Skanda Purana · Chapter 6.235

// brahmovāca // //
dānadharmaṃ praśaṃsaṃti sarvadharmeṣu sarvadā //
harau supte viśeṣeṇa dānaṃ brahmatvakāraṇam

annaṃ brahma iti proktamanne prāṇāḥ pratiṣṭhitāḥ //
tasmādannaprado nityaṃ vāridaśca bhavennaraḥ

vāridastṛptimāyāti sukhamakṣayyamannadaḥ //
vāryannayoḥ samaṃ dānaṃ na bhūtaṃ na bhaviṣyati

maṇiratnapravālānāṃ rūpyaṃ hāṭakavāsasām//
anyeṣāmapi dānānāmannadānaṃ viśiṣyate

annodakapradānaṃ ca gopradānaṃ ca nityadā //
vedapāṭho vahnihomaścāturmāsye mahāphalam

vaikuṇṭhapadavāñchā cedviṣṇunā saha saṃgame //
sarvapāpakṣayārthāya cāturmāsye'nnado bhavet

satyaṃsatyaṃ hi devarṣe mayoktaṃ tava nārada //
janmāṃtarasahasreṣu nādattamupatiṣṭhate

tasmādannapradānena sarve hṛṣyaṃti jantavaḥ //
devāśca spṛhayaṃtyenamannadānapradāyinam

ājyaṃ deyaṃ ca pātreṣu śraddhayā vajramiśritam //
vajradānakaro martyaścāturmāsye na mānavaḥ

bhojanaṃ guruviprāṇāṃ ghṛtadānaṃ ca satkriyā //
etāni yasya tiṣṭhanti cāturmāsye na mānavaḥ

saddharmaḥ satkathā caiva satsevā darśanaṃ satām //
viṣṣupūjā ratirdāne cāturmāsyeṣu durlabhāḥ

pitṝnuddiśya yo martyaścāturmāsye'nnado bhavet //
sarvapāpaviśuddhātmā pitṛlokamavāmuyāt

devāḥ sarve'nnadānena tṛptā yacchanti vāṃchitam //
pipīlikā'pi yadgehādbhakṣyamādāya gacchati

rātrau divā'niṣiddhānno hyannadānamanuttamam //
harau supte hi pāpaghnaṃ vārya mapi śatruṣu

cāturmāsye dugdhadānaṃ dadhi takraṃ mahāphalam //
janmakāle yena baddhaḥ piṃḍastaddānamuttamam

śākapradātā narakaṃ yamalokaṃ na paśyati //
vastradaḥ somalokaṃ ca vasedābhūtasaṃplavam

supte deve yathāśakti hyanyāsu pratimāsu ca //
puṣpavastrapradānena santānaṃ naiva hīyate

candanāgurudhūpaṃ ca cāturmāsye prayacchati //
putrapautrasamāyukto viṣṇurūpī bhavennaraḥ

supte deve jagannāthe phaladānaṃ praya cchati //
viprāya vedaviduṣe yamalokaṃ na paśyati

vidyādānaṃ ca godānaṃ bhūmidānaṃ prayacchati //
viṣṇuprītyarthameveha sa tārayati pūrvajān

guḍasaiṃdhavatailādimadhutiktatilānnadaḥ //
devatāyāssamuddiśya tāsāṃ lokaṃ prayāti hi

cāturmāsye tilāndattvā na bhūyaḥ stanapo bhavet //
yavapradātā vasate vāsavaṃ lokamakṣayam

hūyeta havyaṃ vahnau ca dānaṃ dadyāddvijātaye //
gāvaḥ supūjitāḥ kāryāścāturmāsye viśeṣataḥ

yatkiṃcitsukṛtaṃ karma janmāvadhi susaṃcitam //
cāturmāsye gate pātre vimukhe yanna dīyate

praṇaśyati kṣaṇādeva vacanā dyastu pracyutaḥ //
divasedivase tasya varddhate ca pratiśrutam

tasmānnaiva pratiśrāvyaṃ svalpamapyāśu dīyate //
tāvadvivarddhate dānaṃ yāvattanna prayacchati

yo mohānmanujo loke yāvatkoṭiguṇaṃ bhavet //
tato daśaguṇā vṛddhiścāturmāsye pradātari

narake patanaṃ tasya yāva diṃdrāścaturdaśa //
atastu sarvadā deyaṃ narairyattu pratiśrutam

anyasmai na pradātavyaṃ pradattaṃ naiva hārayet /
cāturmāsyeṣu yaḥ śayyāṃ dvijāgryāya prayacchati

vedoktena vidhānena na sa yāti yamālayam //
āsanaṃ vāripātraṃ ca bhājanaṃ tāmrabhājanam

cāturmāsye prayatnena deyaṃ vittānusārataḥ //
sarvadānāni viprebhyo dadatsupte jagadgurau

ātmānaṃ pūrvajaiḥ sārddhaṃ sa mocayati pātakāt //
gaurbhūśca tilapātraṃ ca dīpadānamanuttamam

dadadvijātaye mukto jāyate sa ṛṇatrayāt

sa viśvakartā bhuvaneṣu goptā sa yajñabhuksarvaphalapradaśca //
dānāni vastuṣvadhidaivataṃ ca yasminsamuddiśya dadāti muktaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvara kṣetramāhātmye śeṣaśāyyupākhyāne cāturmāsyamāhātmye brahmanāradasaṃvāde cāturmāsyadānamahimavarṇanaṃnāma pañcatriṃśaduttaradviśatatamo'dhyāyaḥ //