Skanda Purana · Chapter 6.236

// brahmovāca // //
iṣṭavastuprado viṣṇurlokaśceṣṭaruciḥ sadā //
tasmātsarvaprayatnena cātumāsye tyajecca tat

nārāyaṇasya prītyarthaṃ tadevākṣayyamāpyate //
martyastyajati śraddhāvānso'naṃtaphalabhāgbhavet

kāṃsyabhājanasaṃtyāgājjāyate bhūpatirbhuvi //
pālāśapatre bhuñjāno brahmabhūyastvamaśnute

tāmrapātre na bhuñjīta kadācidvā gṛhī naraḥ //
cāturmāsye viśeṣeṇa tāmrapātraṃ vivarjayet

arkapatreṣu bhuñjāno'nupamaṃ labhate phalam //
vaṭapatreṣu bhoktavyaṃ cāturmāsye viśeṣataḥ

aśvatthapatrasaṃbhogaḥ kāryo budhajanaiḥ sadā //
ekānnabhojī rājā syātsakalaṃ bhūmimaṇḍale

tathā ca lavaṇatyāgātsubhago jāyate naraḥ //
godhūmānnaparityāgājjāyate janavalabhaḥ

aśākabhojī dīrghāyuścāturmāsye'bhijāyate //
rasatyāgānmahāprāṇī madhutyāgātsulocanaḥ

mudgatyāgādripumṛtī rājamāṣāddhanāḍhyatā //
aśvāptistaṃḍulatyāgāccāturmāsye'bhijāyate

phalatyāgādbahusutastailatyāgātsurūpitā //
jñānī tuvarisaṃtyāgādbalaṃ vīryaṃ sadaiva hi

mārgamāṃsaparityāgānnarakaṃ na ca paśyati //
śaukarasya pīratyāgādbrahmavāsamavāpnuyāt

jñānaṃ lāvakasantyāgādājyatyāge mahatsukham //
āsavaṃ samparityajya muktistasya na durlabhā

sabalaḥ kanakatyāgādrūpyatyāgena mānuṣaḥ

dadhidugdhaparityāgī goloke sukha bhāgbhavet // १३
brahmā pāyasasaṃtyāgātkṣiprātyāgānmaheśvaraḥ //
kandarpo'pūpasaṃtyāgānmodakatyājakaḥ sukhī

gṛhāśramaparityāgī bāhyā śramaniṣevakaḥ //
cāturmāsyaṃ hariprītyai na māturjaṭhare śiśuḥ

nṛpo marīcasaṃtyāgācchuṇṭhītyāgena satkaviḥ //
śarkarāyāḥ parityāgājjāyate rājapūjitaḥ

guḍatyāgānmahābhūtistathā dāḍimavarjanāt //
raktavastraparityāgājjāyate janavallabhaḥ

paṭṭakūlaparityāgādakṣayyaṃ svarga māpnuyāt //
māṣānnacaṇakānnasya tyāgānnaiva punarbhavaḥ

kṛṣṇavastraṃ sadā tyājyaṃ cāturmāsye viśeṣataḥ //
sūryasaṃdarśanācchuddhirnīlavastrasya darśanāt

caṃdanasya parityāgādgāṃdharvaṃ lokamaśnute //
karpūrasya parityāgādyāvajjīvaṃ mahādhanī

kusumbhasya parityāgānnaiva paśyedyamāla yam //
keśarasya parityāgānmanuṣyo rājavallabhaḥ

yakṣakardamasaṃtyāgādbrahmaloke mahīyate //
jñānī puṣpaparityāgācchayyātyāge mahatsu kham

bhāryāviyogaṃ nāpnoti cāturmāsye na saṃśayaḥ //
alīkavādasaṃtyāgānmokṣadvāramapāvṛtam

paramarmaprakāśaśca sadyaḥpāpasamā gamaḥ //
cāturmāsye harau supte paranindāṃ vivarjayet

paranindā mahāpāpaṃ paranindā mahābhayam //
paranindā mahadduḥkhaṃ na tasyāṃ pātakaṃ param

kevalaṃ nindane caiva tatpāpaṃ labhate guru //
yathā śṛṇvāna eva syātpātakī na tataḥ paraḥ

keśasaṃskārasaṃtyāgāttāpatrayavivarjitaḥ //
nakharomadharo yastu harau supte viśeṣataḥ

divasedivase tasya gaṃgāsnānaphalaṃ bhavet

sarvopāyairviṣṇureva prasādyo yogidhyeyaḥ pravaraiḥ sarvavarṇeḥ //
viṣṇornāmnā mucyate ghorabandhāccāturmāsye smaryate'sau viśeṣāt

iti śrīskāṃde mahāpurāṇa ekāśītisāhasryāṃ saṃhitā yāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne cāturmāsyamāhātmye brahmanāradasaṃvāda iṣṭavastuparityāgamahimavarṇanaṃnāma ṣaṭtriṃśaduttaradvi śatatamo'dhyāyaḥ