyataiḥ

ṣaṇmāsābhyaṃtare mṛtyuryatra kvāpi bhavenmama //
tanmayā vāsudevāya svayamātmā niveditaḥ

// iti maṃtreṇārghyam // //
tato vidhiniṣedhau ca grāhyau bhaktyā hareḥ puraḥ //
cāturmāsye samāyāte sarvalokamahāsukhe

vidhirvedavidhiḥ kāryo niṣedho niyamo mataḥ //
vidhiścaiva niṣedhaśca dvāvetau viṣṇureva hi

tasmātsarvaprayatnena sevya eva janārdanaḥ //
viṣṇoḥ kathā viṣṇupūjā dhyānaṃ viṣṇornatistathā / ७ //
sarvameva hariprītyā yaḥ karoti sa muktibhāk //
varṇāśramavidhermūrtiḥ satyo viṣṇuḥ sanātanaḥ

cāturmāsye viśeṣeṇa janmakaṣṭādināśanam //
harireva vratādgrāhyo vrataṃ dehena kārayet //
deho'yaṃ tapasā śodhyaḥ supte deve taponidhau

// nārada uvāca // //
kiṃ vrataṃ kiṃ tapaḥ proktaṃ brahmanbrūhi savistaram //
supte deve mayā kāryaṃ kṛtaṃ yacca mahāphalam

// brahmovāca // //
vrataṃ viṣṇuvrataṃ viddhi viṣṇubhaktisamanvitam //
tapaśca dharmavartitvaṃ kṛcchrādikamathāpi vā

śṛṇu vratasya māhātmyaṃ vakṣyāmi prathamaṃ tava //
brahmacaryavrataṃ sāraṃ vratānāmuttamaṃ vratam

brahmacaryaṃ tapaḥ sāraṃ brahmacaryaṃ mahatphalam //
kriyāsu sakalāsveva brahmacaryaṃ vivarddhayet

brahmacaryaprabhāveṇa tapa ugraṃ pravarttate //
brahmacaryātparaṃ nāsti dharmasādhana muttamam

cāturmāsye viśeṣeṇa supte deve guṇottaram //
mahāvratamidaṃ loke tannibodha sadā dvija

nārāyaṇamidaṃ karma yaḥ karoti na lipyate //
śatatrayaṃ ṣaṣṭiyutaṃ dinamāhuśca vatsare

tatra nārāyaṇo devaḥ pūjyate vratakāribhiḥ //
satkriyāmamukīṃ deva kārayiṣyāmi niścayaḥ

kurute tadvrataṃ prāhuḥ supte deve guṇottaram //
vahnihomo viprabhaktiḥ śraddhā dharme matiḥ śubhā

satsaṃgo viṣṇupūjā ca satyavādo dayā hṛdi//
ārjavaṃ madhurā vāṇī saccaritre sadā ratiḥ

vedapāṭhastathā'steyamahiṃsā hrīḥ kṣamā damaḥ //
nirlobhatā'krodhatā ca nirmoho'mamatā'ra tiḥ

śrutikriyāparaṃ jñānaṃ kṛṣṇārpitamanogatiḥ //
etāni yasya tiṣṭhaṃti vratāni brahmavittama

jīvanmukto naraḥ prokto naiva lipya ti pātakaiḥ //
vrataṃ kṛtaṃ sakṛdapi sadaiva hi mahāphalam

cāturmāsye viśeṣeṇa brahmacaryādisevanam //
avratena gataṃ yeṣāṃ cāturmāsyaṃ sadā nṛṇām

dharmasteṣāṃ vṛthā sadbhistattvajñaiḥ parikīrtitaḥ //
sarveṣāmeva varṇānāṃ vratacaryā mahāphalam

svalpāpi vihitā vatsa cāturmā sye sukhapradā //
sarvatra dṛśyate viṣṇurvratasevāparairnṛbhiḥ

cāturmāsye samāyāte pālayettatprayatnataḥ

bhajasva viṣṇuṃ dvijavahnitīrthavedaprabhedamayamūrtimajaṃ virājam //
yatprasādādbhavati mokṣamahātarusthastāpaṃ na yāsyati bhavārkasamudbhavaṃ tam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye vratamahimavarṇanaṃnāma saptatriṃ śaduttaradviśatatamo'dhyāyaḥ